السلام عليكم ورحمة الله وبركاته
اتوقع الموضوع مفهوم من العنوان
واحب إني اوضح بشكل آفضل
ثقافة العيب هي فكر موجود من زمان عند العائلات المحافظه بوجه الخصوص واغلب العوائل بوجه العموم
كان في الماضي يعني خرق البنت أو الولد للعادات او الاعراف المتوارثه في العائله الوحده
كان الولد منا يخاف انه يطلع عن شور ابوه ومايتزوج بنت عمه اللي ابوه يبيه يتزوجها
ويخاف يتزوج بنت يحبها لو ماكانت بنت حسب ونسب
وكانت البنت منا تخاف انها تكلم ولد الجيران مع انه يحبها ويبيها وماكانت تسلم له او تأمن له
والمتزوجه تخاف تطلع عن شور زوجها وماكانت تقدر تنطق بكلمة ( طلقني )
هالكلمه اللي صار الكل يقولها بمناسبه او بدون
كان الكل يخاف انه يمس اعراف او عادات وتقاليد اهله بشي يعيبها
هالشي ماكان في الدين بس مجرد افكار موجوده في العايله ومحد قدر يكسرها
الا فئه قليله من كل بيت ينعدون على الاصابع .
واحين في الحاضر
الولد صار :.. يكلم بنات ، يغازل ، يرقم ، يلعب ، يروح يشرب ، يدخن ، يطلع طلعات مشبوهه
وفوق هذا نلاقيه لعب بشرف مليون وحده
واهله شادين فيه الظهر ومفتخرين فيه ولدهم وعزوتهم
بيزوجونه بنت عمه العفيفه الشريفه
مجرد سؤال
احين هالبنت خايفه ربها صايمه ومصليه وعافه نفسها
يقوم هالانسان اللي ماعنده اخلاق ولا ضمير ويتزوجها ؟
ماتحسون ظلم ؟ وان المعادله مو متساويه ؟!!
انا اتعجب من الاهل اللي لو شافوا ولدهم يكلم بنات الناس وعادي عندهم
قالوا طيش شباب ومشوها
بس لو عرفوا ان اخته تكلم شباب بتروح فيها رقاب !
والله استغرب
ليش العفّه صارت مطلوبه من البنت بس ؟
ليش الناس تشوفها عادي ان البنت العفيفه تتزوج واحد له ماضي غير اخلاقي ولا يشرف
بس عشان مافيه دليل ملموس على ماضي الولد خلاص بتمشونها ياعالم
والبنت مهما فعلت ومهما ندمت ومهما كانت نيتها صافيه ماتسامحونها وتعايرونها طول عمرها
ليش التفرقه هاي بس
رب العالمين لما أمرنا نقطع يد السارق قال الكل ومافرق وقال الولد غير والبنت غير
ولما قال ان الزاني والزانيه عقابهم الرجم او الجلد بعد مافرق في العقوبه
( الفرق الوحيد ان البنت لما تنجلد تكون قاعده عشان الستر وهاي رحمه من الله )
بس مافرق في العقوبه ولا عدد الجلدات
لو كانت العلاقات العاطفيه المشبوهه مذمومه في عينكم على البنات
طبيعي لازم تكون مذمومه على الشباب بعد
يعني لما تعاقبون البنت بعد عاقبوا الولد نفس العقووبه
رب العالمين مافرق شلون الناس تفرق ؟؟!
لما الاب يخاف على بنته وشرفها من الشباب
ليش مايخاف على بنات الناس بعد من ولده اللي يلعب ويلهى وعايش حياته على حساب غيره !
والشي اللي يحز بالخاطر جد ان الولد يلعب ويلعب ويظن انه ضيع شرف البنت بس
مايحسب حساب نفسه وان ضيع شرف نفسه بعد وضيع عفّتها
هالشي مو مادي طبعا نفس البنت لكنه نفسي والنفسي أثره مايزول لآخر العمر
بعدين شلون غاب عن باله ان اللي يسويه في بنات الناس الحين وهو مغمض عينه وحاط خط احمر على اخته
راح يكون له مردود عليه بس في اخته عشان يحترق قلبه نفس ماحرق قلب غيره << كما تُدين تُدان
وهاي اللي صاير عندنا فعلا
الولد لو كلم بنت قالوا يمزح او يحبها والبنت قالوا مو محترمه وماتعرف السنع
الولد لو حب وحده قالو طيش شباب والبنت قالوا حرام وحرموا عليها عيشتها
يعني انا ما اقول ان كل البنات فيهم هالطيبه والرومنسية والحلم
فيه بنات صايعات ضايعات جد والله يهديهم
يكلمون الولد عشان غرض الكل يعرفه
وبعضهم يتسلون
لكن انا اتكلم عن هذيك اللي حبت
يمكن غلطت ايه
لكن ليش اخوها لو كلم وحده ومثل عليها ولعب وسوى وسوى وسوى ماحد يقوله شي ؟
ليش هي يقولون لها واخوها لا ؟
انت ياللي تخاف على بنتك ورا ماتخاف على بنات الناس ؟
ترا مثل ما انت عندك بنت تخاف عليها حتى اللي ولدك يلعب عليها عندها اب يخاااف ويتقطع قلبه عليها
وانت ياللي مسوي فيها خايف على اختك وعندك غير وبطيخ
كان بديت بنفسك اول وغرت على اعراض المسلمين قبل ماتغار على عرضك انت ( يأمرون الناس بالمعروف وينسون انفسهم )
في النهايه احب اقول ان مو كل الاهل جي
طبعا ياما شفت امهات وآباء ينحطون على الراس والله
لاشاف ولده يكلم بنت عطاه العين الحمرا وقام يربيه من اول ويديد
لين ماخلاه يمشي على الصراط المستقيم
مافرق بين ولده وبنته وقال حق ولده العب وبنته ملزومه تكون محترمه
الا لزم كل عياله بدون تفرقه بالعفّه
انا بس ابي اعرف ليش اغلب الاهالي ولا بعضها مايطالبون الولد بالعفّه نفس مايطالبون البنت ؟
يمكن محد راح يعرف لو الولد شريف او لا
بس هاي شي نفسي وبينه وبين ربه رايح يكون مرتاح ويريح ضميره
