إللي صار اليوم أنا ريتو البارح
في غمضة نوم وخيالي سارح
في لحظة غفيت فيها أنا ريت
بحر بلا أمواج صافي كي الزيت
على شطو حبيبي ماشي يتغنى
خطواتو نغمة مزينة بالحنة
ريتو في منامي يجري قدامي
و الضحكة بيضاء ترد على سلامي
ريت روحي زادة نمشي في طريق
أظلم مالعاده و بلاش رفيق
طريق مضيعني شوكو موجعني
كلاب اتبعني و أنفاسي تضيق
و في أخر الثنيه ريت أنا بنيه
في ايديها شمعه قايده مضويه
غزرتلي غزره تنجي مالغصره
تبرد إبن آدم في وقت الحسره
و ضحكتلي ضحكه أنا نعرفها
وردة في جنان لا حد قطفها
ضحكه رنانه إتداوي لحزانى
كيني قمرة تضويلنا سمانا
و على هاك الضحكه حليت عينيا
نلقاها جنبي شادتلي يديا
قالتلي قوم يزيك مالنوم
حبيبك صافاك ورجع اليوم



اضافة رد مع اقتباس



شكرا جزيلا على طول بالك هههههه أنا نفسي ما كنت لأقرأها بدون تشكيل

المفضلات