FROESE

العابنا ..~

السلام عليكم ورحمه الله وبركاته ..~

العابنا يامكساتيين كثيره وحلوه بس للاسف إنقرضت او بمعنى اصح إندثرت ,, إالا لعبه ماتزال معمره ,, ناس ملت منها وكرهتها وناس لاتزال تلعبها حتى مع عيالها اللي هي ((حرف – إنسان – حيوان .... إلخ ))

هذي اللعبه لاتزال حيه مدري ايش الحلو فيها صحيح هي فيها تنشط للمخ ,, بس <<إذا وحده تفكر في الحرف يتبعه الاسم وهكذا مشكله والا اللي سريعه فا مايمديك تكتبين الاسم الا و ....ستــــــــــــووووووب بقوه :scared:

خصوصا لو كانت بنتعربج يوه نتنف الاقلام منك بقوه عشان ماتكتبين شي .. ويلا يبدون بقرأه وش كاتبين

انا بصراحه بطلت العبها والسبب خطي التعبان والبطئ ... :crying:
مره لعبتها مع إختي وزوجه إخوي وكلهم من ذوي الكتابه السريعه لا ومختارين حرف الذال يعني يبيلك ساعه كامله لتطلعين الاسم ... يومي سنه

من الالعاب الحلوه واللي ياليت الزمن يرجع شوي اللي هي حبشه – وهي وحده تصف البنات على الجدار

وتبدأ تقول :/ حقره بقره قلي عمي عد العشره وتعد لما اخر بنت لو صار الرقم عشره م عليها تبدأ تطارد في البنات وبعدين تنعاد وهكذا (( فيه احد يعرف هذي :. /سيني بيني كسرتيني سارا ارا إت يابو الخنافس نمشي وترافس )) كنت دايما لما ارددها لحالي اقول ياربيه وش يقصد مؤلفها :wide-eyed

ولعبه ثانيه حلوه بعد بس البنت مسكينه لما تجي للبيت تحط رجولها في مو يه دافيه بسبه الدوس عليها من كل بنت :weeping:

إللي هي عين سين صاد : حرف كذا



اللعبه اللي با النسبه لي لا يمكن امل منها هي عسكري – حرامي ... يوه هذي كنت العبها دايم مع إخواني

ثلاث اولا د وبنت وحده ,, كنا نقص اوراق ونكتب التالي :. ملك –عسكري – جلاد– حرامي. والجلاد معه أي عشان يضرب به بس عشان حكم الملك .. طريقتها كانت تتجمع اوراق وتنثر في الارض وكل ياخذ ورقه ويقرا
وش طلع له لو ملك يقول ياعسكري طلع الحرامي .. وياعمري العسكري مابين الجلاد والحرامي عيونه يمين ويسار من الحرامي أي واحد فيهم ولو غلط الله يعينه مسكين الجلاد ممكن يستنذل ويعطيك علقه إنما إيه .. تصيح منها ... فحكم الملك هو ضربتين بارده يعني حليله وخمس ضربات حاره يعني قويه ياويله العسكري راح فيها:sorry:

انا ما رحمت اللي نفسي خمس مرات عسكري على خمس غلطات إنطقيت ذاك اليوم طق الله لايوريكم .,:weeping:
بعدها قررت لو صرت ملك اصفط الورقه تصفيط خاص عشان اعرفها واخذها ولا يصير لي ذاك الطق

=====
لعبه موسميه الحلو فيها إنها في ذا الشهر وبعد صلاه التراويح مع الشاهي اللي هي الكيرم يا الله جدا اموت فيها
تحمس الواحد حتى المبتدى يحبها يوه ياهو يطير من الفرحه لو طيح خمسه (( الحبه السوده )) ولو عشره (( الحبه البيج )) عاد لو طيح الخمسين (( الحبه الزهر )) مايخلي احد ما يقوله ... احلى ما فيها إنك تلعبينها مع ناس اكبر منك او كبرك بس في الاخير اصابعك رايحه فيها ...

صوره الكيرم ..,



===========
حبيت ارجع لذكريات طفولتي قلت لبنت إختي : ساره خلينا نلعب قتحي ياورده ؟.

كشرت في وجهي وقالت :. وش فتحي ياورده انا مو في الابتدائي وبعدين هذي اللعبه خلاص ماتت انتي للحين تذكرينها ... يوه غبار غبار ..
قالت لي :. وش رايك إنسان حيوان ...؟

انا :/ وع شوفي اللعب أي شي إلا هذي ...وع .. قالت :. با العكس حلوه ..

قلت :. اقول خلاص ما ابي شي خلاص شوكرا ..
عين سين صاد – فتحي ياورده – عسكري حرامي – كيرم ..: الله يذكر ايامك با الخير ..,:heartbeat