الرباعيات
( 1 )
اشطبي اسمي من جدول الايام
احذفي حروف الصمت والكلام
انسي اني كنت في يوم هنا
ليه عايزه تتعبيني والله حرام
( 2 )
كل شيء بعدك ملوش اي طعم
الاصابه جت ف قلبي والف سهم
اعملي حفلة علي جثة حبيبك
ووزعي بايدك للديابه اللحم
( 3 )
نفسي اكتب كلام ف الحب والغرام
عايز اكون حلم عاشق ف المنام
اطلع قمر واحصد نجوم م السما
نفسي يا حبيبتي اكون وعجز الكلام
( 4 )
النهارده عايز اقولك كلمه حلوه
اكتب قصيده ولحن والف غنوه
اعذريني مش قادر حبيبتي
هربت حروفي ومعني كل كلمه
( 5 )
سافري جوه نبضي وعروقي
ادخلي قلبي ونامي بين ضلوعي
تسوى ايه الدنيا من غير وجودك
وانتي شمس العمر ووجودك ربيعي
( 6 )
عارفه حبيبتي ان الوحده عذبتني
خدت كل فرح يومي وسبتني
ولما حبيت اعاتب او اقول
زرعت جوايا الهموم وغرقتني
( 7 )
كل شيء ماسخ ومر
حاسس ان العمر مر
والحياة مسافره للممات
والجنازه من بابك تمر
( 8 )
ادفنيني جوه قبر قلبك
عايز اكون دايما بقربك
والملايكه لما تحاسبني
ادخل جنتك وافضل احبك
( 9 )
نفسي ابطل شعر وكتابه
الحرف كاسه مر وشرابه
اعمل ايه حد يساعدني
تعبت م الحلم وسرابه
( 10 )
خايف اتوه ف دوامه واضيع
محدش عايز يشتري كله يبيع
وسوق الحياه فاتح مزاده
من فصل الشتا لحد الربيع
( 11 )
خدي مني كل عمري وسنيني
واحلفي انك في يوم ما تسبيني
توعديني ولا الوعد صعب
تعرفي تشقي في يوم وتسعديني
( 12 )
ازرعي في ارضي الحياه
اعصري عطرها واسقيني صفاه
كل لحظة عمر بتمر في عمري
يا حبيبتي من غير وجودك وفاه
( 13 )
الكلام مات وحروف الكتابه
حتي عقلي كل افكاره كآبه
البوم الصور مليان ذكريات
اجمل ما فيها لونه اسود هبابا
( 14 )
الحياة اتبنت علي ايد في ايد
ايد تهد وايد تبني من جديد
والطريق مهما يطول
لازم هنوصل للفجر الوليد
( 15 )
مرجيحه يا ايام وبتمرجحنا
تلعبي بينا وتفتحي جراحنا
راحوا الحبايب بعيد وفاتوني
لدنيا غداره نسيت تفرحنا
( 16 )
فكرتني ليالي الغربه بايامك يا مصر
وقعدت القهوه من الصبح لحد العصر
وبنت حلوه تعدي تهز الارض تحتها
ترقص قلوب ملهاش عدد ولا حصر
( 17 )
الصمت عشش والديار خاليه
والحزن مسجون والدموع غاليه
علي حبيب هاجر وكان غادر
كدابه يا دنيا زي الهدوم باليه
( 18 )
ليه عايزه تفهميني ان حبي معصيه
وان ذنبي اكبر من احتمال كل الانبيا
انا بشر ربي خلقني من ميه وطين
مستكتره علي قلبي يحبك يا رنا
( 19 )
يا مركبي يا مسافره لبلاد بعيده
تعبري الحزن وسط الموج وحيده
مشتاق للقا بعد الغياب والبعد
تعالي يا حبيبتي نبني دنيتنا الجديده
( 20 )
قلبي طفل بيدور وسط الزحمه علي امه
تخدوا ف حضنها بعد البعاد وتضمه
سرقوا مني فرحتي ولبست توب الحزن
تعبت م الوحده وقفلت الباب علي همه
( 21 )
اخر كلامي صمت وأوله نوح
وايه يفيد الكلام والصوت مبحوح
صرخه من قلب مات واندفن
جوه الكفن يقول الكلام ويبوح
( 22 )
افرشوا الارض ورود للشعر والشعرا
حررونا من هم السنين ودنيا بتوجعنا
ماتت حروف الشعر وجفت بحوره
ساكن في بيت الحزن والفرح ودعنا
( 23 )
ملاك زارني في منامي زيارة نبي
نزل عليا الوحي وقالي قوم ابتدي
انشر رسالة الحب والغفران
ازاي يكون والشر جوايا مركبي
( 24 )
ارسمي للشمس صورتك والقمر
يلي جمالك نور في عيون البشر
من اي كوكب انتي يا ملاك
بستان من الحسن ع الارض ظهر
( 25 )
خليني زي حلم جميل في احلامك
ارسميني خط وامشي عليه فأيامك
شوفيني شمس او قمر او كابوس
المهم اكون عايش بحروف كلامك
( 26 )
هاتي ايدك يا حبيبتي وعطريني بعطرها
نيميني جوه عينك وغطيني بنور ضيها
اعبري بيا الطريق انا في حبك غريق
اوعي يوم تنقذيني وغرقيني في بحرها
( 27 )
عارفه حبيبتي ساعات بحس اني ضايع
وامشي في حضن الحواري وليل الشوارع
معايا النجوم وليل الغيوم الف وادور
واهزم هموم وقلبي يكسر كل الموانع
( 28 )
كل ثانيه يزيد الشوق لقربك
رغم كل البعد قلبي يضمك
حاسه بيا يا حبيبتي ولا ناسيه
اني عايش في الحياه بحبك
( 29 )
يا شعر يا سايل من دواية الحبر
اتعقدت المساءله عايزه الحساب والجبر
غربة ووحده وليل طويل من غير صبح
الخلطه دي محتاجه بس شوية صبر
( 30 )
راسي بتوجعني عايزه حباية صداع
وفنجان قهوه وسيجاره تضيع الاوجاع
وطن بيتسرق والشعب بقي نايم
رحت للسوق لقيت كل القيم تتباع
( 31 )
علميني يا حبيبتي كلمة برود
علميني انسي تعاليم الجدود
اعملك ايه تاني يا مصر
هربت منك وعايش برات الحدود
( 32 )
معرفش ليه فقدت احساس الكلام
انكسر في ايدي القلم وحل الظلام
سافرت الشمس لبلاد بعيده
والليل حلف ما يفارق سما الايام
( 33 )
السواد والحزن عنواني الجديد
لو عايز تجيلي اركب السكه الحديد
واسأل عليا السكه والقضبان
خد قطر بحري او قطر الصعيد
( 34 )
يا مركبي يا مسافره لبلاد بعيده
وسط موج البحر ماشيه وسعيده
اكسري مجداف الألم والحزن
وصليني لشط الحياة والدنيا الجديده
( 35 )
الفرحه ما تكتمل إلا بعد العيد
صومونا سنين وفطارنا لسه بعيد
امتي يا مصر تعودي من تاني
الثوره في الميدان ومجلسنا برضه عنيد
( 36 )
مات الكلام والحرف بقى ناقص
غابوا الحبايب والشعر بقى لايص
يا غايب ومش عارف امتي تعود
تعالي تلاقيني مستني هنا وجالس
( 37 )
هلو الحبايب واحد ورا واحد
اصل الدعا كان لربي الواحد
اكتب انا لمين ومين يكتبلي
الشعر انكتب من واحد عشان واحد
( 38 )
القلب جرحه غويط ملوش اخر
عجز فيه الاطبا وجابوا م الاخر
مسرحيه وشخوصها مهرجين
ابعد يا حب بعيد عني واتاخر
( 39 )
سهران لوش الفجر مستني
صوت النجوم وهيه بتغني
عاشقه حبيبها القمر
تقول للفجر ليه تبعده عني
( 40 )
ساعات بشوفك جوه افلام الدراما
قصة حب جميله نهايتها استحاله
انتي بطلة القصة وانا المؤلف
والزمن مخرج الاحداث والروايه
( 41 )
كلام كتير نكتبه مليان بمعاني
مكتوم جوه الصدر ومنه بنعاني
الشعر ايه غير كلمه من شاعر
كتب معانيها وحولوها اغاني
( 42 )
عروسه لابسه طرحتها وفستانها
في الكوشه قاعده يا محلا منظرها
النيل بيجري تحتها والهرم والبرج
عايزه عريس محترم يعرف يقدرها
( 43 )
تعب معانا الشعر وتعبت حروف الكلام
احسن حاجه اعملها اقوم م الفكر انام
السهره كانت جميله والوقت مر سريع
وباقي الكلام ممكن يكمل في حلم منام
( 44 )
مشتاق لكل شارع وكل حاره
وصوت الست وليل السهاري
وقعدت القهوه والشيشه والطاوله
وبنت جميلة معجونه بطهاره
( 45 )
فقدت في رحلتي ابويا وامي
وانكسر جناح القلب وزاد همي
اليتم المه صعب ومين يتحمل
آه يا زمن العجايب بعدتهم عني
( 46 )
لو الحياة بتنتهي مع بعد احبابنا
كنا هجرنا الكون ونسيتنا ابوابنا
اصل الفراق واللقا من ربي
هوه اللي عالم بحالنا واحوالنا
( 47 )
ليه نوقف عقارب الزمن والساعه
ليه نستعمل ضعفنا في الفشل شماعه
اصرخ قبل ما يموت الكلام
لو فشلت في اختراع بيسموه ولاعه
( 48 )
الحزن مش في اللبس ولون التوب
ولا بوقفة انتظار وساعة غروب
الحزن ساكن هنا في الروح
متعود عليه من بدري ووصلني يدوب
( 49 )
ارمي احزانك ورا ضهرك
قومي اتوضي من دموع طهرك
يا ملاك في عمر البراءه
الفجر شق الغيم صلي بقي ظهرك
( 50 )
الحب حب الروح معجون بطهاره
شركة ومتأسسه مفيهاش ربح ولا خساره
مصنوعه لكل البشر من كل جنس ولون
تعبر طريق الصعب من غير ولا اشاره
( 51 )
الحب حب الله والوطن والاهل
حب لذيذ وجميل وكل ما فيه سهل
ليه نعقد فيه ونزيد في الحكايات
كلنا بنحب النبي وبننعل ابو جهل
( 52 )
الحب انتي وانا وقصه مكتوبه
اسم الجميله مصر واسم الدلع بوبا
بعشق جمال حسنها وحضنها الدافي
احلي بنات الكون شهامه وعروبه
( 53 )
عصفور ع الشجر بيناجي عصفوره
ماسك في ايده ورده جميله مسحوره
هما كانوا اتنين والحب تالتهم
والرابعه صياد برصاصه مغدوره
( 54 )
انزف يا جرح الوطن حكايات
ابكي علي حالي غرقني بالدمعات
ضاع الطريق وضعت انا معاه
آه يا وطن معجون بالهم والازمات
( 55 )
مشتاق لمصر و ليالى الفوضى و العشاق
و تاريخ بيعرف يغازل جغرافية الأشياء
و نهار بيرسم ضحكة ملونه و فرحه
و انا جوه قلبك يا سمره تصدقى مشتاق
( 56 )
القلب سلطان وله مملكه
لا ينفع فيها كلام ولا بكي
مين يملك بأيده قراره
ومين يقدر يمنعه م الحب
ده مملكه
( 57 )
في شارعنا كان بيعدي الترام
كنا نقعد علي القهوة بأحترام
لما يعدي عم عبده جارنا
كنا نقف له ونعمله تعظيم سلام
( 58 )
يارا ساكنه معايا في نفس العماره
بنت جدعه زي كل بنات الحاره
لما تخرج في اي ساعه واي وقت
كانت عيونا عليها تحميها بجساره
( 59 )
موبايلك علي طول مشغول
لو سبتك انا غير مسئول
ده كلامك مع كل الناس
ومعايا اعذار علي طول
( 60 )
آلووووووووووووووووو ردي يا بنت الناس
لو عامله مش عارفاني روحي افتحي الكراس
تلاقي حروف اسمي فوق الغلاف مكتوب
انا برضه تاج راسك وعمري في يوم منداس
( 61 )
والله تعبت خلاص دايما يا حبيبي مشغول
من لعنة حبك بتعذب وموبايلك دايما مقفول
غيرت الرقم اللي معايا والتاني اديته لمين
اديتك عمري وايامي بتديني القسوه علي طول
( 62 )
آلووو واخيرا اليوم رديت
وسألتك قلت انا بالبيت
طب ايه كان شغلك عني
متكونش عني استغنيت
( 63 )
يلعن ابو الحب وكل اللي منه يكون
مرض خبيث ساكن وداء كبير ملعون
وجع في القلب دايم وكل يوم مهموم
ملعون ابو الحب وكداب يا امل مجنون
( 64 )
حلوه يا بنت الايه غزاله بريه
بيغير منها القمر والشمس مخفيه
انتي يا بت ايه انسيه ولا ملاك
ولا عروسة بحر يا احلي جنيه
( 65 )
راهب انا في حبك وساكن انا في ديره
وهبت ليكي عمري وسرقتي مني خيره
ملعون ابو الايام يوم ما اتحرم منك
وازاي اعيش في يوم حياتي من غيره
( 66 )
واقفه ليه يا عقارب الزمن
لدغتك سامه ووحدي بدفع التمن
كل ما داوي جرح يتفتح غيره
وانتي سبب جروحي يا
woman
( 67 )
الف وش ومليون قناع
لبساهم حبيبتي يوم الوداع
وضحكه صفرا ع الشفايف
وكلمة مخنوقه وقلب باع
( 68 )
الحروف والسطور بلون غيابك
السواد جوه عيني بيشوف عذابك
يقولك ارحمي قلب عاشق وحسي
يا قلب جاحد والله خساره عتابك
( 69 )
الخيانه طبع ولا جينات ف دمك
اديتك كل عمري وانت اديتني همك
خلاص كل شيء انتهي وراح لحاله
انا مش نبي ولا يسوع عشان اسامحك
( 70 )
الدنيا زي الارض دواره
كل شيء فيها بقي تجاره
سعر البني ادم فيها صفر
مين يشتريه مني بخساره
( 71 )
كل الصفات فيا حلوه ومقبوله
بس المشكله في الحب لسه سنه اولي
خجول وبغرق في شبر ميه
ولما شافوني الناس قالوا معقوله
( 72 )
شاعر وبكتب شعر فالحب والحكايات
ولما حبيت بنت وعملت ابن ذوات
راحت وفاتتني معرفش برضه ليه
بس اللي انا اعرفه خايب مع الستات
( 73 )
واقفه علي شباك البيت وفارده شعرها
ام العيون السود الورد نايم علي خدها
لمحت بطرف عيني خجل العيون السود
حسدت شباك بيتها وقلت يا بخت اهلها
( 74 )
عاشق انا خطوتك وماشي وراها
وفين ما ترسي مركبك ارسي معاها
صدق اللي قال الحب حلو ومرار
حبك يا بت خد روحي مني وصباها
( 75 )
ارسمي الحزن طريق واعبريه
امشي فوق المستحيل واوصليه
خلي كل شيء عادي وطبيعي
انتي شابه وبكره حلو هتلاقيه
samir






اضافة رد مع اقتباس


المفضلات