\\\ متى كانت آخر مره جربت فيها شئ للمره الاولى ؟؟؟\\\
بسم الله الرحمن الرحيم
السلام عليكم ورحمة الله وبركاته
أذكر آخر مره أكتشف شي للمرة الاولى
كان ركوب القطار كان عمري يمكن 16 كان شعوري ما ينوصف وكنت متحمسه جدا بس المشكله أني ما اتحمست الا قبل الرحله بيوم والي ذكرني اني لازم اتحمس سائق التاكسي الي ركبنا معاه باليوم الي سبق ركوبي للقطار لأني سألته كم تبعد مدينه فينسيا عن روما بالقطار قالي كم المسافه بعدين سألني هل هي رحلتك الاولى بالقطار قلت ايه قال بتكون رحله متميزه!!
تذكرت وقتها أني بجرب او بكتشف شي للمرة الاولى وكان شعور رائع ومازالت محتفظه برسومات رسمتها ل سيده كبيره بالسن بجانب ا حفيدتها كي أتذكر الوجهين الي كانوا أمامي طوال الرحله .
أذكر مره كنت راجعه من جده للرياض وكانت بجانبي فتاه تزوجت حديثا وكانت بتنتقل للعيش بمدينه الرياض وكانت رحلتها الاولى بالطائره يالله ماشاء الله بترصد احساس اول مره تركب الطياره انا بصراحه نسيت كيف كان شعوري اول مره اركب فيها الطائره لأني ركبتها اول مره وانا عمري شهر واستمر هذا الشي الي عمري الحالي فما اتذكر ابدا كيف كان شعوري لكن البنت الي كانت بجانبي كانت تسألني كيف بتطير الطياره كيف الاحساس يخوف كيف وكيف وكيف قلت لها مهما شرحت ماراح تفهمين كلها دقائق ونقلع
حلو شعور تجربة شي للمرة الأولى
بس المشكله ان الانسان بكثير من الاحيان ينسى كيف يرصد احساسه بتجربة الشي للمره الاولى وكانه شي مفروغ منه ولا يستاهل لحظات من التأمل
الحياة صاخبه جدا لدرجه تنسينا هذه الاشياء الجانبيه الي ممكن تهم ناس معينين يحبون العزله والتفكير العميق لكنها صدقوني مو حصر لهم
أذكر قريبتي الي ساكنه خارج المملكه أغلب حياتها كانت توصف لي كيف لما شافت الكعبه للمره الاولى وكيف أنها فمهت جمله (( مافي أي كلام ممكن يوصف شعوري ((
أحس ان شعورها فعلا ما ينوصف لما الانسان يشوف بيت الله الحرام لأول مره وهو انسان بالغ شعور اكيد لايمكن وصفه
نقاط خارج الموضوع الاساسي دائما اتساءل
كيف كان شعور أديسون لما أكتشف الكهرباء هل كان شعوره عادي لأنه هذا الاختراع كان يفكر ويعمل فيه من سنين وكان شي مفروغ منه انه بيوصل لنتيجه ما بيوم من الايام
كيف كان شعور الطيار الي أسقط القنابل النوويه على هيروشيما مع أنه شي مروع لكن كيف كان شعوره هل كان زي شعور أي احد مكلف بعمل ما او انه شعوره ما ينوصف وعلى فكره هذا الطيار انتحر
كيف كان شعور أول رجل مشى على القمر كيف كان احساسه وهو يمشي على القمر
القمر الي كان لكل الناس وياما نور ليالي وياما كان محور حديث حبيبين او مصدر وحي لكاتب او كان بدرا تلك اليله عشان يرسمه رسام ما
في أشياء كثير أكيد ما جربناها
بس الاهم أننا نتوقف ونتذكر أننا في صدد تجربه شي للمره الاولى
والله متعه
هي صحيح متعه مؤقته وممكن تنتهي بسرعه لكنك بتذكرها بيوم وبتبتسم ويمكن تستفيد منها ب حلو أن يكون للواحد مخزون من التجارب والذكريات ومهما كانت التجربه صغير ه وتافهه نبقى شي مميز وبتجربه للمره الاولى
متى كانت آخر مره جربت فيها شئ للمره الاولى ؟؟؟
في أمان الله
