قصة حصلت لي أثناء الطفوله ~
بواسطة
في 19-04-2012 عند 07:36 (9430 الزيارات)
هذه قصة حصلت لي يوم كُنت في في الابتدائي !
للأسف هذه القصة لم تُمحى من ذاكرتي الى الآن << قُلت للأسف , لأني كُلما اتذكرها يرتفع ضغطي !
و أنا بقول لكم القصة علشان أرفع ضغطكم <<< و هذا هو الهدف من القصة
المهم , يوم كنت أنا في المدرسة في الابتدائي كان فيه طالب معي في نفس السنة الدراسية لكن في فصل آخر , و أنا لا أعرفه و لا يعرفني و لا أعرف اسمه و لا أظن انه يعرف اسمي
باختصار , لا أعرف عنه أي شئ إلا شكله و أنه ساكن في الحارة حقتنا فقط << و أظن انه يعرف اني معه في الحارة , لأني أكثر من مرة أشوف و هو يشوفني في المسجد
و لنقل ان اسم iهذا الطالب هو "س"
المهم , في أحد الأيام أنا كنت العب كورة مع الشباب في الحارة بعد صلاة العصر , فجأة جاء الطالب " س " و معه أخوه الكبير "و أظن ان الاخ الكبير في ثانوي" !!!
و طلب منا الاخ اننا نوقف اللعب , ثم نظر الى أخوه الصغير و قاله "أي واحد من هذولا اللي قلتي عنه ؟!"
و نظر الطالب "س " الى وجوهنا , ثم أشر بأصعبه علي !!!!! و قال "هذا هو " !!!!
ثم فجأة ما أشوف إلا ذاك الكف اللي على وجهي !! و بعدها انهال الاخ الكبير علي بالضربات البوقسية و الركلات !!!
المهم بعد ما انتهى من الضرب قعد يسب و ما ادري ايش , أنا طبعا رحت البيت و انا أصيح , ثم غيرت ثيابي و نمت
لكن طبعا ما قلت لأبوي أو أمي على اللي صار , لأني خفت انهم يمنعونني من اني أطلع مرة ثانية و العب كورة << يا سلام على الإيثار
في اليوم التالي في المدرسة , و في أحد الحصص , دخل نفس الطالب "س " و معه الوكيل , و قال الوكيل للطالب "أي واحد منهم ؟!"
ثم نظر الى وجوهنا و يوم حط عينه علي قال مباشرة "هذا هو " !!!!
و جاء الوكيل و أعطاني ضرب بالعصا و عينك ما تشوف إلا النور
و أنا يعلم الله اني ما كد كلمت الولد " س " في حياتي و ما كد آذيته بأي شئ سواء كانت إيذاء مُباشرة أو غير مباشرة !
و طبعا من يومها , أول ما أشوف الطالب " س " يمشي في نفس طريقي أو أشوفه أمامي = و الله ما تشوف إلا الغبار من النحشة و الخوف
لأن الضرب اللي جاني موب سهل !
حتى في الكورة , أول ما أدري أن الطالب " س " راح يلعب مع الفريق اللي ضدنا = مُباشرة أعتذر عن اللعب
و رغم محاولاتهم أني العب كنت أرد عليهم و أقول
"إذا كان انا ما أعرفه و مع ذلك أكلت ضرب لا يوصف , أجل لو تعرفت عليه وش يبي يصير ؟! أكيد يبي يقتلني "
<<< طبعا انا أتكلم وقتها جد , لأن عمري وقتها تقريبا 9 سنوات و كنت أظن انه يبي يقتنلي من جد !!
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــ
طبعا الحين البعض يتسائل "وش السبب ان الولد " س " يفعل ما فعل "
المُشكلة اني إلى الآن ما أعرف السبب !!!! و لا أظن أني سأعرف السبب طوال حياتي !