.:GENERAL:.

من ضمن الأشياء المستفزة على كوكبنا "الناموس" او تحديدا أنثى الناموس "الناموسة" .. يعني تمص دم الواحد نقول ماشي .. تسبب حكة مزعجة نمشيها .. ​لكن مش كل كم دقيقة وعرض مستمر لطوال ساعات النوم ؟!!

يعني ليه الناموسة ما تأخذ كل احتياجاتها من الدم مرة وحدة وقرصة وحدة وخلصنا ؟ يعني خلاص خذي اللي تريديه وفكينا شوية ! مافي عندها فعلا دم أو إحساس او مراعاة ..

الواحد بيكون تعبان ومش عارف يقوم عشان يدور الناموسة ويقتلها فأقول لنفسي أصبر لعلها تتوقف .. لكن تستمر وتستمر لحد الصباح وأقوم وحالتي حالة ..

:

المستفز أكثر اني اغطي نفسي والبس جوارب طويلة .. لكن في نوعيات ناموس تخترق الملابس وكمان الغطاء ؟!! يعني عندها ذكاء انها تقف على القماش وتمص الدم .. لاحظت هذا في أحد الأماكن اللي نمت فيها .. لكن في ناموس ما يعمل كدا ..

احينا اغطي نفسي بالكامل بس اترك فتحة تهوية عشان ما اتخنق ... الا الناموس يدخلي من هذه الفتحة .. وعندها تعلمت اني اعمل زي فخ اترصد دخولها واصفعها ..

معاناتي مع الناموس علمتني كيف اتصيدهم .. لما الناموس يقرصني وانا نايم فأنا عارف فين حينتظروا .. غالبا بيكونوا على الجدار بجانب السرير .. فباستخدام كشاف نور صغير او لمبة الجوال احدد مكانهم وطخ ..

طبعا اغسلوا ايديكم بعدها ..

الناموس فكرني ببعض الناس .. اللي نسكتلهم ونتنازل عن حقنا لما يغلطوا فينا .. نقول معلش نمشيها .. لكن لنتيجة ان هؤلاء الناس يتمادوا اكثر .. يستمروا .. ساعتها نحس انه تم التقليل من شاننا .. وأنه كان الواجب الرد منذ البداية على مثل هذه النفسيات ..

انا ممكن اطنش او افوت لأني لا احب الصراعات .. اتنازل عن حقي ليس ضعفا او انه ناقصني لسان طويل او انه انا مؤدب مرة .. لكن انا ما احب العداوة الا لما يفيض الكيل ..

لكن ممكن أقول ان الناموسة احسن من هؤلاء لأنها تتغذى على بروتين الدم بهدف انها تغذي بيضها .. عشان عيالها .. بالنهاية حتى لو كانت حشرة مزعجة الا انها أم واحدى مخلوقات الله ..

:

فيه ناموس حذر ويختبئ باماكن عجيبة وما يهجم مباشرة بل ممكن يظل ساعات بالغرفة ما تحس بيه .. وتنام كذا ساعة وكله تمام .. وفجأة يقرر يظهر وسط نومك او أخره .. وهذا اكثرهم ازعاجاً ..

الناموس له سلوك بمعنى في ناموس يميل لعض ناس معينين اكثر عن غيرهم .. فيه ناموس يحب الحوائط او الاسطح الفاتحة والبعض الداكنة .. البعض يفضل الحواف اكثر من الأسطح .. البعض يعشق القف .. يعني يهجم وبعدين يرجع السقف تاني ..

والحشرات عموما لها سلوك متنوع يتم دراسته .. كمثال فيه ذباب يعشق دخول المنزل وتمسى الذبابة المنزلية مثلا .. وفيه ذباب او حشات ما تطيق الأماكن المغلقة وتعيش بالطبيعة ولو دخلت البيت بيون صدفة او بلغلط ..

فيه ذباب وحشرات تستهدف عينك ووجهك بشكل مزعج جدا .. وفيه اللي ما تقرب منك ..

ساعق الناموس اكتر اختراع فاشل .. هو فعال في المحلات والمطاعم لكن ما اعرف السب انه ما قتل أي ناموسة .. لأن الناموسة تتجه ليه بالنهاية ..

السائل الطارد للناموس فعال طبعا لكن مكلف لو كل يوم استخدمه .. كمان لو انت قافل الغرفة الناموسة حتظل تدور بالغرفة مثل المجنونة وتصدر ازايز مزعج لأنها مش عارفة تهرب وهذه لاحظتها مرة وبالنهاية تلف وتدور حولي وانا نايم وعاملة قلق .. فيفضل ن الباب مفتوح او الشباك ..

بالنهاية الناموسة مخلوقة غير قابل اني اتواصل معاه او اكلمه .. مثل الالة حيستمر بازعاجي ::

تمنياتي لكم بنوم هانئ بلا ناموس =)