التعليم مستمر مستمر مستمر مستمر !!!!!!!!!!!!!!!
بواسطة
في 06-03-2018 عند 01:01 (758 الزيارات)
العلم جميل لا غبار على ذلك .. فبالعلم تنهض الأمم .. -_______- .. مع اني اشوف النوم ابرك ..
انت تدرس بالمدرسة 12 سنة .. وكل سنة زي 6 او 10 مواد او اكثر يزيدوا كل سنة .. تصحى الصبح وترجع بعض الظهر مستهلك .. لكن جميل تتعلم الاستيقاظ مبكرا .. جميل ان فيه فسحة 10 دقايق تقدر تسوي فيها "لاشئ" ..
بعد المدرسة بعض الطلبة يمرون بمسلسل الدروس الخصوصية او دروس التقوية او دروس إضافية بمعهد .. والبعض يرجع البيت عادي ..
ولو القروب الدراسي فيه بنات مثلا ممكن يكون وناسة وشوية دراما نهايتها تافهة او مأساوية أو جادة على حسب .. وان كان القروب غير مختلط فكمان وناسة لتبادل ألعاب او أي شيء ترفيهي او الترتيب لخروجة وانت ونصيبك لو شلة سوء حتعيش حياتك بشكل ما .. ولو شلة بحالها حترجع بيتك كافي غيرك شرك ..
بعدين مسلسل الواجبات .. وامتحانات التقويم .. وامتحان نصف السنة .. وآخر السنة .. وحتى اللي يخبص بالامتحان او حتى ما يحضر الامتحان ينتظر النتيجة بفارغ الصبر لعله ينجح ..
تنتهي الحياة المدرسية اللي غالباً تكون حرمتنا من سبيس تون ومسلسلات الكارتون اللي تيجي الصبح ؟!!! .. احلى مسلسلات كارتون كانت تيجي الصبح .. انا انحرمت اشوف "مغامرات نيلز" بسبب المدرسة .. ولما ارجع بعض الظهر مجبر اشوف مسلسل او فيلم اجنبي ممل او اخبار ..
والآن ندخل مرحلة الثانوية العامة .. وعبارات التشجيع "اتعب وذاكر عشان ترتاح بعدين" .. لو جبت درجة سيئة مستقبلك "حيضيع" .. وغيرها من عصبية الاب وقلق الأم والبعض ممكن يتساءل هل انا فعلا ابنكم ولا بجتوني من ملجأ ايتام .. وذلك من هول نظرات الغضب والقلق وكمية التوتر بالبيت .. حتى يمكن البعض او كلنا فكرنا بالانتحار .. طبعا فكرنا بس لكن ما اقدمنا عليه والعياذ بالله ..
المهم تجي امتحانات الثانوية .. وبمجرد ان تنهيها تنتظر النتيجة .. وتقول لنفسك أعيشلي أسبوعين ..لأن الجميع أكد ان النتيجة حتكون بعد أسبوعين .. لكن يا عزيزي تفاجئ ان النتيجة جات بسرعة بعد أسبوع او عشر أيام قبل الموعد المحدد .. يعني من الآخر نكد .. واحيانا تتاخر بشكل بايخ .. المهم ان النتيجة تجيك على حين غرة .. تصحى الصبح مبكر "على غير عادتك" وتحس بجفاف بحلقك ودوخة .. وان الجو مترب .. واهلك بالصالة متوترين .. واخوك او اختك فاتحين اللابتوب يدوروا على نتيجتك او يقلبوا بالجريدة اللي نزلتف يها نتيجتك .. وكأنه يدورون على واحد من السوابق ..
في أهل يفرحوا من النتيجة رغم انها 85% المهم ان الواد نجح والاهل حيسافروا لندن ومافي دور ثاني ونكد "هذا كل اللي همهم" .. وفيه اللي يجيب 97% وأهله ينكدوا عليه ويقولوله ليش ما جبت 98% كذا يمكن تدخل طب او لا !!
وفيه طبعا اللي يجيبون 99.9% و 100% ويجيك فضول تعرف صورهم .. فتشوف بنات بنظارات او بدون نظارات .. شباب بشعر او بدون شعر .. المهم تحس ان اشكالهم مختلفة عننا .. او تحس انه انت مالك شكل أصلا .. عموما مش عارف كان ودي أقول ايه شكلي خرفت ..
بعدها مسلسل الجامعة اللي حتقبلك .. واللي حتتشحت عشان تقبلك ... او تسافر وتتغرب ..
بعدين تعيش تجربة اول سنة دراسية .. وتحسد الحمار على ذكاؤه لأن فهمك صفر ويمكن كمان لساتك تتوه داخل معالم الجامعة ..
ومع الوقت تلاقي ناس يقولولك "لا تقلق كنا حمير مقلكم وأحمر منكم واتعودنا عالكلية والانجليزي اصبح سهل" .. طبعا ترتاح نفسيا .. وتجيب قاموس وتعمل نفسك باحث في علوم اللغة تترجم الصفحة ب 3 ساعات ..
تمر سنين الكلية .. عشان كل ما تروح مكان تتوظف يسألوك :
معاك ماجستير ؟ معاك سنوات خبرة طويلة .. معاك انجليزي ؟
وتبدأ رحلة البحث عن وظيفة .. وهو مسلسل لا داعي لذكره كي يظل الامل بمستقبل مشرق ..
وليس لدي حماس لأكمل .. ساَع نقاط وانتم اكملوا او تخيلوا او لا تفكروا ربما ..
........................