بسم الله الرحمن الرحيم
هذه قصيدة قديمة قبل سنوات عديدة
أرجو من الله أن تنال على استحسانكم
العيون والخدود
..
..
العيـون مْسكّتـه والـخـدود مْسكّـتـه
.......... ياسلام اليا كشـف وان تغطّـى ياحـرام
لا بغيت اوصّفـه جـت لسانـي عَكّتـه
.......... كلّ عضوٍ من حبيبي يقول: اسكت ونـام
من يشوفه مات و جنّ الهوى ما فكّتـه
.......... كيف اجل لوهو يشوف اربعٍ حدر اللثام ؟!
جـادلٍ لا شلّـح الثـوب داخـل دكّـتـه
.......... ما بقى جدارٍ من البيت ما صلـى وصـام
فتنتـه مـن ضحكته,الـف عـام بكّتـه
.......... اقطع من السيف وآرق من ريش النعـام
من توصّـت فيـه روس الاسنّـة وكّتـه
.......... وش عليها؟ شيخ والا بعـد تـوّه غـلام
من عذر ثوبه على الردف جـوّد ضكّتـه
.......... حصّل اللي ما حصل لي أنا عشرين عـام
حربـة الردفيـن ثـوبٍ كساهـا شكّتـه
.......... كنّها لا شفتها مـن ورا تضـرب سـلام
دوب بسّ الساق لحظة يمـرّ بـ(سكّتـه)
.......... والله ما يمديه يركض قبـل يـوم القيـام
اشهـد انّـي مكّتـه ان بغانـي مكّـتـه
.......... واشهد انّي بيته من الحجر حتى المقـام
وإكّتي مـا سرّهـا حكمهـا عنـد إكّتـه
.......... واشهد انّه إكّة الحسن مـا فيهـا كـلام
وين والا كيـف قلبـي تلاشـى تكّتـه؟
.......... والغضي عني مسافة (طميّه) عن (سنام)
يسقي الله يوم يقسـم لنـا مـن عُكّتـه
.......... غرب من برّ (الثمامه) وشرقٍ من (خزام)
وسط روضٍ شاة راعي الغنم مـا دكّتـه
.......... صرت أنا والزين مثـل المصّلـي والإمـام
يا حبيبٍ فيـه كـلّ الوصـوف مسكّتـه
.......... فيك قلبي ميّت, وضربـك الميّـت حـرام




اضافة رد مع اقتباس
))
المفضلات