الحب اعمى

[xx banooota xx]

بسم الله الرحمن الرحيم..!




.
السلام عليكم ورحمة الله وبركاته..

11:00 a.m.

الثلاثاء

9\3\2010

*



آلفصل الاول
البارت"1"
..دموع..
المملكه المتحده-لندن
صوت هطول المطر مع صوت قلبين مجروحين من لعبة الازمان..!
:ليش؟
:انا اسفه ماقدر..!
:ليش ماتقدرين انا ضحيت بكل شي ..!
:ضحيـــــت انت ضحيت!! انت واحد مايهمه الا نفسه مستحيل تضحي..!
:انا!؟
:اي انت اللي سويته فيني قليل..ارفع راسك طالعني !!
:اناآحبك...
:لا تحاول تضعف من قوتي بهالكلمه..خلاص ولو صدق كيف ترضى علي اكون ثانيه..وخرابة بيوت..
:انتي مو خرابة بيوت انتي حبيبتي !! حبيبتي انا !!
نزلت دمعه واخيرا :لا انا مو حبيبتك خلاص اتركني ..اتركني..!!
مشت مسرعه..!
متجاهله صوته وصوت قلبها اللي دقاته مثل صوت الرعد ..اللي تسمعه..!
صرخ بضعف وقلة حيله:ديــــــــــــم !!,لاتتركيني!
اعتصر قلبها وزادت دموعها ..ماتحملت طاحت على ركبها بوسط الطريق..
ودموعها اختلطت بالمطر..وشعرها المبلول على وجهها ..
وعيونها وانفها الاحمر..كل هذا يعبر عن حالتها ..
قلب محتــــاج !!
حست بأنفاسه قريبه منها وهو جالس جنبها..!
:لاتروحين طلـــــبتك !
قالت بصوت باكي ضعيف متقطع: ليـ ـيـ ـ ــش اقعـ ــ ــ ـد ؟
مسك يدها البارده المرتجفه وحطها على قلبه..!
:عشان هذآ..
ديم:هذا هو اللي بخليني اروح..!
:هذا يحبك انا احبك قلبي يحبك..! لا تهتمين بآي شي ديم انا ما اعيش من دونك ولا انتي تقدرين..
انا انتي وانتي انا !!
كلماته لامست قلبها بطريقه زادت من الامها وقهرها صوته الواثق:انا اقدر اعيش من دونك..!
:لا ما تقدرين احد يعيش من دون قلبه ؟
ديم زادت دموعها وصرخت:انت مو قلبي انت خايـــن وكذآب!!
:انا ماخنتك ولاكذبت عليك !! انا بعت الكون عشانك !
ديم:بكره تبيعني عشان وحده ثانيه ..,الله يخليك لا تلحقني خلاص
الله يخليك خلاص..!
قامت بضعف تركت وراها قلب محطم مثل قلبها..!
وقفت اقرب تاكسي وركبت بهدوء
وهو لسه على ماتركته..!

[xx banooota xx]

قام من مكانه وهو يشوفها تبعد..

لعن نفسه والظروف اللي جمعتهم بهالشكل..!
ركب سيارته راجع لمكان ماجآ..!
*
نزلت من التاكسي ونظرات الناس عليها..
مبين انها تبكي وشكلها مبهدل بالسويتر الخفيف المبلول..
وبنطلونها الجينز اللي صار ثقيل عليها من المويه,,دفعت للتكسي..
ودخلت العماره المقابله لحديقة "الهايد بارك"
ركبت الدرج الصغير اللي يودي للطابق الثاني..
وصلت لشقتها الصغيره..اللي تكفيها...!
فتحت الباب بهدوء وعلى طول على الحمام "الله يكرمكم"
تاخذ شور دافي وذكرياتها تاخذها لقبل ..
قبل
خمسه
شهور
!
.
في الاوكس فورد..
البسمه ماليه وجهها وبيدها اكياس من التسوق المتعب..
مشت لاقرب كوفي شافته وكان ستاربكس..
دفت الباب بكوعها..ودخلت وقعدت بآقرب طاوله لثلاث اشخاص وحطت اكياسها بالكرسي المقابل لها...!
وقامت تطلب عند الكونتر..
طلبت لها شي بارد..ورجعت قعدت..
وهي تشغل نفسها بالناس اللي حولها..!
وفجآه جت عينها بعين شخص يراقبها من يوم مادخلت..!
تاملته وابتسمت بخجل وودها تضحك يوم شافت الشال اللي حاطه حول رقبته..!
نفس الشال اللي هي حطته..وهو انبسط بضحكتها وشاف وين تطالع وعرف السبب..
وضحك لين بانت غمازاته الجذابه..!
زادت نبضاتها وهي تشوف اكثر شي تحبه "الغمازات"
ووعت يوم شافته واقف عند طاولتها..!
وماسك الكرسي
:may I ?
"ممكن"
ديم بآبتسامه:آكيــد
قعد وهي مبتسم:كنت شاك انك عربيه..,انا اسمي تركي من السعوديه..
ديم:هلا تشرفنا انا ديم من السعوديه..
تركي:اسمك حلو
ديم بخجل:شكرا..
تركي:انتي تدرسين هنا ؟
ديم :اي
تركي:وش تخصصك؟
ديم:طب
تركي:ماشاءالله عليك ..الله يوفقك
ديم:شكرا .."وبتردد" انت وش تخصصك ؟
تركي اطلق ضحكه زادت من جاذبيته:انا خلصت دراسه من سبع سنين
ديم اختفت ابتسامتها وعلامة الدهشه عليها..
تركي ابتسم لردة فعلها:وش فيك ؟
ديم:امم ولا شي بس كنت احسبك تدرس يعني امم امم شكلك صغير !
تركي ابتسم لها :انا عمري ثلاثه وثلاثين
ديم وجهها منصدم شكله بالعشرينات !
تركي :وانتي ؟
ديم:انا 20
تركي"بـــــزر"ابتسم:العمر كله ان شاءالله
ديم:شكرا
تركي:عفوا ..
اتكى عالطاوله مما زاد قرب وجهه..
وبدت تتامله وقلبها بيطلع من مكانه..
شعر اسود كثيف..وجه دائري اسمر ..
وعيون ســوده مريوشه..!
وشفايف مرسومه بدقه..مزينه بسكسوكه..تقتل..!
استحت شوي يوم شافته يتآملها بنفس النظرات..
ويقول ببسمه غريبه:عيونك حلوه..
انصدمت ديم ماتعودت احد يمدحها كذا!!
وبهالنظرات..
ديم:شكرا..
تركي:هههههههههههه تدرين كم مره قلتي شكرا..
ديم:ههههههه
.
.
.
[رجعت للواقع]
والمويه الحاره تدفيها وتختلط مع دموعها..
تغيرت حياتها من يوم شافته..
هذا كان اول لقاء بينهم حسسها بشي كل انثى تحتاجه..
"الـحنان"
طلعت من الشور ولبست الروب ونشفت شعرها..
ولبست بيجاما سماويه ثقيله..
وطلعت للصاله الصغيره..
ورمت نفسها عالكنبه ودموعها تنزل بحرقه..
طاحت عينها عالكامير سوني الفوشيه المرميه عالطاوله..
قامت وحنينها يسبقها..!
فتحتها وبدت تتفرج عالصور وصدرها يرتفع وينزل من قوة الشهقات اللي تكتمها..
شافت صوره كملت الناقص..
في "الريجينت بارك"
يوسط العشب الاخضر وهو لامها بيده ..
رمت الكاميرا عاالارض..
ديم:خايــــــــــن حقير ما تستااهل !!!
ليش مااكرهه ليش ..؟؟!
*
*هـــلي وان جارت آلدنيا !
السعوديه-الرياض
الكل مجتمع على طاولة العشا..
ماعدا هي..!
ناظر ابوخالد بالكرسي اخر الطاوله الفاضي..
وقلبه مشتاق لبنته !
خالد حاس بآبوه:الله يرجعها بالسلامه يبه ,لا تخاف عليها ديم شطوره وذيبه لاتخاف عليها..
ريم:صح يبه كلام خالد ترجع قريب ان شاء الله..
ام خالد ملتزمه الصمت ودمعتها على طرف خدها
اشتاقت لبنتها..
هذي حالتهم من يوم ماسافرت ديم عنهم هي روح البيت وضحكتهم كلهم..!
ماحب يوقف بوجه حلمها اللي حلمت به من الصغر..!
*
نهآية آلبارت آلاول من آلفصل الآول..
وآن شاء الله البارت القادم رح انزله
قريب..

آنتظروني..

[xx banooota xx]

رن جوالها للمره العاشره من دقيقتين ..!
موراضي يوقف اتصال..
مايدري انه يذبحها بأتصاله..
قامت بعصبيه وردت
ديم:وش تبي خلاص ما تزهق..
تركي:ازهق من الكون كله ولاازهق منك..
ديم:تركي انت ماتحس خلاص..!
تركي:لا مو خلاص !! مو خلاص
ديم:انت ماتفهم انا نزوه من حياتك وقريبا انتهي !
تركي :لالالالالا
تعبت من هالحياة مسكت التلفون ورمته عالارض وهي تشوف كل شي حولها مرمي..
كانها غرفة وحده مجنونه..!
ديم
"اللي سويته يا تركي كبير بحقي مااقدر اسامحك"
.
.
قبل
3
اسابيع
.
رجعت مبسوطه من الجامعه اخذت علامه كامله في الكويز ..
مو مستوعبه تبي تطلع تبدل بسرعه عشان تقوله عن العلامه واهم من هذا كله تشبع نظرها من شوفته..!
استغربت يوم شافت حرمه بآواخر العشرينات..
قاعده قبال باب شقتها..
طويله بجسمم ممشوق يدل على حرمه عاقله..وتفكيرها متزن...
وجه مدور بعيون كبيره بلون العسلي..
وخشم حاد يدل على غرورها..
وفم ممتلئ وحبه خال زايدتها جاذبيه فوق شفتها..
حاطه روج احمر صارخ ورافعه شعرها البني بطريقه مرتبه..
ولابسه تنوره سودا للركبه وفوقها بلوزه بنفسجيه..
فيها فيونكه كبيره اعلاها..
مع كوت اسود بآزارير عليها علامات
'CHANEL'
وكعب متوسط اسود وشنطه معلقتها على كتفها بسلسلتها الطويله..
'CHANEL'
طالعتها ديم بآستغراب من نظرتها..الغريبه
ووقفتها بتحدي..!
تقدمت ديم مو عارفه وش تسوي تتجاهلها ولا تكلمها لكن..!
:انتي ديــم!!
ديم:اي هلا من معي؟
طالعتها من فوق لتحت بآحتقار..!
وضحكت بصوت عالي مستفز..
طالعتها ديم بآستغراب وش فيها هذي؟؟
تقدمت الحرمه بهدوء بنظرتها الحاده وصوت الكعب اللي يصدا بالمكان..
وقالت بصوت قوي فخم
:ممكن نتكلم شوي..
ديم:اي اكيد بس مين معي؟
:تعرفين بعد شوي..
ديم خافت من هذي وش تبي .؟
مشت عنها بخطوات واثقه ..
:انتظرك ..
راحت وراها وهي خايفه ومتردده..
نزلوا وطلعو بره العماره ومشت وراها لحد ماوصلوا..
كوفي في الهايد بارك..
قعدوا على الطاوله الخشبيه المدوره اللي تكفي لشخصين..
علقت شنطتها بسلسلتها الطويله على طرف الكرسي ..
وجلست بوثوق وهدوء..
كل هذا وديم لسه واقفه..!
:اجلسي لا تناظريني كذا!
جلست ديم بهدوء وحطت جوالها بهدوء عالطاوله..
طالعتها بنظره تمعن غريبه ..
وديم لسه تحت تآثير خوفها من هذي الحرمه الغريبه ..!!
وفزعت بخوف على رنت جوالها ناظرت الشاشه وشافت الرقم والاسم وصورة الخاصه للمتصل
كان تركي..
مسميته بجواله
'me'
"انا"
وخلفية الجوال تركي وهي مصورين قبال متحف "مدام توسو للشمع"
وهو لامها بيده زي دايم وهي تبتسم له

طاحت عين ديم على الحرمه اللي تطالع بالجوال حقها بنظرات..
وهي ترص على اسنانها.ورجعت تطالع ديم بنظره وكآنها بتقتلها !!
وصدمتها بصوتها البارد عكس انفعلات وجهها
:ردي
ردت ديم بخوف وهي ودها تقوله يجي يشيلها عن هذي المتوحشه على حد تعبيرها!
ردت بصوت خايف:آلو
:هلا بقلبي وينك انا استناك..
ديم:بتآخر شوي..
تركي:خلاص حبي انتظرك..
ديم:باي
تركي:باي
.
رجعت الجوال بخوف عالطاوله ونظرات اللي قبالها كل مالها تزيد حقد واحتقار..
:انتي ديم الــ ـ ـ
ديم:آيوه..
:كم عمرك.
ديم:20
:اووه بزر!!
ديم ماعجبها طريقة حكيها !! بس فضلت الصمت
:انا جوآهر الــ ـ ـ
ديم انصدمت هذي زي عايلة تركي !!
وكملت بنظرات خبث:اكيد سامعه فيها !
ديم هزت راسها بتوتر
جوآهر:صراحه ياديم وحده بمثل مستواك وعمرك ماادري لي تحط نفسها بمواقف موقدها !
ديم:آنا ؟
جوآهر:لا تعملي حالك بريئه !!
ديم:انا مو قاعده افهم وش تقولين!؟
جوآهر:انا جوآهر الــ ـ حرم تركي آلـــ ـ ـ
اللحين فهمتي يا نونو..!
ديم لسه تستوعب حرف حرف..
وجوه تحس بآعصار بقلبها وقالب ثلج كبير ببطنها..
وقلبها يدق بسرعه وصدرها ينزل ويرتفع ونفسها ضاق ومعد تسمع الا هالكلمه..
حرم تركي
حرم تركي
حرم تركي
؟؟؟؟؟
ليش تركي متزوج اصلا ؟؟!
ديم كردة فعل طبيعيه:انتي كذآبه..؟؟!
جوآهر نظره واثقه ثقبت فيها قلب ديم الصغير:ليش آكذب..!
ديم نزلت دمعه على خدها :لانك مريضــه!!
ابتسمت ابتسامه على جنب وبانت غمزتها اللي على خدها اليمين..!
زي تركي!!
فتحت الشنطه وطلع منها مجموعة الصور..
وبيدها البيضه النحيفه..خذت اول صوره مدتها لديم بهدوء..
شالت ديم الصوره بيد مرتجفه
وفتحت عيوها المدوره على وسعهها وهي تشوف اللي تشوفه..
تركي اي هذا هو تركي !!
كاشخ بالشت الاسود والغتره البيضه ..وعلى وجهه اكبر ابتسامه..
وهو ماسك يد وحده بفستان ابيض طويل..للاسف هي نفسها الحرمه اللي قدامها..!
غمضت عيونها بقوه ودموعها تنزل..!
ليـــــــــــــــش؟
جوآهر كانت مبسوطه بمنظر ديم اللي اشفى غليلها!!
وفوق كذا ماوقفت ولا رحمتها..!
طلعت صوره ثانيه..
ومدتها لها رمت ديم اللي بيدها وهي تحس نفسها مخدره..
ديم:مآبي اشوف ماابي اشوف!!!
جواهر:الا شوفي شوفي العائله اللي انتي دمرتيها شوفي !!
عـــآئله!!
آي عائـــــله؟؟
شافت الصوره وكانت تركي وجواهر وبيدهم بنت وولد
الولد ياخذ من ملامح تركي الكثير والبنت بعد مع لمحة شبه لجواهر..
حست ان قلبها ماعاد ينبض واللي حولها كلهم راحوا مابقى الا هي والصوره اللي بيدهآ..!
معقــوله!!
جوآهر مبسوطه ردة فعلها..!
جوآهر:هذول عيال تركي عيــــآلنا!!
هذي بنته نوف وهذا ولده محمد هذي عائلتي عائلتنا انا وتركي..!
ديم حست الدموع تنزل من غير شعور..!
وقلبه وقف وراسها ثقيل وحست بدوخه..
صرخت:يكـــفي يكفــــي!! خلاص !!
جوآهر :لا مايكفي يا خرابة البيوت ما يكفي !!
ديم:انا ماادري انه متزوج ماادري انه اب ماادري انه كذآب ماادري!!
جوآهر:اللحين دريتي ورح توخرين عنه وعن حياتنا لانه زوجي وابوعيآلي ومارح اسمح لحشره مثلك تخرب اللي بنيته..تفهمين؟؟!
ديم طالعت فيها بكره وتركت المكان وهي تركض تبي تهرب
ديم
"كل هذا كذب كذب!!"
فتحت باب العماره بقوه..!
وركضت بسرعه للطابق الثاني وهي تهرول بالدرج ودموعها سكايب على خدها..!
وعيونها عليها مثل الغبشه وماتشوف شي..بين ركضها ودموعها..!
صدمت..!! بشخص واقف قدام شقتها..وكان على وشك يدق الباب..!
رفعت راسها..
لالالالالالالالا اخر شخص !! ابي اشوفه..!
:ديم حبي وش فيك ليش تصيحين..
مسك يدها المرتجفه وهو يهزها: ديم ابش فيك..!
لكنه تفاجأ بكف قوي..!
ديم:حقـــــــــــــير كذآبـــــــــ !!
ماسك يده مكان الصفعه وهو منصدم!!
تركي بعصبيه:مجنونه انتي ..!!!؟؟
بس صوت ثالث انضم للحوار..
رفع راسه وهو يسمع طقة الكعب على الرخام الابيض!!
:لا مو مجنونه!
تركي وعيونه عليها اكبر دهشه:جـــوآهـــــــــر!
ديم لا لا تطالعها كذا!!
نظرته اكدت لها اشياء كثــير !!
جوآهر تقدمتت بهدوء ومشيتها اللي تحرق قلب ديم
جوآهر مسكت ياقت قميصه:اي حبي جوآهر وش فيك؟
ديم والغيره اكلت قلبها ودموعها تنزل وهي تشوف منظرهم
"لايقيــــن على بعض"
تكلمت بهدوء:انا اسفه !!
دفت الباب ودخلت وسكته بآقوه ماعطاها ربي..!
وطاحت عالارض وهي تصيح..!!
وبدت تسمع صوته يعلا بره
تركي:وش جابك؟
جواهر:جايه اصلح اللي خربته!
تركي:وش قلتي لها!!
جوآهر:يهمك وش تفكير خليها بلعنه!!..لا تهدم عايلتنا بمراهقتك المتآخره!!
تركي:مو مراهقه!! لقيت فيها اللي مالقيته فيك!!
جوآهر:تقارن هالزباله فيني..! انت شفت شكلها انا احلى بمليون مره!!
تركي:تكلمي بآدب اول بعدين اقولك الفرق!! الشكل مو كل شي هذا انتي شكل ظاهري بس من جوه...!
جوآهر:من جوه انسانه حبتك ولو وحده غيري رمت عيالك بوجهك وراحت!!
تركي:قلتي لها ان لي عيآل !!
جوآهر:اكيد ! وشافتهم بعد!
تركي:انتي مجنونه!!
جوآهر:سميني اللي تسميه بس لك يومين ترجع وتترك هالسخافه ولا ابوك هو اللي بيتصرف!
تركي:ماهمتيني لا انتي ولاهو!!
جوآهر:نشوف ياتركي ورح ترجع اذكرك..!
وراحت وتركته..
دق عالباب بقوه
:ديم..ديم...ديم...ديم...ديم
هذا اخر ماتذكره من ذاكرتها المره..
لانها بعدها صحت وهي على سرير المستشفى وهو حاضنها ويمسد على شعرها ويعتذر
تسمعه وهي مو بوعيهها..
.
.

ديم
"كلها ذكريات مرره محت الحلوه ما اتوقع في حياتي كلها بسامحه بعد مااستغفلني واستغفل حبي له اكتشف انه متزوج وعنده عيآل!ليش دور غير جوآهر ليش مع انها جميله كثير ليش يقول لقيت فيها اللي مالقيته فيك انا وش فيني زود عنها بالعكس حتى هي ارقى مني بكثير بمستواه !!"
*
السعوديه-الرياض
*هذي حيآته ليتكم تتركونه!
في بيت اقرب مايقال عنه قصر..
:لالالالالا!!
:موعلى كيفك تبين تعانسين وتقعدين على تسبدي!!
:يمه انا ماقاعده على كبدك انا عمري 24 سنه حرام عليك!
:لاموحرام كبرتي والمعاريس زهقوا وهم يطقون بابنآ!!
:ماآبي اتزوج ماآبي انا مرتاحه كذآ!!
:لما يكون على كيفيتس يا بنت ابوتس!
:تكفين يمه الله يخليك!
:رينآد انا ابي مصلحتتس!
رينآد:هذا مو مصلحتي تكفين يمه..!
:طيب تعرفين الرجال عشان تحكمين
رينآد:لا ولاابي اشوفه
:للآسف انا كلمت تركي عنه وقال انه زين وابوك اقتنع وشوفتك بيحددونها قريب
رينآد:اكرهكم كلكم تبون الفكه مني
ام تركي:مو فكه نبي مصلحتتس!
رينآد:الزواج بداية التعاسه شوفي رنا كيف هذي هي رجعت لك مثل ماطلعت!
ام تركي:............................
ريناد:ماعندك جوآب يا يمه بس بكره انا برجع لك مثل رنا وبتشوفين!
.
.
في نفس القصر الكبير بس في غرفه ثانيه ومختلفه عن اجواء الشحن والتوتر..!
*علي كآن الزمن عندك توقف ..وين آروح دامك ساكن(ن) بي!
غرفه مليانه حزن وكآبه..
ستاير مسكره مع فتحات صغيره يدخل منها نور الشمس!
صوت انينها المؤلم!
فقدت زوجها بطريقه بشعه!
تركها وراح بكل بساطه!
ابتسمت بين دموعها وهي تتذكر بسماته وحركاته العفويه لما ما يكون تحتت تآثير المخدر!!
كان رجآل بمعنى الكلمه يوريها حبه وعطفه!
ويختفي هذا كله لما يبدا يتعاطى بالليل مع اصحابه!
وفقدته بلمح البصر!
وجزء بقلبها كرهه لانها اكتشفت انه استغلها..!
وماعاملها بعطف الا بغرض في نفسه..!
طق طق طق...
بصوت باكي:مين؟
:آنا ممكن ادخل
ابتسمت لصوته الحنون:تفضل
دخل ببسمته المعتاده وبيده بنته الصغيره..
:شوفي سميتك جايه تزورك..
:ياحبيلها سميت عمتها..
:بس تراها زعلانه منك..
:هوو ليش؟؟
:تقولي"ليش عمه رنا تبكي كل يوم"؟
اختفت بسمة رنا المصطنعه..ولمعت دموعها اللي حاولت تداريها عن اخوها وفشلت !
حط بنته عالكنبه وتركها تلعب باللعبه اللي بيدها..
واللتفت لاخته وقلبه متقطع عليها..
:لين متى يا رنا لين متى خلاص!!
رنا:..........
:اطلعي من اللي انتي فيه غيري جو كملي دراسه توظفي ارجعي لحياتك مع صديقاتك!
رنا:صعــب يا سعود صعب!
سعود:ليش صعب فهميني؟؟
رنا:ارجع اكمل دراستي واسمع سالفتي على لسان كل البنات ونظرات الشفقه والشماته تجيني من كل جهه!! ولا شغل اي شغل هذا اللي بريحني الا بيزيدني انا ماعدت اتحمل نظراتهم الناس ماترحم!
وصديقاتي اللي كل وحد باعتني لما ضعفت!
سعود حس بجرح اخته الكبير:يعني شلون تكملين حياتك كلها كذا؟!
رفعت رنا راسها ونظراتها تلمع وهي تطالع بنت اخوها تلعب ببراءه
رنا:ودي ارجع طفله زيها او اروح مكان بعيد وآبدا من جديد..
سعود قال بحماس:ادرسي بره !!
رنا ابتسمت:آبوك اللي بيرضآ
سعود:ماعليك انتي قولي وش تخصصك واي بلد واتركي ابوي علي!
رنا:سعود من جدك..
سعود:اي من جدي لو هذا الشي بيشيلك من حالك هذا مستعد !
رنا ولاول مره من فتره تضحك من قلب حضنت اخوها من قلب ونزلت دمعة فرح..
سعود فرح لفرحة اخته اللي يسعى يفرحها بآي طريقه ممكنه..!
*
نفس المدينه بس بحي اقل رقي من الحي اللي كنا فيه..
بفيلا فخمه وحجمها يناسب عدد سكانهآ!
ريم:تكفى خلوووود..!
خالد:اصغر عيالك آنا..!
ريم:اليوم ديم بتدخل ومارح تلاقيني اون ..
خالد:مشكلتك..!
ريم:وديني اصلحه تكفى خالد!!
خالد:طيب يالنشبه..
ريم:حبيبي خلووود
ونطت عليه
خالد:خلود اجل؟؟
قامت ريم تركض وهو يلحقها

*

[xx banooota xx]

*
بسم الله الرحمن الرحيم..

السلام عليكم ورحمة الله وبركآته..
.
.
.

الفصل آلثاني..
آلبارت(1)
.
.
.
المملكه المتحده-لندن
*كــل هذآ الحب خدعه مستــحيل!
مر اسبوعين على اخر مره كلمته فيها مستغربه اختفاءه الفتره اللي راحت!
وفسرته على انه زهق منها وعرف انها نزوه!
بين شوقها وحبها له الا في مشاعر ثانيه واقفه ضد مشاعر الحب..
"الخيآنه"
هو شبه خانها وخان ثقتها ! فيه..يكفي انه عنده عيآل !
ختمت تفكيرها فيه بهذي الجمله لانه وصلت لجامعتها
راحت على طول للكلاس لانها متآخره..كثير..
دخلت الكلاس وللكرسي حقها المعتاد وتفآجآت بوجود احد جنبها بالعاده هي دايم لحالها!
وهالبنت باين عليها صغيره ومحجبه
مشت لكرسيها وحطت كتبها وفتحت دفترها تدون اهم ملاحظات الدكتور الي بيلقي المحاضره
تفآجآت بالبنت اللي جنبها اخيرا تكلمت..
:hi
:hello
:i'm Rana from saudi Arabia
ابتسمت ديم:هلا انا ديم من السعوديه
:اوو سعوديه ..كويس سهلتي امو كثيره ههههه
ديم:هلا فيك رنا
رنا عجبها شعور انها تقدر تسوي اي شي وتتكلم زي ماتبي في محيط مايعرف الظروف اللي عآشت فيها..! ولا يعرف اسمها الكامل بما انها ابوها رجل ناجح ومايعطي الناس وجه وشخصيته صارمه..!
فمكروه من اغلبية المجتمعات والطبقآت!
ديم قطعت افكارها
ديم:غريبه اول مره اشوفك بالكلاس معي..؟
رنا:اي انا هذي سنتي الثالثه
ديم:السنه الاولى والثانيه درستيها في السعوديه؟
رنا:اي
ديم:غريبه كيف رضو يدخلونك؟
رنا تخفي ضحكتها من تفكير ديم البريئ
رنا:والله ماادري شلون بس يمكن غيروا الانظمه
ديم:اي والله يمكن
ورجعوا ركزا عالمحاظره وكل وحده همها ياخذها لبعيد..!
رنا
"تفكر كيف انقلب حالها بهالاسبوعين اقنع سعود اخوها ابوها بصعوبه..!
ورضا بحب الخشوم وكان رافض تماما بس يوم شاف حالتها وافق وكلم تركي وتركي
ضبط سكنها بما انه بلندن وظبط وضعها بالجامعه وبسبب وزن ابوها ومعارفه بكل مكان قدر يدخلها المكان اللي تبيه بسهوله !
جات لندن واستقرت في مكانها وماشافت تركي اخوها الا كم مره من اسابيع ومستغربه تغيره..!"
ديم
"فكرت تنسا تركي لفتره مع ان بنظرها مستحيل بس لازم تحاول وتركز على دراستها وحلمها"
*
السعوديه-الرياض..
*آنا في همي متآسف على حبي على آيامي..!
في الصآله الكبيره اللي وسط قصرهم..
قبه مغطيه بالزجاج تسمح لنور الشمس يخترقها وينعكس عالبلاط الرخامي..
:هلا وغلا..
:هلا فيك يوو وش ذا الحر.؟!
:شدعوه ماتعرفين شمس الرياض!
:اي والله احس راسي بينفجر..!
:روحي اقعدي في الريسبشن انا بطلع اشوف نوف وبجي..
:ليش وش فيها؟
:لا بس مسخنه كانت..
:يووو حبيبتي..
:يالله ثواني واذا تبين شي دقي عليهم
:اوكي..
وطلعت تشوف بنتها
وهي ترقى الدرج الحلزوني الكبير شافت بالنص معلقه صورته وصورتها..
طالعت فيه..وبسمته وضحكته كانت ايام حلوه..
خربتها دخيله على قولتها"بــــزر"
جوآهر..
"والله لا تنتدم يا تركي وبترجع!"
شربت بنتها الدوا ورجعت لاختها..موضي اللي تنتظرها تحت..
موضي:تآخرتي
جوآهر:وش اسوي مارضت تشرب الدوآ..
موضي:المهم وش صار على موضوعك؟
طالعت جواهر بآختها:من جدك تسآلين؟
موضي:رجعتي تكلمينه؟
جوآهر:آكيـــد ماابي اخسره يا موضي
موضي:جوآهر دامه خانك وش ترتجين منه!
جوآهر:قولي اللي تقولينه بس لا تنسي بينا طفل وطفله..وهو ماسوا كذا الا اني قصرت معه
موضي:تدرين لو ابوي درا والله لا يطربق السما فوق راسك وراسه!
جوآهر:عشان كذا انتي بتسكتين ولا تنطقين حرف!
موضي:مااضمن لك دامك ماشيه بهالجنآن!
جوآهر:مو جنان انا احب زوجي وعيالي ورح احافظ عليهم ومافي زواج من دون مشاكل كذا
وانا اقول الحمدالله انها جت كذا ماسوا شي ثاني..ومصيره يرجع لان الرجال ماله الا زوجته وبيته!
موضي سكتت ومو عاجبها الحكي..
جوآهر كملت كلامها:تحسبينه سهل ! ترا من جوه مكسوره..مو عشان شي عشان فكر بس يخونني..!
ولا البنت انا شفتها مو من زينها يعني بالحق انا احلى بمليوون مره!
موضي منسجمه معها :ليش كيف شكلها؟
جوآهر وهي تتذكر شكل ديم ومستحيل تنساه:امم بيضه ووجهها مدور وعيونها مدوره كل شي فيها مدور
وجهها زي وجهه البزران يعني مافيها شي مميز!
موضي:هوو وش بلاه زوجك طيب يعني في آحلى!
جوآهر:ههههههه قلت لك الحمدالله جت على كذآ
موضي:من جدك تضحكين والله اهنيك !
جوآهر:لش وش تبيني اسوي يعني..؟ قلتلك مصيره يرجع
موضي:ياحبيلها اختي الواثقه اصلا وين بيلاقي مثلك..
جوآهر:ههههههه اي والله
موضي:بس تراك منتيب سهله صدتيه صيده خطيييره!!
جوآهر:آلإاا عليك انا من شفته يتهرب مني ومايخليني امسك جوآله وسفراته كثرت..
حسيت ورحت واستفسرت وسمعته مره يكلمها هنا بالحوش وعرفت اسمها ديم وخذيت الرقم وجبت الاسم الكامل ..
موضي:خطيــــره والله تنفعون فلم..!
جوآهر:هههههههههه اقول امشي بس نتغدا
*
المملكه المتحده-لندن
*ليه انا مجروح..وآنا جارحكـ؟!
آلهايد بارك..
واقف عند البحيره ويرمي فتات الخبز الصغيره للسوانز اللي في البحيره وكلهم يجتمعون على قطعه وحده.
.وسوان وحده تاخذ القطعه والكل يلحقهآ وينتظرونه يرمي ثانيه..!
ناظر بحالهم وجمال منظرهم تمنى يكون بهالحريه ومحد حوله ويسوي اللي يبي!
مرت على باله ذكرى سريعه معها كانوا يوقفون هنآ ويرمون الخبز ويسولفون..
وضكتها الخلابه وجهها الطفولي البريئ اللي آسره من آول نظره..!
شاف فيها الانسانه البسيطه البريئه عكس جوآهر..انسانه متكلفه بكل شي وتجردت من برائتها من ثاني اسبوع زواج لهم..وبانت شخصيتها المتملكه الرزينه..اللي تحكم عليه وتنصحه..ورغم انها اصغر منه يحس انها امه بتصرفاتها معاه ونصائحهآ..
يحب عياله كثيـــر ويتمنى يشيلهم الشمس والقمر ويحطها بعيونهم..
بس هي كانت تبعدهم عنه بتصرفاتها ..
يشيلهم..تقوله نزلهم لا يطيحون..
يشتريلهم اي شي..تقول انت تخربهم..
يدلعهم..تقوله يحس بمسؤلية التربيه اللي عليه..!
مايحس انه يحبونه مره هي بعدتهم بحرصها وتصرفاتها!
فحس ان ديم بنته وحبيبته واخته وامه..!
قطع تفكيره صوت اثنين مبين انهم من اهل البلد..
ماسكها من خصرها وهي نايمه على كتفه ويهمس بآذنها وتضحك له..
كانوا عآشقين ومبين الحب بعيونهم..!
تنهد بضيق..:ليــــن متى..!!؟
تركي
"لازم اكلمها لو ماتبيني خلاص تقولي بوجهي يمكن قلبي يسمع منها"
*
نفس المكان مابعدنا كثير الا كم شارع..
طالعه من الكلاس وكتبها بيدهآ..
وجنبها رنا اللي توها متعرفه عليها وحاولت تقنع ديم تتغدا معها
لكن ديم اعتذرت بذوق وتعذرت بآنشغالها بالبحث اللي مكلفه فيه هي وقروب من الطلاب اللي معها..
شافت واحد من القروب متجه لها..
:هلا اخت ديم كيفك؟
ديم:الحمدالله انت كيفك..محمد صح؟!
محمد:اي محمد انا الحمدالله..بس حاب تظبطين موعد عشان نجتمع مع بعض ونسوي العرض..
ديم:خلاص ان شاء الله انا طلعت البحث بس الـــخصه واجيبه معي بكره..ونشوف وش يصير..
محمد:خلاص اوكي شكرا
ديم:آلعفو
وطلعت من بوابة الجامعه الكبيره..وهي تمشي لعمارتها اللي ماتبعد الا كم شارع ..!
وبدت تمشي وهي مستمتعه بهوا لندن المنعش وتطالع النا الماره والجايه والمحلات..
والباصات الحمرا..وتكاسي لندن المعروفه..بشكلها الحلو او "الكيوت على قولة صديقتي =)"
وماتوعى الا بيد تسحبها من خصرها وتكتم صوتها وتسحبها على شارع صغير ضيق..
تبي تصرخ بس هو مسكر فمها بيده الكبيره..!
واخيرا شالها وهمس بآذنها بصوت حافظته ويقشعر جسمها من بحته الحلوه
:يعني لازم نستخدم معك هاللاسلوب..
لفت ولقته مبسم لها بغمازاته اللي تسبب لها حاله من الدوخان..!
ديم رفعت اصبعها الصغير تبي تقول شي مالقت شي ولسانها عجز عن النطق..
مسك اصبعها الصغير بيده وباسها برقه..
:اشتقت لك..!
ديم:................................
:ديوم حبيبي وش فيك؟,مااشتقتيلي؟
ديم هزت راسها بــلا..
لان حست لسانها انشل..
:تعطيني فرصه اشرحلك كل شي..
هزت راسها لا
:ليش؟
ديم وصوتها اخيرا طلع وقال كلام متناقض مع مشاعرها:آكـــرهك..
اثرت هالكلمه عليه حتى لو كانت مو مشاعرها بس عورته كثيــر..
:لازم تعرفين انها كذآبه..
ديم تستوعب وش كذابته ومين هي اصلا بدا كل شي يرجع وطلع صوتها من قهرها..
ديم:خلاص ياتركي بطل كذب ماتتعب مو كذابه انا شفت كل شي بعيوني وسمعتكم خلاص خلاص..!
تركي:خلاص وشو ..؟ خلاص احبك مااقدر خلاص انساك مستحيل..اشرحيلي خلاص وشو؟
ديم:خلاص كل شي هذا الحوار عدناه ستين مره وقلتلك انا مااقدر اكمل معك..!
تركي:وانا وش اسوي اذا انتي ماتقدرين..
ديم والغيره بصوتها:روح لزوجـــــتك وعيآلــك وهم ينسوك..
تركي:مافي احد بهالكون ينسيني حبك..
ضم وجهها بيده..
وهمس بصوت :محــد..!
نزلوا دموعها بس هالمره من مرارة الوداع لان حست انه قرب..!
مسكت يده ونزلتها من وجهها وظلت فتره ماسكتها وهي تطالع بالارض ماتبي تطالعه..
شال يده ورفع وجهها بيده وجات عيونها الباكيه بعينه الحزينه ..!
شافته يبي يقول شي بس عجز..
حست يبي يطمنها بس مالقى شي لان يوم يجي الوداع مايمنعه شي..
تآملته وكآنها تشوفه لاخر مره..
وفاز قلبهالاول مره من كم اسبوع على عقلها..
وضمته بقوه وهو حظنها بيده مايبي يخسرها ويبي يحظنها للابد ويخليها جنبه..ويخبيها جوه قلبه
بس ظروف كثيره وقفت ضد حبهم ..!
رفعت راسها
ديم:ليتني ماعرفت !
تركي:ديم ...نقـ
ديم:لاتكمل تركي تكفى لا تكمل انت عارف مستحيل اللي انت تقوله..
وبعد عنه وهي تكمل:انت عندك عيآل..
تركي:عادي يا ديم انتي حبيبتي ودنيتي وهم بحبونك مثل انا مااحبك!
ديم:اللي تقوله مستحيل ورح تعرف مع الوقت اني نزوه!
تركي:انتي مستحيل تكونين نزوه!
ديم:الايام بتثبتلك كلامي!
تركي:ماابي ايامي من دونك!
ديم ماعاد بلسانها كلام !
وش تقول هي تحاول تسهل غيابه وتكابر وهو قاعد يهدم كل اللي تبنيه وينهي اخر قوة صمود عندهآ..!
ديم:انا اسفه!
دفته بقوه عنها وركضت وهي تسابق دموعها وتسمعه يناديها بس خلاص ماعادت تسمع شي دقات قلبها غطت مسامعهآ..!
وماتدري..باللي صار في حبيبها ورآها..!
لحقها..وصدمه شي اكبر من صدمته لغيابها
*
السعوديه-الرياض
في العماره الطويله اللي تتوسط شارع العـليآ
في آخر طآبق تحديدا..
في المكتب الفخم ..ديكور بالخشب..البني الغامق..
قاعد على ممكتبه بهبته اللي يفز لها مية رجآل..
وجه المدور المليآن وبياضه المايل للحمار..
وطوله وعرضه..ووزنه الكثير !!
هذي بآختصار شخصية وشكل *آبوتركي*
بس له هيبه في شغله وبين عيآله رغم انه نادرا ما يصرخ الا بالشديد القوي!
دق بابه..
:تفضل!
دخل سكرتيره وهو مايحط عينه بعينه خايف..
:طاال عمرك الاوراق اللي طلبتها مو موجوده..
كالعاده يرد ببرود:طيب..
:مالقيتها طال عمرك..
:ابوتركي:طيب سمعتك وش تبيني اسوي؟!
:ولاشي طال عمرك انا اسآلك وش اسوي
ابوتركي:سو اوراق جديده وسكر الباب!
طلع السكرتير المسكين وسكر الباب..
وبنفس الوقت دق واحد من التلفونات اللي عالمكتب
رد بهدوء
ابوتركي:نعم
سمع نص المكالمه وماقدر يكمل آكثر..
قعد عالكرسي وفتح قلابة ثوبه..ويحس الدنيا تدور فيه..!
استوعب كل شي بثانيه..وقام وهو يستجمع قوته..
.
.
.

1\آيش تتوقعون وصل لآبوتركي..؟
2\ديم&تركي ممكن يكونوا انتهوآ؟
3\دخول رنا المفاجئ آيش بيغير؟

آنتظروني في البارت (2)
للفصل آالثاني..

"جمـــعه مبـــآركه

[@جيف هاردي@]

مشكوووووووووووووووووووور

[unlucky boy]

اوووووووووف واخيرا انتهيت من القراءه
كاسيه على الروايه

[Sleepy Princess]

تم نقل الموضوع ليناسب قسمه الصحيح

يرجى الاطلاع على قوانين القسم الجديدة تفاديا لأي أخطاء :) كما يرجى نسب الرواية لصاحبها

وشكرا ~

[ناروتو x ساكورا]

السلام عليكم
ماشاء الله اختي كاتبه القصه بالتفصيل تعبت وانا اقراه ماكملته كامل لانه طويله واجد
بس حبيت اشكرج على المجهو الكبير اللي بذلتيه وعلى الموضوع الحلو
جانا