انـــــــا بــيــئـــــــه طــــحــــــــــــن!!!!!!!
السلام عليكم
انا كنت قاعد فى البيت كده مع نفسى وكنت قاعد قدام التليفزيون
قاعد بقى وبتنقل بين القنوات وقعدت اعيد وازيد فيهم ييجى عشرين مره
بصراحه بقى ما فيش اى حاجه كويسه احنا مركبين وصلة علشان قنوات ايه ار تى الرياضيه
علشان متابعة المباريات الاوروبيه ومباريات الاهلى طبعا
المهم وانا بقلب رايح جاى جات قناة الاغانى ولسه هاقلب لقيت اتنين بيقولوا
احنا العيال البيئه الطحن
قلت ايه ده بيهزقوا نفسهم ليه
لما اسمع لقيت سعد الصغير بياع البلح وريكو تقريبا صبى بياع البلح
المهم انا بصراحه مش بسمع مثل هذه الاغانى لكن ما انكرشى انا بسمع لناس تانى تكون محترمه
و تكون الكلمات معقوله مش بلح وعنب وعسل وسمك وجوافه والفاكهه وكده
المهم بقيت بسمع لقيتهم فرحانين جدا وهما بيقولوا احنا العيال البيئه الطحن على غرزة تلاقينا وعلى عربية فول
برضوا تلاقيهم
المهم قلت فى نفسى هما دول اغبياء ما دخلوش مدارس ما اتعاملوش مع حد خالص
مش عارفين ايه معنى كلمة بيئه
وايه معنى انى شخص يقولى اننت بيئه
قلت يمكن انا مش عارف معنى كلمة بيئه
المهم سئلت اخويا الكبير قلتله ايه معنى انى شخص يقولى انى بيئه
قالى يعنى انت مش متربى وقليل الزوق وكلام تانى ما ينفعشى اقوله
قلت ايه رايك بقى فى اللى بيقول انه بيئه
قالى بطل تسمع الحجات دى وانت مش هاتسئل تانى
قلتله طيب
المهم
انا بقول للشباب اللى بيسمعوا الكلام ده انتوا ليه مش بتعقلوا الكلام اللى بتسمعوه
ولا انتوا كل همكم الطبله وبس
عاملين زى الاجانب لما بيغنى عمرو دياب هما مش فاهمين حاجه
بس بيسقفوا وبيرقصوا
احنا بقى فاهمين وعارفين هما بيقولوا ايه
ومع ذلك بنلاقى الاغانى دى فى كل مكان وكل كاسيت عالى
كل اللى عايز اقوله
انى ربنا خلقلنا عقل نفكر بيه ونعرف نفرق بيه
بين الاخلاقى واللا اخلاقى بين المعقول وغير المعقول
ربنا يهدينا ويهدى كل شبابنا
