بيضة ديناصور في صحرائنا! خبر جديد.. (التفاصيل بالداخل)
بيضة ديناصور في صحرائنا! خبر جديد.. (التفاصيل بالداخل)
القصة:
كنت في يوم من الأيام اتمشى في شوارع الرياض .. ومريت على مطعم بخاري وأكلت رز بخاري جاب لي الهم!!
وربي أغتثيييييت منجد!!
المهم قلت اطلع برى البلد يا شيخ .. منجد الرياض بلد عمل وزهق بالحيل!
ورحة للثمامة << الجود من الموجود!
طبعاً كان معي الرانجلر حقي.. وكانت ماشي 110 عشان ما يزعجني صوت العداد اذا مشيت بسرعة 120!
وبدون تنده أكيد .. والسيستم اللي ركبته معرووووف..
والله ما زدة عليكم يا جماعة الربع أن الرمل يتراقص ويشكشك من قوة الصوت!
نسيت اقول انه الوقت كان ببداية طلوع السفر!
وانا اللي بقدرة قادر .. لقيت نفسي جوى البر!
وانا اللي افتح اذاني زين .. ولاني مشغل إغنية:
مسافر .. والرمل يرقصون :D
المهم قلت ايه والله نطعس شوي كود الرجه اللي ترجني وتخليني مثل البيجر اهز هز من هالسيستم والمطامر من التطعيس يفكنا من غثة الرز البخاري :p
المهم يوم شوي ولاني على كفرين .. وأشهق! أخو العياااااااال!
واجود الطاره .. والله اني اطالع الطريق بطرفة عيني!
يمين يسار .. ولاني مهجد الموتر تهجيد .. وطرقاع عالرمل وثب!
واطلع واقف من المرتبه .. واقول باعلي صوتي:
وجججججججججججع
وشذذا تصدز!
ذا مهوب رمل! هذا شين عجيب وغريب .. رفسني رفسه خلتني على كفرين الله مير يكفينا الشر!
وامشي يمه واحفر والاقي شين تسنه قطعة رخام!
قلة هااااااه وشاللي جابهم منا حقين الرخام! ماحولك قصووووووورٍ أبد!
واحفر ولانها منحنية هالقطعه!
تخيلتها بوابة القصر :eek:
وشوي .. ولاني راجع على ورى ومذعور من اللي شفته واكتشفته!!!
تخيلو!! بيضة ديناصور!!
وربي اللي نزل سمى ورفع أرض .. فتحة بوفيه بجنب البخاري يصلح أحلى شكشوكة بالرياض :p
النهاية
بقلم بندروفي
