تحياتي لكم يا اخوتي الصغار ..اندليس تيرز تحييكم ..
موضوعي اليوم عن المظاهر الخداعه !!
ظاهره و انتشرت ..تشوف الشكل في وادي و ما في القلوب و النفوس يختلف عن الشكل ..
خلوني اعطيكم مثال ..
تشوف واحد بلحيته الي شوي و بتوصل سره و طاقيته على راسه و كندورته القصيرة ..و المصباح ما يفارق ايده ...طبعا الي بيشوف بيقول مطوع !! لكن لا يغركم الشكل .. تتفاجأ يوم تشوف تصرفاته .. عيونه تفتكر في الادمي تقول ما شاف ناس في حياته و ان كانت الي خاطفه حرمه ... بيتفحصها من ساسها لين راسها .. و تعال تقرب منه ..حرام لا تفطس من ريحته !! الحين هذا شو تطوع او يتمصخر !!! صدق يشوه صورة الاسلام بشكله !!
وتعال عند الحريم ..خلوني اتكلم لاني شفت و عشت مع هذي الفئه المنافقة !!
تلقاها قطعه سودء .. متحجبه و تلبس نقاب و دراغ و قفاز و لا يبين شي منها غير عيونها تقول نينجا ..وتعال اسمع رمستها ..حرام انها تحش في ناس ..ولا ان شافت بنت مب متنقبه او متمكيجه تكرها تقول البنت جاتله حد من هلها ..
و الي يقهر تيلس تقول للبنات لا تسون جيه و لا تقولون جيه و هي من ورى تسوي !! واهمالها لنفسها و نظافتها تكفي !!
خلوني اعطيكم سالفتين على الماشي ....... اذكر بنت ويانا في الدراسه ..شو تنصح البنات و تقلهم لا تسمعون اغاني حرام .تغشوا لا تبينون مفاتنكم و غيره من كلام !! و الكل تعيب من الحفله الي سوتها لعرسها مادري ملجتها !! بدال الفرقه فرقتين و اللبس ...خلوه هذا على صوب !!
اما عن السالفه الثانيه ..فهذي وحده متزوجه و عندها عيال و كل يوم تلقي محاظرات للحريم ! ____(موضوع المحاظرات هذا بروحه يباله موضوع عندي كلام كثير عن المحاظرات الي يسونها )_____ نرجع الى محور حديثنا !! المهم الحرمه قامت الا ترابع و تلقي محاظرات و كانت دائما استغرب يعني انتي تلقين محاظرات دينيه و ما تعرفين ان في النظافه و الاهتمام بزوج و البيت و غيره من واجباتج وان الاسلام يحث المرأه بان تسوي هذي الواجبات لبيتها و زوجها .. !! المهم الحرمه اهملت كل شي علشان شو !! تلقي محاظرات ..و في النهايه عيالها الي ضاعوا و زوجها تزوج غيرها !!
قبل لا انهي موضوعي ابغي اذكر نقطه ثانيه .. ان النقاب اصبح موضع شك و خوف عند البعض ..يعني و بكل صراحه اندليس تيرز تخاف من المنقبات !! من كثر ما نسمع و نشوف ..الحراميتا يتنقبا و الريايل يتنكرون بالنقاب و الغش و الخداع من ورا هذا النقاب !! وحتى الساقطات البطاليات يتنقبا و يدخلن الفنادق ولا تلقاهن في الشيشه يشيشن !! والله يستر !
تحياتي
اندليس تيرز
