كبسولات صغيرة لرفع الهمة

بسم الله الرحمن الرحيم
وبه أستعين
أطبع الموضوع ده لو عندك برينتر واقراه على رواقه لكن لو ماعندكش برنتر أقرا أي نقطة تعجبك
تلخيص كتاب الدكتور إبراهيم ألفقي
قوة التحكم في الذات
تلخيص بواسطة : فارس العدالة
3/هـ كلية التجارة جامعة القاهرة



العلم كالكنز من تعلمه ولم ينشره كمن أخد الكنز ودفنه تحت الأرض ومن نشره كمن أستثمر كنزه
............... فارس العدالة


قبل ما ابدأ في أي جزء من أجزاء الكتاب أنا لخصت الكتاب على هيئة نقط للتنفيذ يعني أي واحد بيقرا الكتاب الخاص بالدكتور إبراهيم ألفقي همته ترتفع بس لفترة يوم مثلا كده يعني لكن في المقالة دي أنا عملت تلخيص للكتاب في نقط للتنفيذ وده هيخلى المده تبقى أطول

الجــــــــــــــــــزء الأول

1- دايما خاطب نفسك وقول الحاجة الي أنت حاسس أن فيها نقص عندك أو اللي أنت عايز تبقى عليها يعني قول مثلا أنا قوي أنا ذكي أنا اقدر اعمل الشئ الفلاني وتقول الكلام ده وانت على اقتناع أن ربنا أدالك كل حاجة والي عملها قبلك مش زايد عنك رجل ولا أيد وحط دايما العبارة دي في بالك
لا حياة مع اليأس ولا يأس مع الحياة
يعني لما الواحد ييأس هو كده مات وعلى سبيل المثال في قصة خاصة بفيل قوي جدا الفيل أسمه نيلسون جابوه حديقة الحيوان وربطوه بسلسلة آخرها كرة حديد كبيرة وكل مرة كان نيلسون بيحاول يفك نفسه من السلسلة ما يعرفش لغاية ما الفيل ده يأس ورضي بحالة راح الراجل صاحب الحديقة غير الكرة الحديد بخشب ففي يوم من الأيام جه ولد صغير سال ليه الفيل مش عارف يحرر نفسه من قيده مع انه باين عليه قوي رد عليه المدير إحنا عارفين انه هو قوي بس هو مش عارف انه هو قوي وهو برمج نفسه سلبيا
فمتبقاش زي الفيل نيلسون وتيأس

2- سواعي الواحد يبقى خايف من حاجات وبيتصرف على أنها هتحصل بنسبة 100% يعني مثلا بيقول أنا لو رحت عند دكتور الاسنان هيستخدم الجهاز الفلاني
والدراسات أثبتت أن 93% من الحاجات السلبية واللي بتخوفنا اللي بنتوقعها مابتحصلش وال7% اللي باقية حاجات غالبا الإنسان ملهوش دخل فيها زي الموت او حالة الجو كده يعني

3- البرمجة الذاتية سلاح ذو حدين ... فهو يساعدك أنك تحقق أحلامك وممكن يخليك تقتل أحلامك بنفسك
وكل ما يخطر على بالك فكرة سلبية مثلا أنا مش ها قدر اعمل كذا ... طب أصل هو أتولد في عائلة غنية مساعداه و أنا لا .... أصل أنا تعبان ومش ذكي ... كل ما يخطر في بالك حاجة زي كده تعطلك عن تحقيق هدفك ألغيها وبدلها ببرمجة إيجابية .... أنا أقدر أعمل كذا أنا مهما حصل هوصل لهدفي كده يعني

4- دايما ردد ما تريد أن تكون عليه باقتناع تام أن ربنا أدالك كل حاجة تقدر توصلك للي أنت عايزه وان اللي وصلو قبلك مش أحسن منك
يعني مثلا قول أنا أحسن سباح مثلا كده يعني

5- راقب أفكارك لأنها ستصبح أفعالك
وراقب أفعالك لأنها ستصبح عاداتك
وراقب عادتك لأنها ستصبح طباعك
وراقب طباعك لأنها ستحدد مصيرك
لو قعدت تفكر في حاجات سلبية كتيرة هتلاقي نفسك اكتئبت لكن لو فكرت في حاجت بتفرحك هتلاقي نفسك مبسوط ولو فكرت كتير في واحد قرفك في موقف معين هتلاقي نفسك عايز تروح تضربه
ففكر دايما بطريقة إيجابية وتذكر أن لكل مشكلة حل .

6- بفرض انك شديت مع واحد صاحبك أو أي حد في الكلام وسبتو بعض .... ما تقعدش تراجع شريط اللي حصل وتعمل حوار مع ذاتك وتقول أنا كان المفروض أقول كذا ......بعد شوية ها تلاقي انك بتكره الشخص ده لفترة مؤقته لغاية ماتعدي فترة الزعل

7- في ناس وأنت ماشي كده تلاقيها بتتكلم مع نفسها أو بتشاور بأيدها الناس دي بتبقى تحت ضغط كبير جدا ولا شعوريا بيلجأوا للتفريغ عن الضغوط اللي جواهم بس في طرق تانية أحسن وحلوة وتختلف من واحد لواحد .... يعني مثلا لما يبقى الواحد مضايق الرياضة أحسن حاجة تطلع الضغط العصبي اللي على الواحد علشان كده لازم ممارسة الرياضة وفيه ناس بترتاح لما تسمع قران وفي ناس لما تسمع الاغاني اللي هي بتحبها
بس لازم تفريغ الضغط علشان ده بيودي لحصول لامراض القلب ولارتفاع الضغط والسهاري الكدابة دي كلها

8-قال العالم الألماني جوته ( أشر الأضرار التي ممكن أن تصيب الانسان هو ظنه السئ في نفسه ) ولما الواحد يظن في نفسه بشكل وحش ده بيأثر على حياته بصورة تجعله مقصر في اداء واجباته
وهناك حديث شريف يقول
(لا يحقرن احدكم نفسه )


9-تعرف هأقولك على حاجة حلوة انت تعرف تتحكم في برمجة نفسك ليه تعرف ليه لأن البرمجة من العقل الكمبيوتر بتاعك ومحدش مالك لعقلك غيرك وبالتالي أنت الوحيد اللي هاتعرف تتحكم في افكار نفسك .

10- العقل كالحقل والأفكار التي نفكر بها هي بمثابة الري لهذه الأرض فان كانت الأفكار سلبية فأن ما ستحصده هيكون سلبي ... يعني مثلا
مينفعش تفكر في حاجة سلبية وتقعد تضحك .... يعني مثلا لو واحد مهم جدا ليك مات أكيد لو قعدت تفكر فيه النتيجة أنك ها تعيط
فدايما خلي الماء اللي بتروي به حقلك إيجابي


نختم الجزء ده
كيفية البرمجة الذاتيه
لما تاجي تعمل برمجة لنفسك لازم تتبع الأتي :


- يجب أن تكون رسالة واضحة ومحددة
-----------------
- يجب أن تكون رسالة إيجابية
-----------------
- يجب أن تدل على الوقت الحاضر يعني ماتقولش أنا هابقى كويس لأ قول أنا كويس
-----------------
- لازم يكون عندك احساس بقوتك وقدرتك على القيام بهذا الأمر
-----------------
- يجب أن تكرر الرسالة عدة مرات حتى تتبرمج



أنا عايز أعرف أرائكم في الجزء دهhttp://www.shtegara.com/forums/image...s/36_17_11.gif لأنه يهمني رأيكم جدا http://www.shtegara.com/forums/image...teiloveyou.gif
ولسه في جزء تاني

السلام عليكم
اختيار موفق أخي الكريم
ونحن في انتظار الجزء الثاني
الله يعطيك العافية .

أعجبني هذا الموضوع

وخاصة هذه الجملة :

- راقب أفكارك لأنها ستصبح أفعالك

وراقب أفعالك لأنها ستصبح عاداتك

وراقب عادتك لأنها ستصبح طباعك

وراقب طباعك لأنها ستحدد مصيرك .

(لأنها ستحدد مصيرك ) هذي جملة قوية بالنسبة لي

حلللللللللللللو كتير الموضوع ده

هو فعلا لما بقرا كتاب الدكتور ابراهيم الفقى بتحمس جدا بس لفتره محدود

بس انا استفدت من موضوعك