كلهم بيحطوا يابني ! "سحر المكياج" و"فتنة الوجه"
بواسطة
في 15-03-2018 عند 04:46 (729 الزيارات)
تنبيه :: : الموضوع كتبته وانا بالفجر وانا يمكن مخرف من اول امس .. وكنت اكتب بنصف وعي .. بعدين حذفته .. وفكرت اعيد عرضه .. لو اول تعليق كان انتقادي او فيه هذا السمايلات : -_- او << يقهرني مرة .. فانني ساحذف الموضوع مجددا .. لأني عارف الموضوع بايخ .. لكنه بالنهاية شيء انكتب استخسرت اكبه بالزبالة ::
السلام عليكم ورحمة الله
ما انكر اني كنت خجول وبحالي .. وبالجامعة ما كان ليا علاقات مع زميلاتي .. قصدي علاقة زمالة او صداقة او حتى دراسة .. لأني كنت مغترب .. وكلية الطب بطعها تعيسة خصوصا اول سنتين لما كنا نتعامل مع جثث ومواد معقدة هذا غير مشاكل اللغة واحساس الواحد الدائم بالفشل ..
كمان طبيعة "طالبة الطب" واللي معظم الطالبات لهم شخصية مترفعة .. يعني هي داخلة طب عشان هدف واحد وهي انها تكون طبيبة من الناحية الاجتماعية "الدكتورة راحت والدكتورة جات" .. وانها تكون اعلى وافضل وهذا حقها ..
طبعا في بنات طب غلابة لكن اكلم عن العموم .. وبالعكس هدف جميل ان الانسان سواء ولد او بنت انهم يكون لهم طموح ويرتقوا بنفسهم .. لكن انا ما اشوف ان الأمر ذو أهمية عندي ..
المهم كان تخيلي ان البنات وجمالهم درجات .. وان مثلا اللي كاشفة شعرها ولابسة ستايل احلى من المحجبة .. وان فيه بشرة صافية وغير صافية .. وكل هذه يمكن تصورات ..
لكن مع مرور الزمن وتخرجي وتعاملي مع آلاف البشر بحكم مهنتي .. لأنك كطبيب بوحدة صحية تقريبا حيمر عليك كل البشر وحتشوف العجب ..
طبعا كان لازم اعود نفسي اني اتعامل مع أناث الإنسان حتى أقوم بمهمتي .. مع العلم ان معظم المرضى من النساء وعيالهم .. لدرجة ان ظهرو الرجل نادر ..
طبعا من كثرة المرضى وخناق الستات مع بعضهم شفت الجانب المخبف والعجيب اللي دمر صورتي ..
صورتي بان كل الإناث لطيفة وجميلة ومهذبة .. طلعوا مثلنا احنا الرجال ويمكن انا خاف منهم اكثر ..
مع الوقت لقيت نفسي صوتي يبقى عالي .. وطبعا تعلمت التغلب على لسان الأنثى الطويل والمراوغ ..
يعني مثلا اللي مهملة طفلها وتقول انها تعطيه الدوا لكن عرفت كيف اكشفها امام نفسها واكشف التخبيص والإهمال اتجاه اطفالها .. وبعدين اعيد اقنعها ..
واللي تشتكي ان بطنها يحرقها وكل ادوية الدنيا ما تجيب نتيجة .. وتنكر انها اكلت شيء .. لكن اتعلمت كيف اخليها تقع بلسانها ويتضح انها اكلت دجاج بالسمنة البلدي وارز ومخللات وشطة وبالنهاية تقول ان هذا اكل عادي .. لا وفوق ذا العلاج جربته من شهر لأنه خلص .. ومن هذا كثير ..
في من المرضى اللي تسمع الكلام والعلاج يجيب نتيجة .. وفيه اللي تقول الحقيقة .. وما تقاطعك ..
وفيه اللي دائما تشكك بالعلاج وتروح لعدة دكاترة .. وترفض التعليمات البسيطة زي عمل كمادات للطفل اللي حراته مرتفعة .. او تجنب أطعمة معينة او الراحة ..
والواحد يحاول قدر الإمكان ينصح وينشر الوعي الطبي .. لكن الواحد يكتشف ان كلامه بالهواء ..
وطبعا المرىض يتخانقوا كل واحد عايز يدخل .. فأضطر اني أكون حازم وانظم دخولهم بالدور .. لأن احدة المريضات تتخانق مع الممرضة وتتحول الغرفة لفوضى ..
:
المختصر : تحطمت الصورة الخيالية لطبيعة الإناث .. طبعا في منهم طيبين لكن اقصد اني اعتقدت انها خلقت كمخلوق لطيف وكذا .. لكن هم معذورين ومرضى ولازم اتحملهم ..
وتبقى مسألة جمال الشكل وتحديدا الوجه ..
ومن المثير للسخرية اني انتبهت لهذا مؤخراً .. كنت اعتقد ان المكياج هو بس تلوين وكذا .. لكن ما توقعت انه يغير معالم الجلد تماماً ..
بمعنى اننا بالتلفزيون او لو بالشارع ممكن تشوف بعض الاناث كان بشرتهم صافية .. لكن اتضح ان جلد البشر بشكل عام ملئ بالبثور والتعرجات .. وان كل المسألة هو كريم أساس وأسمنت وحديد ..
انا زمان اسمع عن كريم أساس ومواد تجميل لكن ما كنت مركز ..
لما ركزت مؤخراً اتضح انكم يالبنات كلكم مثل بعض وان اللي يحلي البنت جودة المستحضرات ..
يعني هذا البريق اللي نشوفه مش ان جيناتها او جمالها وراثي .. ابداً .. هو كل مافي الأمر انها ازالت أشياء وغسلت اضياء .. ووضعت أشياء .. وشعرها وضعته بطريقة معينة ..
كمان زاوية الصورة .. لو صورت نفس البنت من عدة زوايا .. حتكتشف 3 مستويات للجمال .. واحد منهم جذاب .. وبقية الزواية لاعلاقة له بها ..
كمان وقت الابتسامة يبدون بأفضل حال .. لكن لو بدون ابتسام حتكتشف ان شكلها عادي ..
:
الموضوع سخيف طبعاً عشان كدا حطيته بالمدونة ..
لكن عندي تساؤل ؟!
انا لما كنت اغض بصري وكنت خجول تخيلتها مخلوق بمنتهى الجمال ..
لما بقيت اشوف اكتشفت انها عادي شكلاً ..
فهو فين الفتنة بالموضوع ؟! طبعا اقصد من ناحية الوجه ..
يعني اشوف ان الوجه للأناث ليس جميل بل اشبه بلوحة جلد فارغة .. ويمكن ما تختلف عن الرجل كتير ..
ولو تأملت رأس الأنثى بدون شعر .. أشوفها شكلها غريب ..
هو الشعر اللي ماسك بالراس ذا هو اللي معطي شكل جمالي ..
والمكياج هو طبقة زائفة ..
يعني لو كان الوجه جميل لما احتجتم لتجميله ..
:
طبعا بقية الجسد ممكن اعتبره الى حد ما فتنة .. لكن الوجه عادة هو محط النظر الأول .. وكنت اسمع انه أكثر الأشياء فتنة ..
:
كمان انا لما اغض بصري اتخيل البنت احلى .. انظر لوجه الإناث عموما حولنا استغرب .. بل يمكن اعتبر ان بعض الشباب اكثر وسامة او لهم ملامح ..
يعني الامور ماشية معاي بالعكس ..
هل ممكن لأني اعتدت التعامل مع البشر كأنهم مرضى .. ولأني اعتدت اشوف عيوب الانسان .. او لأني شفت جثث وناس تموت امامي اثناء محاولة اسعافها ؟!
هل انا مخرف يعني ولا انا طبيعي .. قلت اسألكم ..
ولا يمكن لأني شفت بنات الانمي اللي هم أحلى فما عاد يعجبني شيء ..
ولا انا وصلت سن اليأس ..
ما أعرف ..
:
حالياً انا بطلت اتخيل .. وبطلت انظر .. وبطلت اغض بصري او اطلقه ..
لأن جهازي العصبي اعتاد على تجاهل الوجوه ..
وأصبحت لو شفت بائعة ابعد عن المنطقة .. أحيانا تجدوا بنات يروجوا بقسم المكياج .. طبعا معجون الأسنان جنب قسم المكياج والعطور فأنا اتسحب واطنش .. مش خوف ولا خجل .. يعني الموضوع مزعجني وخلاص ..
لكن لو بائعة فلبينية او جنسية غير عربية ممكن ما اشعر بالانزعاج اني اسألها عن شيء او اتعامل معها .. لأن الفلبينيين يتسمون بالاحترام والهدوء والكلام .. يعني تحس انك تتعامل مع آليين وكدا ..
اما البنت العربية كبائعة فطبعاً ما أحس بارتياح اني اتعامل معاها مباشرة .. في غيري يستانس .. زي مرة شفت راجل تفاعل مع مروجة بالهايبر ماركت عن مسحوق غسيل لحد ما جات مراته استعجل ..
طبعا انا مش ضد ان البنت تشتغل في المبيعات والترويج لكن ما يعجبني وضع المكياج بهذه الحالة .. وبالمناسبة هذول البنات مساكين لأنك لو شفت رئيسها كيف يحاسبها ويكلمها "ليه ما بعتي كثير اليوم .. لو استمر الوضع كذا حنمشيكي ونجيب غيرك" .. غير انهم يعيشوا يوم بيوم لن مكسبهم من النسبة وواقفين ساعات طويلة على رجلهم .. وهي مضطر تبتسم وتستخدم بعض جاذبيها الأنثوية لإقناع العميل .. يمكن اتعاطف معاهم لكن لما اشوف وحدة فيهم ما اريد اشوف وجهها اطفشششش .. والف من ناجسة ثانية اخد اغراضي او اعمل نفسي ما اشوفها من الأساس ..
ولما مثلا اشوف موظف او موظفة فانا أرتاح للموظف اللي من بني جنسي .. خصوصا بالبنك او الاتصالات او أي شيء .. احس انه مريح اكتر ..
طبعا في المنتدى فأقصى درجات الانحراف عندي اني أعجب بصورة رمزية لعضوة "هذا آخري" :: .. لا تشبيك ولا بطيخ .. وانا عندي مجلد لاطش فيه صور ورمزيات كيوت مش مهم مين صاحبتها المهم الصور عندي .. مع اني شايف ان ذوقي تفوق على ذوق البنات بالنسبة للصور ولم تعد رمزياتكم تثير انتباهي حالياً لأني بقيت خبرة في الحصول على صور انمي فائقة الجودة من مصادر أخرى .. لكن ما انكر انه ببداية دخلوي المنتدى كنت ألطش عشرات الصور من ملفاتكم ومراكز رفع صوركم وكنت اعمل نفسي متخفي ::منتهى اللقافة::