السلام عليكم
من دون مقدمات لاني ما احبها ولا اطيقها
سلسلة مواضيع خاثره بتاخذ لفه على المنتدى كله واخترت ان ابدا بسواليفي في القسم الديني![]()
هي مثل مسماها مجرد سواليف واخذ وعطى ومافيها تكلف وتعب واتمنى ان مفردات كلامي تكون واظحه![]()
............
(نمنع ونحرم القمار ورهانات اليانصيب و نحللها بالجرايد والتلفزيون !! )
افتح جريدة الوطن ولا الجزيره او اي جريده ثانيه تلقى مسابقه على جوائز خياليه ومطلوب منك فقط ترسل رساله على رقم8*** عشان تدخل السحب !!
طيب تكلفة الرساله هذي كم ؟؟ تقريبآ 10 ريال
و اذا كل واحد دلخ بيدفع عشره ريال عشان يدخل هالمسابقه معناتها ان الجريده كانها تسحب على كروت اليانصيب ( الرسايل المدفوعه ) والرابح ياخذ الفلوس ويمشي !!
واليانصيب محرمه شرعآ ولا فيه اي اختلاف بالمذاهب الاربع على تحريمها![]()
معناته ان هالمسابقه من الاساس محرمه ولو احد فاز ترا الجائزه حرااااام
واستغرب حقيقه من التنك الي يشاركون فيها وهم مسوين انهم وصلو لمرتبة الأنبياء والرسل من التقوى والورع والصلاح ::مغتاظ::
والقهر ان في الصفحه المقابله لهالمسابقه المحرمه فيها مقابله مع احد المشايخ وفيها يحرم مثل هالمسابقات !!
الله لا يبلانا
طيب نخلي الجرايد على جنب ونشوف القنوات
( أتصل على قناتنا لتربح مليون ريال !!! استعجل واتصل على الرقم " 70010؟؟؟؟" )
ويجونك هالتنك كل واحد يتصل وهو يفكر بالمليون والمسكين ما يدري ان تكلفة الدقيقه 10ريال ,, ولو تبوني احلف ان كلهم يدرون عن هالتكلفه بس القلوب صارت ما تخاف من الله :نوم:
المسابقه عباره عن ( خمن من راح يفوز بين فلان وعلان )
يعني مراهنه بفلوس عيني عنك ؟؟![]()
بذمتك وش فرقها عن مراهنات سباقات الخيول والكلاب في الدول الغربيه ؟؟
كلها تراهن بفلوس على متسابق واذا فاز تكسب فلوس .... صح ؟![]()
لكن وش نقول في هالناس ؟؟ ( الله المستعان )
( الشعب كله ثار غضبة على قصه برجس , وسمرمد شارع النهضه بس محد طق خبر مشكلة الزوجات المعلقات !! )
مافيه صغير ولا كبير ولا شايب ولا طفل ما يعرف سالفة برجس و حادثة شارع النهضه وكل واحد يكفرهم ويسبهم ويلعنهم , حتى وصل الامر لناس يقولون لو نشوف الشباب الي فعلو المصيبه بالبنات بشارع النهضه قتلناهم !
طيب يا شاطر انت وياه يالي تخاف على عفة الحريم ويالي تتمنى تكون الحرمه في اسمى مراتب الراحه والطمئنينه ماكلفت نفسك وزرت المحاكم وسألت عن احوال المطلقات والمعلقات ؟؟
يجيك زوح الكلب اطهر منه ما يخاف الله معلق برقبته حرمه لاهو الي كرمها ولاهو الي طلقها وتعيش عمرها مثل القفل الي بدون مفتاح بدون شغل ولا فايده ,, ساكنه ببيت اهلها والعصمه بيد زوجها الي معلقها ::مغتاظ::
احوالهم النفسيه والمعيشيه جدا جدا سيئه ما يقدرون يتزوجون و يكملون حياتهم ولا يقدرون يرجعون لأزواجهم الي معلقينهم ,
مافيه احد صرف حماسته وجهده وعصبيته الي صرفها بحادثتين شاذتين , لمشكله اجتماعيه نعيشها ؟؟
شي غريب ويقهرني بنفس الوقت ,, لكن الله المستعان :نوم:
(الاسلام ملكي انا بلحالي بس ولا لاحد غيري حق به )
بعد ما عشنا لحضات الارهاب والتفجير والتكفير والتغيير
وبعد ما شفنا من يلبسون قناع الاسلام ويقتلون المقيمين بسبب الوانهم وملامحهم
حسيت فعلا ان شعبنا او العرب عموما ماخذ دين الاسلام بالتملك والوراثه
بتسألوني ليه ؟
انا اقول لكم
لما يهودي ولا كافر او نصراني او اي دين ثاني او حتى بدون دين, اتعامل معاه
المفروض مايكون تعاملي معه بالكره والاكراه والبغض![]()
كذا كأنك تقول (لا يزيد من المسلمين الا عيالي )
ياخي انت لازم تكون خصوصا مع الكفار , بأفضل تعامل وموده ولين
انت لازم تعطي دينك الكامل دعايه , أنت لازم تخلي الكافر يحب دينك ويدخل فيه بنفسه من غير اكراهه
بذمتك وشلون اكره واحد واغيضه وبنفس الوقت ابغاه يحبني ويحب ديني ؟.؟
ياخي الدين موب حكر لك انت , الدين للناس جميعا
انت كمسلم من باب رحمتك للناس تتمنى انهم يدخلون بدينك الكامل لينجوا من عذاب رب الناس ::مغتاظ::
مهما كان الي تعامله قدامك هندي فلبيني امريكي ايّن كان دخوله بالاسلام هو مكسب لك انت قبل لا يكون مكسب لدينك
ابتسامه ومزح وسواليف وتذكر له ايه او حديث فيه حكمه وموعضه وهدايه هذا اكبر مفتاح له للدخول بالاسلام
لكن انك تعيش مثل الدلوخ الي ماخذين الاسلام على انه دين بالوراثه ودين العرب فقط
هذا اكبر غلط لذاتك واكبر غلط تقدمه لدينك ::مغتاظ::
لكن وش نقول ( الله المستعان )
( يجوز الكذب والنصب عشان النصيحه )
تذكرون القصه النصبيه عن الفتاة العمانيه !!
بذمتك مثل هالكذبات كم مره تمر علينا ؟؟
والمشكله انها مستحيل تُصدق ::مغتاظ::
واحد مات بخاتمه سيئه وانقلب وجهه لحمار !!
والثاني مات وبعدين حفروا قبره ولقو نار !!
^
^
هذي قصتين كلللللللكم سمعتوها , لكن انا ما قدرت اصدقها ؟
الله خلق الكون و وضع له قوانين من المستحيل ان تكسر هذه القوانين الا بمعجزات الرسل او كرامات الصالحين
لو قلنا النصبه الاولى الي انقلب وجهه لحمار
بذمتكم لو انقلب احد وجهه لحمار ان كان مافيه قناه بالعام الا طلعت صورته![]()
لكن الظاهر الي قال القصه متابع فلم مرعب واثر عليه
اما القصه الثانيه الي لقو بقبره نار
وشلون ياناس نار تشب من تحت الارض ::مغتاظ:: ؟؟
و وشلون الناس شافوها وذكرها الي روى القصه ؟؟
المشكله هنا يا عالم ان الناصحين الي يذكرون لنا مثل هالقصص نيتهم طيبه وهي التذكير , ومحاولة جعل الناس يخلصون ويلتفتون للعباده![]()
طيب يا الي تذكر لنا هذه القصه الكذبيه بذمتك
هل تلجأ للكذب عشان توصل لنا نصيحه ؟؟
لكن وش نقول ( الله المستعان )
--------------------
شكلي طولت صح ؟؟![]()
على العموم هذا الموضوع مجرد سواليف , وكلام طالع من النفس للنفس عن قناعه
لو احد يشوف خلاف ما اذكر يصحح لي وله الأجر , لان الدعوه سواليف خاثره![]()
كتبها لكم محبكم كعكي
لكم خالص التحيات وعميق الشكر




اضافة رد مع اقتباس



ــــــــــــــــف شكــــــــــــــــــــــــــــ

لم اعد اتسطيع الاستمرار
عشان التقي بك في كل وجبة 





المفضلات