هبالنا أنا وأختي
البطلات طبعاً أنا (كاوايي) أنا توني مخلصه ثانويه ومقرره هالإجازه أمضيها كلها هبل و ينون (جنون) وحالفه لا احول خواتي ال2 الأكبر مني مثلي هههههه >يعني مهابيل ههههه
وأختي (عصقوله) << طبعا َ الأسم مرقع من عندي >>اللي بحولها مثلي وهي باديه تصير مثلي شوي (جهدي لم يضع سدا ههههههه) عمرها 24 يمكن <<< مدري والله
المهم الحلقه الأولى
20 من رمضان (تخبيص في كيكه النسكافيه وبالاوينا )
بعد الفطور رحت فوق اصلي وتسدحت شوي أنا وكرشي قامت (عصقول ) تأشرلي براسها على الدرج اللي قربي
قلتلها : وش ؟؟ <<< مسويه نفسي مب فاهمه عليها بس استهبل خخخ
قالتلي : وطاياج >> وطايايا(نعولي) اليدد مالات العيد كانن محطوطات على الدرج
أنا : وش ؟؟!
عصقوله : ليش حاطتنهن هناك ليش ما تظمينهن؟؟
أنا : ولله كنت بموووت من النوده وحطيتهن هني قلت العصر يوم أقوم بظمهن بس العصر رحنا تحت وهكذا ومر الوقت << انا من أحط الشي مكان مستحيييل ارد اشله
عصقوله قعدتت تتشوفني(تناظرني)
أنا : وش بسم الله علينا ؟؟ يالله روحي طرشي الدكان حق اسوي كيكة نسكافيه <<< مامصدقه اول مره عصقوله بطرش الدكان عني ههههههه
ترا أنا سالفتي عند الدكان سالفه إذا بغى حد شي من الدكان يقومون ينادوني أنا عشان اطرش الدكان حتى لو كنت راقده (نايمه) وحتى لو كنت اتسبح و حتى لو في نص النهار ولا نص الليل وحتى لو كنت في المطبخ عندي شغل وحتى لو كنت ما ابي شي من الدكان يعني عاد خلاص لاعت جبدي من هالحاله لاه وبعد يوم أجي بطرش الدكان أسألهم : وش تبون من الدكان ؟؟
يقعدون يتراصدون (يناظرون بعض) ويفكرون سااااعه وكأني سائلتهم سؤال صععععععععب مره أو كأني أتكلم بلغه ثانيه <<ياخي أول اعرفوا وش تبون بعدين نادوني دامها السالفه جذي
المهم قمنا ونزلنا تحت وقعدت عصقوله ساعه لين طرشت الدكان طلعت روحي قبل لا تطرش
عصقوله بعد طلعت الروح : وش تبين من الدكان ؟؟
عاد أنا فرحانه : دريم ويب و شوكي شوكي و قشطه وبس
ورحت عنها المطبخ قعدت اخبص فذيج الكيكه أونها كيكة نسكافيه .. وبعدين يت عصقوله ويايبه عندها السامان
أنا قلتلها : سوي الكريما <<< اوني عاد أأمرها >> فرحانه بنفسي ما صدقت عاد حد يعطيني وجه
عصقوله تتشوفني بنظره من فوق لتحت وتقول : بتخليني افعص الشوكي شوكي فوق الكيكه >>>>> آخر خطوه في الكيكه نحط شوكي شوكي فوقها
أنا كنت أبا اسوي الشوكي شوكي الروحي بس عاد وش اسوي خليتها هالمره عشان تفكني وتسوي الكريما عني ونخلص بسرعه ونلحق عالمسلسل
أنا بدون نفس : انزييييييييييين بخليج
عاد هي ماصدقت على نفسها قامت تسوي الكريما عشان اخليها تفعص الشوكي شوكي هههههه
وهي قاعده تسوي الكريما وأنا قاعده أغسل يديني
أنا : أول شي حطي النسكافيه في القشطه خليها تذوب بعدين حطي الدريم ويب >> وقاعده اتفلسف يعني
عصقوله ما ردت علي كانت مركزه تخلط في ذيج الكريما ويوم قربت منها وشفت الطاسه شهت لقيتها حاطه كل شي رباعه (مع بعض) وقاعده تخلط فيهن
أنا : ><عصقوووله ما قلتلج خلطي النسكافيه عند القشطه اول وبعدين ليش حاطه ظرف واحد من الدريم ويب ما يسد لازم كلهن
عصقوله و هي تخلط وتتشوفني وتشل طاستها بعيد عني : تحيديني ما يعيبني الأسراف
أنا : تسمعوا انتوا ياعيني عالإقتصاديه ..... اقول الكريما ما بتسد بحطهن كلهن
وأخذ الكريما أبا احطها
تقوم عصقوله تصارخ علي : لا لالا لاتحطينها أنا ما تعيبني اللعبه ... اليوم ما بتحطينها
أنا طنشتها وبطلت الظرف وحطيته في الطاسه قامت هي ودزت الطاسه صوبي قالت: سوي الروحج عيل يوم جذي ما تعيبج اشواري
وراحت و وقفت قرب الثلاجه أونها زعلانه ههههههههه
أنا : سوووووووووو ... احسن زين خلج بعيد
وقعدت اخلط فيها واقبوا(أزن) على عصقوله
أنا : شوفي الحين كيف صارت معقده والنسكافيه ما ذابت زين و و و كله هذا بسبتج
قامت هي تتشوفني من عند الثلاجه تمثل انها تتشوفني بنظرة حقد بس ما تعرف هههههههههه
المهم انا خلصت بعد ما كبيت نص الكريما فوقي وحطيت الباقي في الثلاجه
أنا : الحين لازم نترياها لين تتجمد ... اقول يوم تينا (دبدوبه)>>(أختي اللي متزوجه قريب ) <<بنقولها تي تتمشى عندنا برا حلو والله بتتذكر ايام اول
عصقوله حست اني بقولها الحين قومي نروح نتمشى برا عشان جذي راحت بسرعه وقعدت << عاد مافي احد اعيز عن عصقوله
قلت أنا : قومي نروح نتمشى برا لين تبرد الكريما
عصقوله قعدت ماكنها ما تحركت أونها ما تبا تقوم بس انا ما خليتها في حالها رحتلها وقعدت امططها وقولها يالله قومي قومي وقامت اخر شي وهي تتمخطر ما تبا تروح قمت انا ادزها من ظهرها وامشيها غصب وبعدين مسكت كتوفها وقعدت اهزهن يمين يسار يمين يسار و أقول : أيوه عاشوووو رووح رووح ...
اونها ترقص ههههههههههه بعدين بطلتها يوم طلعنا من المطبخ قلتلها يالله نمشي راحت هي تمشي تبا تروح البيت داخل مسكتها انا قلتلها : مني مني الدرب أنتي وخشمج يالله بسرعه قدامي
ولفيتها والحمد الله آخر شي مشت ... كان المكان ظلااام وأنا امشي وأستهبل ارفع يديني فوق مثل العصفور
وأقول : عصقوله رفعي يدينج جذي بتحسين انج طوير يطير في السما(والهبوب كانت تهب)
عصقوله حطت يدينها على خصرها أونها عاد تمثل انهار رزينه هههههههههههههههههه
المهم مشينا شوي وقعدت أنا أغني
أنا : ياعيوني ياعيوني (وأصفق بيدني ) يا قلبي يا قلبي (واصفق بيدني )
فجأة تحركت النخله اللي قربنا الهبوب هبتها
أنا تروعت(خفت) قلت (أوني أكلم النخله ) : خلاص خلاص بسكت >> انهبلت البنت
المهم و لتفتت لقدامي و وصلنا آخر البيت عند الباب الخلفي قامت عصقوله تمشي سيدا صوب الباب
قلت أنا : وش رايج نوايج من الباب بس بنوايج مره وحده وبس (يعني نطلع روسنا ونتشوف برا )
وقبل لا اخلص كلامي إلا واشوف مقفى عصقوله تمشي سيدا صوب الباب وتطلع من الباب برا وأنا ابقق عيوني @@ << حشى ماحست حد يقولها خلا نطلع وأنا عاد مع الخيل يا شقرا يالله وراها شو روانا
أنا : الله حلو المكان ظلاااااام محد يشوفنا عادي لو طلعنا بلا شيل محد بيشوفنا << أنا كنت طالعه والشيله في رقبتي وشفت عصقوله لابسه شيلتها
قلت لها : فري(ارمي) شيلتج محد هني هههههههه << قاعده اوس في راسها
هي طنشت وقعدت تقول : ألله المكان هني حلو وهادي تذكرين يوم كانت خيمة العرس(عرس دبدوبه) مركوزه هني
أنا أوني عاد حطيت شيلتي على كعكوعتي من ورا وخليت قصتي برا قلت محد هني مب لازم الشيله عاد >> راحت الطواعه
أنا : اقول المكان مظلم محد يشوفنا وش رايج نروح نربع(نركض) ونتسابق هناك ونرد >> وقاعده اتبسم اتخيل اشكالنا نتسابق حن وكناديرنا و شيلنا تهبب ههههههه
عصقوله : هكوا هندي ياي
لتفتت وإلا واشوف هندي يمشي من بعيد عاد مب بعيد وايد يعني بعيد شوي بس
أنا قلت : عادي بيحسبنا هنديات ههههههههههه (وقعدت اتحلطم هندي بصوت عالي مادري وش اقول ألفت من عندي ) آري باري ماري انقري قارا مارا لاروي بجا << وقعدت اخبص
عصقوله : ههههههههههههههههههههههه بخبر عليج أمي
أنا سكتت وقلتلها : ليش؟؟!
عصقوله : بقولها أنج قاعده تغازلين الهنود
أنا : ههههههههههههههههههه والله .... يالله خلينا نروح داخل
رحنا نمشي صوب الباب و أنا أقول : أووه نسيت بقول للهندي يجي كل يوم العصر هني بيلقاني فوق النخله أترياه ههههههههههه >>> ترا انا كل يوم العصر اركب النخل اخرف والنخله طويله راسي يطلع برا البيت في الشارع هههههههههه <<< هاذي سالفه بروحها يبالها حلقه كامله
المهم رحنا عند الميلس وسمعنا صوت اليهال يلعبون داخل
قالت عصقوله : خلينا نروح نروغهم مناك عن يلعبون بالكيك والعيشه
ورحنا أول شي قعدنا نسوي صوت قطاوا عشان نروع(نخوف) اليهال أوننا قطاوا يتهاوشن عاد أب صوت عليه اوني انا القطوه العوده المعصبه اللي غالبه وعصقوله القطوه الصغيره الرقيقه ههههههه
المهم اليهال ما تروعوا هم و اشكالهم إلا يو عندنا بعد يوايجون يتشوفون من يسوي الصوت عاد حن غيرنا الخطه وطلعنالهم وهشنا عليهم وشردوا ودخلنا الميلس لقينا هناك كيك قعدت انا اتشوف الكيك وأتسرط رويت من زبادي ههههههه ولتفتت لعصقوله وأشوفها إلا شروايه
بعدين قالت عصقوله : لا لالالا ممنوع تاكلين منه يالله برا
أنا : بس بذوق وحده...بس وحده <<< و أوننا رايغين العيال عن ياكلون منه قامت عصقوله تروغني أنا ههههه
عصقوله : لا يالله يالله قدامي رحنا مني
المهم رحنا وسوينا الكيكه وكلينا منها ولاعت جبودنا منها وحطيناها في الثلاجه ورحنا داخل نتابع المسلسل ولقبناه مخلص المهم وخلصت سالفة كيكة النسكافيه
وش رايكم بالحلقه الأولى ؟؟؟
اكمل باقي الحلقات و الهبال ولا ؟؟؟




(والهبوب كانت تهب) 
اضافة رد مع اقتباس






..



المفضلات