اعتذر لك من خفوقي واقبل أعذاري عشانك
واعتذر لك لين ترضى وأنت بالأصل متجنـّي
ما ألومك في دلالك وأنت عارف وش مكانك
بس إرحم خافقي اللي في هواكم ممتحني
يوم قـلبي هايم ٍ بك والزمان اصبح زمانك
والحشى مابه سواكم غير حبك مستـكـنّي
والعيون اصبح نظرها..ما يشوف إلا مكانك
والشفايف من طربها باسمك الغالي تـغنّي
والهوى ميّـال يمك .. و الحنان أصبح حنانك
والحروف اللي تراقص في شفاتك يطربنّي
لو تقول اللي تقوله..حتى لو يسكت لسانك
المح أنغام ٍ تمايل في شفاتك يرقصنّي
يا حلو عقدة حجاجك لا تـثـنى ثم خانك
شعرك اللي فوق خدك أعجبه كثر التـثــنـّي
عاد هونك يا مدلــّع في خفوق ٍ عـَز شانك
وش جزى الإحسان إلا بالجزى له يحسَـنـَـنّـي
خف من الله لا تهينن ما خبرت القلب هانك
لعنبو جدك أنا اللي شايخات.. يلاحقـنّي
ما احدن ظلمه يزينه وأنت ظالم بس زانك
ولا احدن مظلوم راضي إلا أنا منك متهـنـّي
ما تشوف اني احبك وأقبل أعذاري عشانك
واعتذر لك لين ترضى وأنت بالأصل متجني





اضافة رد مع اقتباس




المفضلات