السلام عليكم ورحمة لله وبركاته
كيفكم إن شاءلله بخير واتم عافيه
حبايبي بتكلم بكل أريحيه بدون العناء لإختيار الألفاظ
بخلي الالفاظ المستعصيه عليّ بالتفكير الطويل تجي
مع الوقت وانا اقولكم اللي في قلبي
لاني إنسان اكره النفاق شوي
فياليت يعني نترك الترتيبات والمظاهر
يعني مثلاً شعور النقص في شئ من الاشياء يجعلك تكمله بشئ لايمت للنقص بشئ
مثلاً نكتب وبعدين نجعل الكتابه لها لون ولها شكل ونحط لنا صور ومدري ايش
حركات صراحه انا اشوف اللي يعجب بها مايعجب بالموضوع نفسه قد مايعجب بحركات الالوان
والترتيب والصور وشكل الكتابه
يعني بعضكم لو يهتم بالموضوع أكثر وبطرحه حيزيد في إثرائنا أكثر
وعندي شئ بعد حاب اقوله
وهو للبنات احذركم من المكياج اول شئ وش بتستفيدو منه
زياده جمال لاولله بالعكس انا بنظري وصدقوني اني صادق إنه زياده امراض وغش
كافي غش وخداع
يعني بنظري انا اشوف المكياج واستثني الحنا والكحل وبعض الاشياء الصغيره المتعارف عليها
في قمه القبح
يعني انت ِ تمكجيتي على اي اساس
مثل الناس صح
طيب مو لازم كل الناس تسوي شئ انا اسوي مثلها
لازم قبل نحكم عقولنا نحكم الشريعه اللي تنص بأن الناس وكثرتهم في الفعل
ماهو معيار للصح من الخطأ
ف ارجو ياخواتي ياحبياتي انكم تنقذو أنفسكم من هالنفاق والمظاهر الكذابه
بعدين انا ماني عارف ليش ماتعرفون ان بعض هاللي تحطونه في وجيهكم مسرطن
ميه بالميه
ومو لازم يظهر بين يوم وليله
لا
حيظهر ولكن مع السنين
ومو شرط السرطان
ممكن يدخل في امراض كثيره مثل الجلديه وغيرها
ومو شرط المرض يظهر في الوجه
لا
حيظهر بمكان ثاني قلنا مو شرط
وبعدين الجمال الحقيقي اللي الله اعطاك إياه وربي العظيم انه في قرة عين لاهلك واقاربك
بس لو كانو على الفطره اما اذا كانو عكس ف إلى الله المشتكي
ارجوكم كافي تقليد وغش وخداع
الناس اخرتها في القبر
والنظافه اهم شئ في القلب مو عشان الناس
وبعدين سمعنا حنا المثل اللي يقول اليس مايعجب الناس وكل مايعجبك
مو كل مثل دارج بين الناس صح
بعض الامثال كذب في كذب وبعضها تسطح بعقول البشر اكثر
وتخليهم عميان ع اللي يسووهـ
وهذه من الجاهليه اللي ماعرفناها في زمن الرسول صلى الله عليه وسلم
اللي كانو اهم ماعليهم يلبسون اللي يستر عوراتهم
الله واكبر عشان النفط والحياه الرغيده اللي نعيشها هاليومين قمنا نتكبر ع النعمه
ياناس اظهرو بالمظهر المحتشم والنظيف وفقط
مو لازم البس اللبس اللي يعجب الناس
كم مره بنت طلبت من اهلها عشان مناسبه الشئ اللي مايقدرون عليه
كم مره زوجه ورطت نفسها واسرتها وزوجها في الديون عشان هالمظاهر
طيب بعضكم يقول والناس اللي تلبس مثل طيحني وهالملابس الغريبه على مجتمعنا
ويقولون شوفو واحد يدعمنا
انا دوبي تكلمت عن ستر العورات وهذه الملابس تفضح العورات اكثر من ماتسترها
يعني الجنز ومشيناها وبالقوة لكن طيحني ومدري ايش هنا نوقف ونقول لا
فيه شئ بعد ودي اكلمكم عنه وهو الحياء
فيه ناس ماتعرف تفرق بين الحياء والخجل ف انا اقول ياليت كل واحد مايعرف الفرق يقرا عن معانيهم
عشان لايندم كل مره خجل ولايندم انه ماخذ حقه
طيب والأخلاق
بكلمكم فيها
لان الأخلاق شأنه طويل طويل كثييييير
ليه لأنه بحر
واللي يتكلم بالاخلاق لازم يسوي بحث عنه عشان يعطيكم اياه
مو مثلي اكلكم ارتجالياً
المهم ماراح اعطيكم فضائله ابداً ابداً
لان بعضكم يعرف احاديث وادله وووو اكثر مني
انا بكلمكم عن اللي يتخلق بالاخلاق الحسنه عشان يوصل لهدفه وبعدين يظهر بمظهره المعفن
اقوله اصحا ولازم تفهم ان هالحياه سهله على امثالك لكن لابد حقيقتك ماتظهر قدام الكل
حتى لو مدحوك قدام الف واحد وقالو اخلاقك كويسه وانت من جمبها
الله بيفضحك يوم القيامه
ياخي اجتهد وخل أخلاقك حلوة
ومين قال ان الاخلاق صعبه لاماهي صعبه
خلها ديدنك ولازم تصير في يوم من الايام طبعك
صفي نيتك وخلها لوجه لله
كافي نفاق ومظاهر كذابه
وسالفه بعد
لحد يحسب ان قدوته مالها زلات
لا القدوه لازم يزل لانه بشر ومن فينا مايخطي قولوله كذاب
ومو لازم يطيح من عينك
انت لو كنت في موقفه يمكن يوم من الايام تزل بزله اكبر منه
القدوه حنا ناخذ منه الصح ونترك الخطا
مثل العالم بالدين او العالم بالتكنلوجيا او بأي علم
ناخذ من الصح ونترك الخطأ
لان الله عطانا عقول نحكم بها صح ولا لا
اصحو ياناس هذا جهل كافي جهل عندي اشياء كثيره ودي اقولها لكم
لاني ولله تعلمت من هالتجارب ماقول اكثر منكم بس تجارب كافيه اني اقول هالكلمتين
المتواضعتين مني
بس خفت اني اثقل عليكم ويقولون ثرثار
بس ولله انا عصبت من هالواقع ومالقيت غير هالمنتدى واللطفاء أمثالكم يعلموني إن جهلت
وكل واحد الله لايهينه يقول من بعض المظاهر والنفاق اللي حاصله هاليومين من كل شئ
اذا كان في باله ولايخلي في نفسه شئ وياليت مايكون متكلف على نفسه باللغه الفصحى
يعني مو مشكله فصحى مع عامي عشان لايتكلف على نفسه
بالله ياشباب وياشابات اي واحد بيتكلم يقول اللي يقهره في هالواقع
عشان نسوي مع هالموضوع حمله توعيه للناس عل وعسى الله يفيد
لان ولله طفحت روحي من هالمظاهر اللي بأخرتها مع ذلك محد مرتاح
عشان نكون بسطاء في طرحنا وافكارنا وبسطاء في تعاملنا
اجل بالله كيف تبون ترجع القلوب بيضاء وصافيه اذا استمرينا
بدون مانحارب هالأفكار الجاهليه ؟
اضافة رد مع اقتباس
..~
..
..
~>
..
!!
المفضلات