~~~ إشــــرآقــــآتـــ ~~~
بكتب هذا الموضوع لأني سرت اكره التفكير بالمستقبل .. بضيع وقتي في الحلم
في شيء ما املكه راح يجي في المستقبل وانسى حاضري ويومي اللي انا
عايشه اللي هوا بين يداتي واملكه .. احس نفسي كل يوم انسان مختلف
عن اليوم اللي قبله .. يوم اكون في قمة الطموح .. ويوم اكون في قمة اليأس
ويوم اكون واضع هدفي نصب عيوني زي مايقولوا .. ويوم انسى هدفي ايش كان .. بنسبالي
صباح كل يوم وانا بفرش اسناني هذي اللحظات اعتبرها قمة الابداع عندي
تجيني افكار وتخطيطات خنفشارية واعاهد نفسي اني راح اسويها كلها
واخرج وكلي حماسة بتطبيقها و اول ما امشي مع تيار اليوم ومجرايته
انسى كل اللي فكرت فيه وتدور الايام على هذا المنوال
في مثل انجليزي رائع يقول
to be significant just be your self
بالفعل لما اشوف نفسي في موقف اني انا كنت نفسي وماكنت اي حاجة ثانية
يكون هذا الموقف من احلى المواقف واحس فيه بثقة رهيبة .. مجرد ماغير
في نفسي عشان شخص ثاني كل شيء يتخبص واحس نفسي ضايع
ممكن الواحد يتنازل عشان شخص ثاني إيثارا ومحبتا لكن يتنازل عشان
يكسب وده هنا يكون الخطاء ..
قرأت كتاب The Secret
كتاب فيله حكم رائعة جدا .. وبجد لما قرأته زاد ايماني بالله وانه قريب
يجيب دعوة الداعي اذا دعاه وانه عند ظن عبده فيه .. وايقنت بكلام خيرالانام
انه تفائلوا بالخير تجدوه .. بس طبقت اللي قرأته اسواء تطبيق .. نسيت
انه من اركان الايمان انه تؤمن بالقدر خيره وشره .. اتمسحت كلمة
شره من دماغي .. صار اللي في بالي انه كل اللي راح اوجه في حياتي
هوا خير وبالفعل هوا خير .. لكن انحصر معنى كلمة خير في ذهني
انه شيء سعيد ومفرح دائما .. والخير هذا مش كله سعادة وفرح
ممكن يكون ابتلاء واختبار ما يطيقوه البشر ومايقدروا يتجاوزوه
الا بدعاء العالي مش بذكائهم او قدراتهم .. تبهدلت
الين ما اينقت هذا الشيء والحمدلله ماكنت راح اعرف هذا كله بعد فضل الله
لولا الابهدلة هذي ..
تعبت من كثر ما بجلد ذاتي .. بطبعي صبور وحليم لكني نسيت اني بشر واعتقدت
انه عندي صبر سيدنا ايوب وحلم سيد البشر عليه افضل الصلاة والسلام .. سيدنا ايوب
صبر لكن في النهاية نظر نظرة للسماء وقال ربي انت شايف ايش اصابني من شر
وانت ارحم الراحمين .. وسيدنا محمد مافي احلم منه استحمل اذى قريش
وقلة عقلهم وادبهم مع نبيهم الين جاء يوم وهوا ماشي من قدامهم
وقاعدين يتريقوا كعادتهم .. قالهم كلمة هزتتهم كلهم : لقـــد جئــتــكم بالذبـــح
الصبر له حد والحلم له حد .. الواحد يصبر على قد مانفسه تستحمل
ولا يحمل نفسه شيء هيا ماتطيقه .. والواحد يكون حليم مع الناس
لكن ان زودوها لازم يحسمها ..
انا مخير ولا مسير ؟؟!! سؤال كثرة التفكير فيه تخلي الواحد قليل العلم والفهم ممكن يلحد
ميزة اسلامنا انه نحنا مطالين بإعمال عقلنا مقارنة بالمسيحين اللي عندهم
رهباينة ابتدعوها وغيبوا عقلهم وفهمهم .. جاوبني على السؤال هذا الدكتور محمد العوضي
واجابته ماسجلتها في اي مكان لأني مش ممكن انساها ولا اقدر انساها
اجابته تنفع لكل زمان ومكان اجابة راح اقولها لعيالي وعيال عيالي ان شاء الله
يقول الدكتور: هنالك ثلاثة افعال .. الانسان مسير في فعلين ومخير في فعل واحد
الثلاثة افعال هما كتالي: فعل فيك و فعل عليك وفعل منك .. فعل فيك
مثل الهضم والتنفس والدورة الدموية ويقاس عليها هذي كلها امور نحنا مسييرين فيها
وهذي نعمة عظيمة جدا انه نحنا مسيرين فيها وليس الخيار بيدنا ..
الفعل الثاني وهوا فعل عليك .. مثل لا سمح الله وانتوا قاعدين مكانكم
تسقط لوحة عليكم والا السقف يسقط مثلا ولا اي حاجة تجي عليك
وانت ما لك الارادة والخيار في دفعها عنك ويقاس عليها برضو وهذا فعل نحنا مسيرين فيه..
الفعل الثالث وهو فعل صادر منكم انتوا .. تبغوا تاكلوا تفاح ولا بطيخ
تبغوا تناموا على ظهركم ولا على جنبكم .. تبغوا تقرأوا كتاب
ولا ماتقرأوا تبغوا حسن خاتمة ولا سوء خاتمة ويقاس عليها .. حسن الخاتمة
وسوء الخاتمة يعتمدوا على قرارتنا وصفاء نياتنا في اعمالنا..
------>