ياصاحبي وشفيك قلّي عسى خير
تشكي وانا خابرك رمز الشجاعة
ان كان حاديك الزمن والمقادير
الصبر للرجال يعطي مناعة
اسمع وخذ مني نصيحه وتذكير
ذرب الكلام اللي يفيدك سماعه
صوادف الدنيا ورود ومصادير
وافضل كنوز الوقت كنز القناعة
اللي كتبه الله على عبده يصير
صبراً جميل ودبرة الله مطاعه
مادمت من روس الرجال المشاهير
مايرتخي راسٍ شمخ بارتفاعه
بكره تبي تلقى العوض فالمخاسير
تاصل حبال الوصل عقب انقطاعه
العافية تسوى كنوز الدنانير
والرجل دايم نجدته من ذراعه
صكات بقعا لانصنّك طوابير
خلك كما ضلعٍ تقانب سباعه
شامخ شموخاً ماتهزه معاصير
لو هو محاصر بالخطر كل ساعه
صلف الهوا ماشدد طويق والنير
والحر يقدم والرعاعه رعاعه
ساير زمانك وانتبه تعكس السير
وسمح الجناب اللي يراعيك راعه
ربعك حزامك فالليال المعاسير
صدرك عليهم لايضيق اتساعه
قد قالو اللي يحكمون التعابير
ترى يد الله مع يدين الجماعة
حذراك دينك لايجي فيه تقصير
لاضاع دينك ماش غيره طماعه
ابليس لو زيّن دروب المحاذير
أبعد عن اللي مايجوز اتباعه
عقب المنيه ماتفيد المعاذير
واللي يطيع ابليس ماله شفاعه
اشر الرفيق اللي يعينك على الخير
وبيع الردي فالسوق بيع البضاعة
لازم يجي من صاحب السوء تاثير
يدوّر اللي يخشره في ضياعه
اللي يحمل المسك ماينفخ الكير
ومجالس المقرود ياخذ طباعه
كم من كبيرٍ بالعقل عمره صغير
وكم من كبير ... بعقل سن الرضاعة
لاتستشير الا حكيم التدابير
رجلٍ تفيدك خبرته واطّلاعه
العاقل يشاور هل العرف ويشير
وكلاً على ماقيل حسب اقتناعه
الطيب يبدي فالوجيه المسافير
يبدي كما نوراً توهج شعاعه
يشفيك حراً لانهض كنه الطير
الطيب مزروعٍ بقلبه زراعه
في طلته تلقى السعد والتباشير
واليا نخيته قال سمعاً وطاعه
تلقى الكرامه عند ريف الخطاطير
وتلقى اللكاعه عند راع اللكاعه
مافالبشر مخلوق من غير تقصير
مير القيام يكون بالاستطاعه
واليا ظهر سرك لو يقال في بير
تراه مابه بير من غير قاعه
يبدي ويبدي به من الناس تزوير
حيث ان بعض الناس مثل الاذاعة
يصبح كما جمٍ ملته الغثابير
ويمسي طعام مروّجين الاشاعة
الظلم ظلمه في وجيه المعاثير
مايفلح الظالم ولو طال باعه
يلقى الجزا لو عقب طول المشاوير
سواة ماسوّاه واعظم شناعة
من دعوة المظلوم احذرك تحذير
اليا رفع لله كف الضراعة
يجيب ربه دعوته دون تاخير
وابو قناع يبين خافي قناعه
راع الحسد لو يندفع يمك مغير
عنّز على الله واتركه باندفاعه
كل الصعاب بعون ربي تياسير
من يتكل بالله ومَن كل راعه
قدمت لك عن واقع الحال تقرير
ببيوت شعراً فيه فن وبراعة
صدرتها من صافي الفكر تصدير
وحقوقنا ماهي حقوق الطباعه
وختامها مني تحية وتقدير
شاري خوي الطيب ماعاد باعه
