PDA المساعد الشخصي الرقمي

عرض كامل الموضوع : انا وجدتي ومانشستر



Lelouch <3
18-03-2005, 07:14
طرن طرن

طرن طرن

طرن طرن

<<ياخي رد وخلصنا

انا...الو
المتصل ..هلا نونو
انا ....هلابك
المتصل انا خالك مشعل<<وش رايكم تراني ما جبت من خوالي الا مشعل عشان اسمه كشخه

انا ..والله وماقالت

المتصل كل تبن بس


المتصل اسمع نونو جايك بعثه لشعراء

انا ..الله من زين البعثه

المتصل اسمع امك بتروح هناك عند جدتها لازم تروح معها

انا ..طيب وش يوديني لشعراء ودراستي؟

المتصل.. معليك معليك اسحب على الترم هذا ومالك الا من يجيب لك واسطه وادخلك ارامكو

انا..قل والله

المتصل والله

انا حبك ماجد عبدالله

المتصل كل تبن بس ورح بهلك لشعراء ولجدانهم واجلس سنه فيها ودورلك وظيفه ولا شي

انا ..وين اتوظف تكفى في نادي ثهلان ولا في البقاله الي ما فيها شي

المتصل ..لا رح لدوادمي 30 كيلو باليوم مهيب ضارتك

انا ..تعبيلي بنزين؟

المتصل اها بس اكد عليك انا

انا ..طيب طيب اذا رحت لشعراء ابدور في كل مكان وظيفه وانكاني مالقيت بالدوادمي ابروح لعروى كنت

منول اعرف وحده من عروى يمكن تشغلني ولا شي

المتصل المهم بصرك لو تبي تروح لحويته بس دورلك شغل مالها داعي تجلس عاطل هناك

انا ياخي وش اسوي في الديره تكفى فكني ماابي اروح وانواع الطفش هناك

المتصل اقول تراها ديرتك ولازم تروح وجدتك تبيك ولوها مهيب تبيك كان قلت معليش يروح واحد بدالك(طبعا بيكبر راسي ولا هي ما تبيني ولا شي )

انا ..احلف ؟ خلاص ابروح

المتصل بعدي وانا خالك
انا خال خال خال
المتصل هاه
انا..قل سته
المتصل .سته
انا ..طاح صروالك بالسكه
المتصل الله يعين اهل الشعراء على مصالتك
انا ..تامر شي ياخال
المتصل ..يالله سلامتك وانتبه من الخط والبعارين
انا ..لا معليك محسوبك طاره
المتصل ..طاره وانت قابع امس
انا..اجل منيب طاره
المتصل ياالله فمان الله وانتبه
انا..فمان الكريم يا خالي الكريم<<هها بس
طوطوطوطوطوط

رحت لمي هلا يمه هاه كلمني خالي ويقول رح مع امك لشعراء

امي..ايه وانا امك تكفى رح معي جدتك تعبانه ولافيه احد عندها

طيب يمه الحين ورا ما نجيبها عندنا

امي..هي ما تبي وانا امك
انا..اجل يالله مشينا ..!
امي يالله يا ولدي اصبر ابجيب تمر وابجيب خبز الي حاطته بالكرتون عشان الغنم ياكلونه حسوفه
(طبعا حنا بنروح لمزرعه هناك )

انا يالله يالله انا احتريتس بالسياره
حطيت ملابسي وظبطت شغلي ولبست وكشخت<<هها بس
واركب السياره وادق سلف وتقول شعععن<<كل تبن واخلص بس
وتركب اميمتي ونمشي..
اول ما مسكت الخط واشغل لمي ابن شرهان عشان تنبسط
ويسولف علينا معني منيب افهم شي بس معليه اهم شي رضا الوالده<<ايه هين
يوم وصلت المزاحميه وتقولي امي اباخذلي غطه قلت لها خوذي الي تبين
ويوم وصلنا القويعيه قلت يمه يمه قومي قالت تعيبانه وانا امك خلني ابرقد
قلت بصرتس لوني ماخذ شنطه معي اصرف
المهم ونمشي ونمشي<<يا شين الي ما يدري وش يقول
ومسكنا خط عروى يا سمجه ذاك الخط ما يخلص ابد
ويوم وصلنا لشعراء وندخل عند جدتي واول ما دخلنا اغما عليها انا قلت ماتت قالت امي جده جده قلت ماتت خلاص مشينا<<يدور الفكه
امي..اقول اعقب وخس وشل جدتك

طيب طيب واجي اشيلها وهي الي تفتح قلت يا زقتين ورا مامتي

يتبــــــــــــــــــــــــــع

Lelouch <3
18-03-2005, 07:19
وهي الي ترحب وتهلي هلا والله بعيالي جيتو حييتو<<اكثر كلمه تقولها جدتي اذا شفناها

واسلم عليها واحب راسها وتقول وش اخباركم عساكم طيبين وش الطاري جايين قلنا خلاص يا جده بنسكن عندتس
وهي الي تلخبط وجهها اظاهر انها مواعده واحد <<كل تبن بس

قلت جده وش فيتس قالت صدق والله بتسكنون عندي قلت ما تبينا قال لا هو الا نبيكم ووالله اني مبسوطه ما عندي احد بهالدار جالستن لحيلي
وتنادي شغالتها وشغالتها اسمها مونيكا لا يغركم الاسم قسم بالله هذيك الشغاله اشين شغاله بالعالم اظاهر ان حمزه صالح ازين منها لو تنبطح هي ولا ينبطح حمزه رحت لحمزه
<<اطلع برا
وتقولها تعالي فرشي لعيالي وحطيهم بالغرفه القصيا
قلت لها مونيكا شيلي الاغراض الي بالسياره وتشيلها وتروح تفرشلي بالمجلس واروح ارقد
ويوم قمت باشراقه الصبح المثير والليل العفيف<<كل تبن بس
واقوم والقا فطوري جاهز والشاهي والم وافطر واناظر التلفاز ويوم جلست شوي واجيب السوني والعب مع لحالي ولعب ولعب وفله وحماس واسوي دوري لحالي واعلق عليه انا
قسم بالله بعذري ما فيه شي طفش اروح لجدتي اول ما تشوفني هاه تغديت افطرت تعشيت واذا قلت ايه قالت تسذوب خخخخ وش اسوي فيها
المهم والعب ويوم جا العصر مصيف واركب السياره واروح للبقاله من الطفش لا تشرهون ويوم دخلت البقاله واشريلي ميرندا وببسي<<سبهه
ويوم طلعت من البقاله واقعد ادور لحيلي واشطف النادي حقهم من بعيد وانا الي اقز لي ناسن يلعبون قلت يلعن ام الفله وادخل عليهم واشربك (قسم بالله استانست لقيت احد يلعب واحد اسولف معه )
وادخل عليهم السلام عليكم وهم وعليكم السلام يالله حيه الله يحيكم ويجيني المدرب حقهم المصري اهلن عاوز حاجه انا ..لا والله بس حبيت اناظر اللعب والتمارين ..قالي لا ما تشوف تمارين الفريق شكلك جاسوس من نادي الدرع
انا ..اقول تمسك بس يا يوفنتوس تراكم ثهلان يعني زلايب قال انتا من اهل الديره قلت ايه من اهل الديره قال اها خلاص ناظرنا وحنا نتمرن قلت انا الله من زين التمارين احس واحد فيكم يعرف يرمي اوت زين
المهم ويجمع فريقه ويسوي خطه طبعا عندهم مباراه بكره مع الدرع الي هو الديربي حقهم هذا بالشعراء وهذا بالدوادمي ويسوي معهم خطه ويسوي تمارين وشوي ويجي واحد بيشوت فاول وانعفطت ركبته وجاه رباط ويصارخ اااااه ااااه اييي وانا اقول ساد هذا الي فلحنا فيه من لعب الكوره<<ابد حركات عمه
وتقفل مع المدرب ايه دا ايه دا هوا دا وئته وياخذونه ويودونه للمركز الصحي الي بالشعراء ولقوه صاك زي العاده
ويروحون به لدوادمي لمستشفاهم الي مره رحتله وفيني شق في يدي وخاطو الشق ويوم وصلت الرياض صار يوجعني ورحت لمستفى بالرياض قالي بالله عليك من الي خايط لك الجرح امك؟؟
قلت لا والله مستشفى قال هذا والله مهوب خياطة مستشفى قلت وش اسويلهم طيب اقولهم خيطوني زين
المهم نرجع لمحور حديثنا ويوم ودوه وقالو فيه رباط صليبي ويقولهم المدرب يعني ما يقدر يلعب منا ولا منا لو نخليه حارس بس يلعب ناقصين وانا كنت جنبه قلت ياخي رباط صليبي اقل شي اقل شي 6 شهور وتبيه يلعب بكره تبطي يا شيخ
قال ايه العمل دلوئتي قلت جربني قال ما سجلناك ولا شي قلت بس الحين دق على ريسكم وقله يسجلني قال عندك صور قلت وشي ذاك وذاك
قال هوا ايه ذاك وذاك قلت لالا امزح قال معك صور ليك ولا لا قلت ايه ايه معي قال تمام التمام
ونروح لريسهم هالكلام كان بالمغرب ونطلع له وقاله السالفه قال طيب هو يعرف يلعب قال المدرب خله بس لو يمسك خانه ويوقف ما عندنا لاعبين زايدين قال طيب تأكد لي يمكن يصير زلابه وانا الي اقوله من زينك انت وناديك يومنك تزقق علي وتقعد تقول تأكد تبي تلعبني لعبني ما تبي تقلع
قال خلاص خلاص يلعب وخلوه هجوم عشان ما ينكبنا بالدفاع قلت خلاص معليه المهم قالي يالله بكره العصر تجي ومعك رياضتك وكنادرك وشرابك
قلت ابشر المهم جا بكره <<على طول ويوم جا الظهر وانا اسخن بالمجلس واوسوس اقول اما لو اجيب هدف قسم بالله ياهي وناسه وانواع الوسواس ويوم جا العصر والبس واكشخ واروح لهم ويوم وصلت وسخن واركض جايهم وانا متحمس ويقولي المدرب شف جا لاعب كان غايب له ثلاث شهور وجا تو قلت يعني وش تلمح قال لالا ما تخفش ابلعبك شوط وهو شوط قلت اهم شي العب وبس
قال ايه معليك المهم ونسخن ونراكض ويوم جا الليل ويجون الفريق الثاني ويسوي لنا خطه المدرب 5-4-1 انا لحالي هجوم قال يالله شوط وتطلع وعساك بعد تكمل الشوط قلت ابشر ويصفر الحكم واتذكر سامي يوم يطيح ويجي له بلنتي وجاب هدف وفازو واول ما دق الكوره طحت قلت بلنتي بلنتي<<كل تبن بس
والمدرب يوم شافني كذا ويقوم هذاك ويقوله سخن سخن هذا ما وراه الا الضعوي
المهم وتجي معنا الكوره ويقعد واحد يتفلسف ويسحب انا مخليني صفر على الشمال لو يشوفوني منفرد والحارس متقدم وما فيه الا انا ما عطوني الكوره ويوم جت الدقيقه 30 وكل شوي اصير لحالي ولا يناولون اثرن المدرب الوصخ قايلهم اصفطوه شكله زلابه وتقفل معي واخش على الفريق الثاني واجي ابقطعها ويشوتها وتصقع فيني وتدخل قول ويجون فريقي ويتفلون علي يقولون انت وجه لاعب
والمدرب يناظرني ويسوي حركه وصخه المهم ونسنتر وكانت الدقيقه 35 وتجي معي الكوره واسحب بالاول والثاني والثالث وانا اسحب اتذكر سعيد العويران يوم يصدم لاعبين بلجيكا واشوت الكوره وانا ما اادري وتجي بالثمنيات وهدف المدرب انهبل اول ما جبت هدف رحت لريس الفريق الثاني وادلع لساني يقالي ابقلد قهوجي والمدرب يصفق يصفق يا لعيب يا لعيب قلت داري داري <<يا شين الي يسوي نفسه
ويوم جت الدقيقه 44 ويجي واحد من فريقنا ويرفع واجي انا واطقها بالراس وهي الي تدخل انا منيب اسمع بالملعب الا المدرب يصارخ يقول دنتا لعيب يا ولد واروح وافصخ فنيلتي واركض للجمهور معن ما حضر بالمباراه احد بس رحت وش اسوي
ويصفر الحكم وينتهي الشوط الاول واروح للمدرب ويجيني يركض دنتا فنان دنتا لعيب يا وله قلت هاه ابلعب بالشوط الثاني قال افا عليك قلت شكرا قال بس اوعدني بهدف قلت معليك معليك انا اذا تحمست وخرو عني

يتبع

Lelouch <3
18-03-2005, 07:21
ويبدا الشوط الثاني ويدقون لي واشووتها من بعيد لأني شفت الحارس متقدم وتجي هدف انا انهبلت قلت يلعن بليسي اثرني فنان ويطب المدرب ويحببني ونلعب ونلعب ونلعب وقضت المباراه وفزنا
اول ما قضت المبااراه جاني المدرب قال انتا واد فنان انتا واد راعي كوره انتا واد لعبك يذكرني برونالدو قلت له رونالدو البرازيلي ولا البرتغالي قال تعرفهم (طبعا قالها وهو منهبل لانه جالسن بالشعراء واهل الشعراء ان تهورو عرفو محمد عبدالجواد )
قال لالا انتا لازم تلعب معنا كل يوم خلاص بتصير معنا اساسي قلت والله ما هقيته(يلعن بليسي صرت اتغلى عليهم ) قال لا لا لازم تجي قلت ابشر ابشر وبعد ايام طوال وبعد ما صرت اتدرب معهم وافت معهم وصرت احسن واحد فيهم
ويوم من الايام قالو بيجون الهلال قلت ويش قالو الي سمعته قلت يا سلاااااام ابي العب مع فريق قوي مهوب تجيبون لي عفيف نعطيهم سته وحنا متسدحين ولا مصده اذا ما تهاوشنا معهم ما صارت مبااراه
قالو ترا المباراه بكره قلت خلاص بكره وانا عندكم وويوم جا بكره وانا متحمس وامي تدعيلي واروح لهم العصر ونتدرب ونخطط والعب انا هجوم كالعاده
ويجون الهلال ونسلم عليهم المهم ونلعب ويسنترون هم ويلعبون ويفتون هبلو فينا ومهارات وكل شوي انفراده لكن حضنا ملعون والدين
وتجي هجمه ويشوتها سامي وتصقع بالعارضه وتردد وتجيني وقدامي المفرج وانا الي اسحبه على وجهه وانفرد ويجي قدامي الدعيع وانقشها من فوقه مدري وشلون وتدخل قول وانا الي انهبل واروح لزاويه اسوي حركة النجيريين وارقص وانا ارقص شفت واحد يناظر من بعيد شعره اشقر ويلبس نظاره ويصفق انا ماش ما جازلي قلت وش يبي ذا الاشقر ما قد طب الشعراء واحد اشقر من عام 1388 والاشقر ذا كان شاطف الشعراء بس
المهم واكمل فرحتي ونلعب شوي ويجينا فاول عند خط الثمان طعش ويجي واحد قال خلوها خلوها قلت اها بس انا الي مسببه<<حركات مبزره قال طيب وش علي منك انا قايل اول كلشي<<اطقع مني
قلت يالله بس ...المهم ويحطون حايط وانا الي اوقف وقفه الاسد حينما يطلع من عرينه<<هها بس واشوتها وهالي تصفق بلعارضه وتنزل للباب وهدف واروح لنفس الزاويه مهوب عشان افرح بس حب خبر عاد انتم خابرين اهل الشعراء حب خبر وافراح واناظره وهو يصفق وكان الجو بالليل ولا فيه انوار ولانيب اشوفه زين
ويقضي الشوط الاول ويبدا الشوط الثاني <<ممداه ونلعب ونلعب ويجي لهم بلنتي ويشبكه شويش الثنيان
ونلعب شوي وتخلص المباراه ويفرح مدربنا ويناقز ويجي يقول انتا فنان انتا احسن واحد بالعالم قلت شكرا شكرا ويجي ذاك ابو نظاره يمشي من بعيد قلت للمدرب ياخي ذا قاهرني اشقر وجاي الشعراء قال مين ده
قلت والله مدري منهو خله يقرب ونعرفه ويقرب ويقرب واناظر وانا منهبل قلت لا مش معئول<<كل تبن بس ويقرب ويقولي انتا فنان طبعا بالانجليزي قلت وش جابك قال المدرب حقنا من ذا قلت هذا اليكس فيرقسون قال حق مانشيستر قلت ايه ايه قال وش جابه قلت وانا وش يدريني عنه وامسك اليكس قلت يالله حيه قال الله يحييك ويبقيك<<ايه هين المهم انا كنت اعرف انجليزي شوي واسولف وشوي ولاني تلخبطت معد ادري وشو يقول وادق على خالي قلت خال خال فيه واحد ما يعرف الا انجليزي ولا يعرف عربي
قال وش ابيبه قلت ترجملي وش يقول قال منهو قلت خذه خذه قال اقول ضف وجهك انت وياه قلت مهوب هندي انجليزي قال انت وينك قلت بالشعراء قال وش جاب هالانجليزي عندك قلت كلمه وانت ساكت قال عطيناه ويكلمه الو ..الو
خالي ..هاي
اليكس ..هايات
خالي..قاله سم امر وش بغيت طبعا بالانجليزي
اليكس ..شف يا ابو عبدالله ولد اختك شفت لعبه قبل شوي في نادي ثهلان وجازلي
خالي ..وش جابك لثهلان
اليكس والله جيت كنت ابشوف لعب فهد المفرج يمدحونه
خالي ..الله من زين الاعب...ايه اسلم وبعدين؟
اليكس وشفت ولد اختك سحب المفرج على جبهته ومدام نستروي مصاب خلنا ناخذ ولد اختك
خالي ..وييييييييش نستروي من انت؟؟؟؟
اليكس ..معك اليكس فيرقسون مدرب مانشيستر
خالي..ونعم والله
اليكس ما عليك زود
قال خالي وتستاذن مني انت وراسك خذه من الحين
اليكس خلاص اباخذه ويصك السماعه
ويعطيني الجوال قلت وش قالك وقعد يبربر علي بالانجليزي وانا الي ادق على خالي
هلا خال وش يقول؟؟ قال يبيك تجي مانشيستر قلت وشو وش يجيبني لهم منيب اعرف الحق كور
قال لا يا سبهه بيحطك مكان نستروي قلت وشوووو؟؟؟ قال الي سمعته قلت طيب طيب قله بيجون معي اهلي
قال ايه صح نسيت واعطيه جوالي قلت خذ خذ يبيك ويكلمه وقاله ترا بياخذ اهله وجدته وجدته ترا على كرسي
قال اليكس لو يجيب معه كل الشعراء قال خالي ..والله؟؟
قال اليكس اقول لا تصدق
قال خالي خلاص متى بتمشون قال اليوم انشالله قال حجزت بالطياره (طبعا صار عندنا مطار جنب الشعراء )
قال لالا ابوديه على الطياره حقتي موقفها عند الرجيمات
قال خالي الله يستر عليكم
ونركب انا وامي وجدتي وفيرقسون وتركب جدتي وفيرقسون يضحك يقول از بيوتفل وانا اقوله ايه هين
وتشوفه جدتي قالت وشذا الاشهب قلت هذا الي بيخليتس تمشين قالت ما يعقب الاهو قلت انشالله
ويوم وصلنا لنجلترا وتشوف جدتي هاك الخضار والحياه والفله وهي الي تمشي من الفرحه
قلت احلا مشيتي قالت الي يشوف هالحياه ما تبيه يمشي ونروح مع فيرقسون ويورينا الديره ويورينا النادي والفله
وقال شف يا ادريان ترا بكره مباراه ولازم تلعب قلت وشلون قال معليك انا عندي واسطه وظبطت وضعك قلت تكفى توسط لولد خالي عسكري بالبحريه وتوه متوسط ولاعنين جده النهائي ياخي تكفى خله ملازم
قال كل تبن بس
ويروح يدخلنا فندق وش كبره وجدتي منهبله وتقول هذا كله لنا قلت ايه ايه قالت مونيكا قلت مونيكا عندهم وحده زينه مهوب الي عندتس شدهه
وندخل الغرفه الي اكبر من بيتنا ويجلسون اهلي ويناقزون على السرير
واروح انا واليكس فيرغسون ويلبسني فنيلة مانشيستر ورقم 21 والبس كنادر نايك واكشخ وادخل على التمرين والقا الي يفتحون النفس ويجوني الفريق ويسلمون علي وانا الي ادقر مع الن سميث قلت يلعن ام القطعه
ويسلمون علي ويبربرون علي باالانجليزي وانا اقولهم ايه ايه ونفرق ونسنتر ونلعب وافت عندهم واسحب فيهم صرت اطق رونالدو بصبع
وجا بكره ولعبنا مع الارسنال وانا ما لعبت الا ابالشوط الثاني اخر ربع ساعه وكانت صفر صفر ويوم دخلت حركت الملعب وافت واجيب هدف من خط الثمان طعش ويفرح اليكس فيرقسون ويفوزون ما نشيستر ويرفعوني
وصارت جدتي من المريشات في انجلترا وصارت ديانا حقتهم

ما يستفاد من القصه
كنت فاضي ولا فيني النوم والعيال كلهم نايمين ولا فيه قايم الا انا وقلت خلني اكتب قصه قصيره<<<ايه هين
هذي اول قصه لي بحياتي اكتبها يعني الله الله بالترييش لا تحطمون تكفون

ملاحضه... الشعراء: ديره تقع بالسعوديه وبينها وبين شقرا 80 كيلو وبينها وبين الدوادمي30 كيلو

وتحياتي لكم واسف جدا جدا على الاطاله
وتصدقون ما قد كتبت موضوع ودخل المميزه <<ما يعرف يلمح

FRIEND
18-03-2005, 07:22
أنصحك بتصغير توقيعك .. أو رفعه .

لم أقرأ الموضوع لإني مستعجل .. بعدين

Lelouch <3
20-03-2005, 14:07
ياهلا والله بأخوي عذرا ترا الموضوع يضحككككككك


اقروه تكفون تراني تعبان عليه

Anastasia
21-03-2005, 13:02
ههههههههههههههههههههههههههههههههه

أحب المواضيع اللي زي كذا .. كلها سواليف و ضحك و فله هههههههههههه

بس ياليت لو تلون الخط و تحط مسافات .. و علامات الترقيم .. و إبتسامات

يعني تسوي زخرفه للموضوع ... عشانه كذا يتعب العين و يجيب الملل لبعض الأعضاء ..


أنا من المشجعين لهذي المواضيع ...

أتمنى لك التقدم ^-^

ثانـــــــــــــــــــــــكس

بايوووووووووووووووو

Eveline
21-03-2005, 13:55
لوووووووووووووووول

حلوه القصه وخصوصا جدتك^_^

Lelouch <3
21-03-2005, 14:53
تسلمووووووووون على الردود الحلووه



بس ياليت لو تلون الخط و تحط مسافات .. و علامات الترقيم .. و إبتسامات

يعني تسوي زخرفه للموضوع ... عشانه كذا يتعب العين و يجيب الملل لبعض الأعضاء ..


بس هاذا الطلب انشالله

اذا كتبت موضوع ازخرفه

وتسلمين على الرد



لوووووووووووووووول

حلوه القصه وخصوصا جدتك^_^


تسلمين اختي على الرد الحلووووووووووووووو

Sweet^-^Lolly
25-03-2005, 17:28
هههههههههههههههههههههههههههههههههههههههههههههههههه

منسدح بلبلكونة
الاسم فلــــــــــــــــــــــــــــــــــــــته بس مو كانه فشيلة السطح ابرك >>> تذكرت السطوح حقت الشات



اول ما مسكت الخط واشغل لمي ابن شرهان عشان تنبسط

اثر هذي مو ازمتي لحالي كل الاهالي تحبه اللــــــــــــــــه يعيننا


ويسولف علينا معني منيب افهم شي بس معليه اهم شي رضا الوالده

طيب خلها تترجم لك انا وقفت لامي في حلقها كل شوي ما وش يقول مما وش معنى زين انها ما شاتتني



وهي الي تلخبط وجهها اظاهر انها مواعده واحد <<كل تبن بس

افااااااااااااااااا مو عيب عليك هالكلام



منها لو تنبطح هي ولا ينبطح حمزه رحت لحمزه
<<اطلع برا

يالله اشوف بـــــــــــــــــرا بسرررررررررررررررررررررررررعة شباب آخر زمن >>>> لا تزعل


مشكووووووووووووووووووور اخوي عالقصة وصادقة انستاشيا لو انك سويت كذا وكذا كان طلع ذاك الزين



تشاااااااااااااااو

honeyالحلوة
29-03-2005, 13:38
ههههههه


واااي انتا مررره حلوة السواليف


شكرا

Lelouch <3
31-03-2005, 18:51
حزب الحلويات
لا للإرهاب ...لا للتماسيح ...لاللـ ......


اقووووول الا التماسيح عندنا منتدى اسمه تماسيح


تسلمون على الردووووووووووود الرائعه

][ N S Y N C ][
04-04-2005, 08:49
بصراحه منسدح

مع انك صورتك الارسنال بس لعبت مع الماشتسر ولا طلعت الا فانستروي :)

بس من جد قريت القصه كلها والثانيه بعد حقت فرنسا <----- قاعد في الدوام ماعنده شغل وقراهم :)

يعطيك الف عافيه

وكلامي من كلام انستازيا لو تحط مسافه بين السطور على الاقل يكون احسن

Sweet^-^Lolly
04-04-2005, 11:23
يا متسدح انت تدري وش سويت فيني

غلطت غلط سخيــــــف في اختبار الجغرافيا بسببك

عطتنا سؤال وشو محافظات الرياض هو سؤال اكثر من غبي

رحت الذكية ان كتبت الخرج وشعرا


شعرا

من وين طلعت هذي المحافظة



منك انت

وهي غلط

حسافة ماني ماخذة 15


بايو

Sweet^-^Lolly
04-04-2005, 11:28
وعلى فكرة ما تعرف وشو التماسيح

التماسيح = العيال

وللاسف الشديد السحالي = البنات


تشااو

Lelouch <3
14-04-2005, 04:15
كخخخخخخخخخخخخخخخخخخخخخخخخخخخخخخخخخخخخخخ


الشعرا مافيها محافظه ليش ماقلتي الدوادمي ههههههههههههههههههههههههههههههههههه


داري شوفي توقيعي


هاذا الاول

http://mohmad666.jeeran.com/المحشش1.gif

الثاني

http://mohmad666.jeeran.com/تمساح-مهبط.gif