"ي اللي تحب العنب لاتجرح اغصانه
بعض المشاعر رقيقه يوم تجرحها "

يصبر على الوقت ماهو ينطق لسانه
لاهبت النود به ميل وصافحها

واذا تركت الجذور اتموت عطشانه
جفت وطاحت لان الشوق يذبحها

وان رحت ماهي على شرواك ندمانه
غلطه ولاكن مصير الوقت يدمحها

والغصن لوتنوي طيوره بهجرانه
تبطي تلاقي وطن مثله يفرحها

ياماخذ القلب خل القلب بااحزانه
تعبت اعدد ظروفي لك وانا اشرحها

بعض الحركات عندك مالها خانه
اقفل طريق المفارق وانت تفتحها

واليوم كلن يروح اليوم في شانه
ودعتك الله لجل نفسك تريحها

الحب يصعب على الوافين نسيانه
واهل المصالح تناسى مع مصالحها

اجراس الاحزان والافراح رنانه
واقلوب الاحباب جعل الله يفرحها

لابد وقتك يكشر فيك بااسنانه
يظهر عيوبك على العالم ويفضحها

تبكي عيونك طوال الليل سهرانه
حتى دموعك ماتلقى من يمسّحها

ودعتك الله وخل القلب بااحزانه
ي اللي تضوي الهموم وماتسرحها

كلمات/ محمد ال عباده الوايلي