ناقش..&* تحب التخميس والسرعة الجنونية ؟ ادخل عندي سؤال لك *&
**السلام عليكم ورحمة الله وبركاته**
:
:
:
كيف الحال؟
عندي أسئلة موجهه لمحبي رياضة(التخميس) هذا إذا كانت تعتبر رياضة!!:
ليش معظم الشباب يحبون يمارسون( التخميس)في الشوارع؟
هل هو نوع من التمرد؟! أم للمتعة ؟
أم للفت الأنظار والأستحواذ على إعجاب الحاضرين اللي ماشاالله قايمين
بالدور وزيادة من تشجيع وهتافات وتصوير!!
آنا عندي فعائلتنا أشخاص ما شاالله عليهم مشهورين بالفريج بهالسوالف
لا وبعد مصورين بالفيديو والشباب يتناقلوه فهواتفهم !!
ولما يصير عرس تلاقيهم يجهزوا سياراتهم مو عشان الزفة..لاااا .. عشان (التخميس)!!!
لأن ألحين صارت الأعراس من أشهر المناسبات لتجمع الشباب وممارسة هالرياضة !!
هاي هي الموضة اللي صايرة ألحين!!
يعني فالسابق كان في الأعراس تقام الرقصات الشعبية
ألحين صارت السيارات ترقص بدل الرجال!!!
وأول ما يسمعوا أن الدورية خذت خبر باللي قاعد يصير ..
على طووول يبدأ مشهد الهروب وكل واحد يركض يخبي سيارته فمكان !!
ليش كل هذا؟!
ليش لما تمارس هالشي ما تفكر بنفسك؟!
تخيل لا سمح الله السيارة انقلبت وحياتك انتهت فجأة وانت فعز شبابك وبعدك ما ادخرت شي لآخرتك!!
سؤال أخير :
ليش وانت تمارس هالإستعراضات الطايشة ما تفكر ولو للحظة بوالدتك أو والدك أو أهلك؟؟
..شو بيكون حالهم لو فقدوك للأبد بسبب لحظة طيش؟!!!
