و

[***شوق***]

في جامعة الملك عبد العزيز ...كلية الصيدلة قسم الطالبات ...
رولا : والله الاسبوعين الاولى مروا بسرعة ...الدكتور لمن قال لنا الاسبوع الجاي اختبار ما صدقت ...حسبته بيمزح ...
رزان : من جد ....تصدقي كنت حاقول له بدري يا دكتور لسه احنا في اول اسبوع ....ههههههههههههههه
ندى : هاااااااااااااااااااااااي صبايا ....كيفكم؟؟ ( ندى صاحبة البنات بس من كلية التمريض )
رزان : طيبين ...انتي كيفك ؟؟ فينك غايبة اسبوعين عن الجامعة؟؟
ندى رفعت يدها توري الخاتم ( الدبلة ) للبنات : والله انخطبت في اخر الاجازة ...قلت خليني اتدلع شوية ...
رولا فرحت لندى خصوصا لمن افتكرت نفسها كيف اول ما انخطبت لايمن و كيف كانت مبسوطة معاه طول التلاتة اسابيع حقت الخطوبة ....من جد ايام حلوة ...الله يرحمك يا ايمن ...
رولا : مبروووووووووك يا ندى ... والله فرحتلك
ندى : الله يبارك فيكي و عقبالك
رزان الوحيدة اللي كانت تعرف بحكاية رولا و ايمن , و كانت خايفة على مشاعر رولا
رزان : مبروووك يا ندى .....ان شالله نتقابل في يوم تاني تحكينا الاخبار بالتفصيل الممل ....دحين عندنا معمل و اتأخرنا عليه ....يللا يا رولا اتأخرنا
رولا : يللا ....بااااي ندى
ندى : باااااااااي .
(هما مالهم بينا يا ليل .. ليه شاغلهم شوقنا اللي واخدنا ...يحسدونا و ماله يا ليل ... اللي غيران منا يقلدنا .. ) جوال رولا يدق
رزان : حركااااااااات ...مين هدا ؟؟
رولا : ريان ...اصلا كل اولاد العيلة متفقين نحطلهم هادي الاغنية لأنهم مررررة يحبوها ..
رولا : الو
ريان : الو ...كيفك رولا ؟؟
رولا : الحمدالله كيفك انت ؟
ريان : بخير ... كلمتك خالة ايلاف ؟
رولا : ماما ؟؟؟؟ لأ ..ايش في ؟؟خير ؟؟
ريان ( يا ربي ايش هادي الورطة ) : ها ؟؟ لا و لا شي ...بس قالتلي انها حتحتاج السواق طول اليوم و قالتلي انا اللي اخدك من الجامعة اليوم ..
رولا : الحمدالله ... والله خوفتني حسبت شي صار في البيت ...طيب خلاص انت متى تخلص من الجامعة اليوم ؟؟
ريان : دحين الساعة عشرة ...اممممممم على الساعة واحدة ان شالله اخلص .
رولا : من جد ... أنا عندي محاضرات الين الساعة 3
ريان : طيب عادي ... استناكي الين الساعة 3 ما عندي شي ..اوكي باي
رولا : باي
رزان : خير ؟؟ ايش في ؟؟!!
رولا : هدا ريان ...يقول انه هو اللي حياخدني اليوم من الجامعة ..
رزان : يوووووووووه ...كنت ابغى ارجع معاكي اليوم ...سواقنا رح يجيب بابا من المطار .. ولا زم يكون عنده الساعة 3
رولا : اوكي عادي ...اوصلك مو بيتك جنب بيتنا عادي
رزان : لأ ما أبغى ...انكسف اركب مع ولد خالتك
رولا :رزااااااااااااااااااان بلا مجاغة ....انتي صاحبتي من زماااااان ...و كل العيلة يعرفوكي ...حتى ريان و هتان و احمد كلهم يعرفوكي يعني ما فيها شي ...عادي اعتبريهم اخوانك ...
رزان : الله يفشلك ان شالله ....ايش تحكيهم عني ؟؟؟؟
رولا : هههههههه ... كل شي ..حتى المواقف الهبلة حقتك احكيهم هي...ههههههه
رزان : الله يفشلك يا شيخة ...هيا دحين من جد ما رح ارجع معاكي ...من جد فشلة ..
رولا : اصلا مو بكيفك ..يللا يللا ادخلي اتأخرنا على المعمل ..
جات الساعة تلاتة ....و جا ريان ياخد رولا من الجامعة.....
في السيارة .......
ريان : يللا يا رولا انا برة عند البوابة الغربية ..
رولا : اوكي ...انا خارجة .
ريان بيفكر ( مين هادي اللي مع رولا ....يوه الله يستر لا يتخرب المخطط حقنا كله )
رولا بتفتح الباب : اهلين ريان ..... اسمع هادي صحبتي رزان جاية معانا ما في احد يوصلها ... بس بيتها قريب من بيتنا ...طيب !؟
ريان ( اففففففففففف ) بابتسامة : الله يحييها
و راحت رولا فتحت الباب اللي ورى لرزان و جات بتركب جنبها ....
ريان : نعم ..خير خير خير ...على فين انشالله ...رولا أنا سواق ابوكي ولا سواق أبوكي...
رولا : وي بسم الله ....اكلتني ...ايش في ؟!
ريان : رولا لو سمحتي امشي اركبي قدام .
رولا : لييييييش ؟؟ ابغى اركب جنب صحبتي..
ريان : لا معليش انا اسف .... ما أقدر ...اركبي قدام يللا بسرعة شوفي السيارات كلها ورانا ....بسررررررعة
رولا : يوووووووه طيب طيب ...
و ركبت رولا قدام و رزان ميتة من الضحك عليها...
و في الطريق .....في شارع الأندلس عند الاشارة ...لف ريان يسار ..
رولا : ريان ...ايشبك بيتنا مو من هنا ؟!
ريان : عارف ...انتي ايشلك ؟! انا حأوديكي من طريق مختصر ..خلاص...
رولا : ايشلي ..ايشلي .. انت حر
وقف ريان عند مطعم تشيلز ... وقفل السيارة ..
ريان : يللا انزلوا ..
رولا : نعم ؟!
ريان : انزلوا انا مرررررة جيعان و نفسي في بطاطس مقلية بالجبنة .
رولا : طيب و البنت اللي راكبة ورى ..
ريان : تنزل ..تنزل حتنبسط .
رولا لفت و جهها على رزان : ها رزان ننزل شوية ...عادي؟؟
رزان و هي فاتحة عيونها عالأخر ( مفرصعة ) و معصبة من رولا : انا اتأخرت على البيت ..ما أقدر
ريان الجفص ( محد قلك تجي معانا ) : يعني انا اموت من الجوع يعني...المهم انا نازل اكل و يمكن اتأخر ....ما تبغوا تنزلوا بكيفكم .....و على فكرة ما في مكيف ..رح اقفل السيارة عشان البطارية ..
رولا مصدومة من ريان : وي وي وي ...يا ولد البنت معانا لا تفشلني ..
ريان : مو هادي رزان الهبلة اللي دايما تحكينا عنها ....خلاص هي زي اختنا من سنة جدي و انتي صحبتها من ايام ما كنتوا في الابتدائي ....يعني ما فيها شي ....ها ؟؟؟ نازلين و لا لأ؟؟!
رولا و رزان استسلموا لريان و دخلوا المطعم ...
__________________________________________________ ___
في المطعم......
اول ما دخلوا المطعم ....و جلسوا على الطاولة ...قام ريان نادا الجرسون و طلب الاكل اللي يبغاه ..و رزان و رولا طلبوا عصير بينا كولادا...
و فجأة سمعوا ضجة و هيصة ...و اتلموا اللي يشتغلوا في تشيليز ...و غنوا اغنيو عيد الميلاد ...ووراهم رانيا و ليال و أحمد و تبيان ووليد و مؤيد و هتان
و رولا بتضحك و فرحانة و مررررررة مبسوطة لأنها أول مرة يسوا لها كدة و ما كانت متوقعة منهم ابدا هادي الحركة ....
رانيا: ها عجبتك المفاجأة ؟! ترى هادي فكرتي ... وأنا اللي خططت و رتبت لكل شي...
ريان : احم احم احم ...لو سمحتوا انا اللي نفذت و خطفتلكم هي ..
رولا : تصدق يا ريان اول مرة احس انه لك فايدة في الحياة ....و بديت استلطفك...
ريان طالع في ليال اللي انقلب وجهها ......
ريان بيغير الموضوع : ايوة يا جماعة ترى رزان ضيفة الشرف حقت الحفلة ...
البنات: رزااااااااااااان ... سوري ما انتبهنالك ...كيفك ؟؟ والله شرفتينا ..
أحمد باستهبال : رزاااان ... ايوة صح ما انتبهنا لك ...والله شرفتينا يا مزة قصدي يا رزة ...
رزان وجهها حمر ...
ليال بتكلم احمد بصوت واطي:الله يقطعك انكتم شويه فشلتنا...خلينا ناخد عليها وجه شوي ...و سيب البنت في حالها ...
أحمد طنش اخته كالعادة ...ولا كأنه قالتله شي ...
تبيان : ليال ....ايشبك زعلانة ؟؟ ليش وجهك مقلوب..
ليال : ها ...لا ولا شي ....يللا يا رولا قطعي الكيك ...
تبيان : لأ اول شي نفتح الهدايا...يللا يا رولا افتحي هديتي انا اول ....بلييييييييز
رولا : طيب ...هاتي خليني افتح ....الله واااااااااااو واااااااااااااو ....توتة مررررررررة ثانكس على اللآي بود ( جهاز تشغيل اغاني و فيديو كليبات ) و كمان باللون اللي احبه الفوشيا ...مرررة شكرا
هتان : يللا دوري ....افتحي هديتي ....
رولا : ياااااااي محفظة من فندي يالله ... كلك زوق.
ريان : و هدي هديتي انا و احمد .. اتفضل ياجميل ..
ليال بضحكة صفرة : اتفضل يا عسل .....
رولا : آآآآآآآآآآآآآآآآآآآآآآآآآآآآه ... جواااال لالالا عمري ما اتخيلت يجيني جوال هدية (ان 72 لون بينك )
ليال : يلا خلصونا .. جا دوري .. انشالله تعجبك ( قامت من مكانها و باستها)..
رولا : فاكرتها يا دبة والله كنت خايفة تروحي تشتريها قبلي ( نظارة أرماني لونها بني )
رانيا : رولا حبيبتي.. سوري ما لحقت أجيبلك هدية يا دوب خططت للحفلة ...
رولا : عادي عادي يكفي الحفلة الحلوة اللي سويتيها .. أنا مررة مبسوطة .
رزان : أنا اللي من جد متفشلة .... امممممم انشالله تعجبك هديتي البسيطة اتفضلي
رولا مصدومة :ياكلبه يالله مره مو على بالي انك اصلا تدري عن الموضوع والله انكم ماتستحوا..
كانت الجلسة حلوة و الكل انبسط و اتصوروا و اتغدوا و بعدين اكلو الكيكة ..
في بيت عيلة فارس ( ابو وليد ) ........
رولا كانت في غرفة رانيا ....
رولا : شكرا يا رانيا على الحفلة الحلوة هادي ...بصراحة انا كنت محتاجة لتغيير الجو اللي انا فيه ....مذاكرة و اختبارات و طفش ...
رانيا : انا نفسي اعرف انتي ايش دخلك الكلية هادي اللي من 3 سنين و انتي كل يوم اختبار ...ايش هدا الايام تخلص و الاختبارات ما تخلص .....على العموم انا اصلا يا رولا حالك مو عاجبني بالمرة ...قصدي ...بعد ايمن ....انتي مررررة اتغيرتي يا رولا ...و انا ...مو بس انا ..احنا كلنا نبغاكي ترجعي زي اول ...فرفوشة و دايما الضحكة على وجهك ...
رولا : انا عارفة يا رانيا ...والله بحاول ...بس التجربة اللي مريت بيها مو هينة
رانيا : الله يعينك ان شالله ...و احنا حنفضل جنبك الين ما تعدي من هادي المحنة.. اقولك يللا قومي انقلعي روحي غرفتك ابغى انااااااااااام مررة تعبانة ...
رولا : وي بسم الله ...طيب لا تدفي ....يللا تصبحي على خير ...وثانكس على الحفلة ...
رانيا : وانتي من اهله ...
راحت رولا على غرفتها و اول ما فتحت الباب .....
وليد و مؤيد بصوت عالي : سربراااااااايس..
رولا : بسم الله فجعتوني..
رانيا من وراها تضحك : ههههههههه لسه ما خلصت الحفلة ...
رولا : شكلها السهرة صباحي ..
وليد : يعني ما سألت عن هدايانا ليكي ...ولا تحسبي ما في هدايا
رولا : والله ما حبيت احرجكم قدام الناس و اقولكم ليش ما جبتولي هدايا ...
مؤيد : هادي فكرة رانيا الهبلة ...
رانيا : يا قليل الحيا أنا هبلة ....طيب انا اوريك ...
وليد : لا عداك العيب ...هو مو قصده انتي الهبلة ...هو قصده فكرتك اللي هبلة ...ولا مو ؟؟!! و يطالع في مؤيد و يضحك ....
رانيا : لا يا شيخ ....والله فكرتي احسن فكرة .....انا قصدي انه عشان الحفلة تستمر ...مو بس تخلص في تشيليز و خلاص ....
رولا : يوووووووه خلاص حتقلبوها مضاربة ....و بالعكس فكرتك يا رانيا مرررة حلوة ...عجبتني ..
رانيا مدت لسانها لأخوانها و ضحكت ....
وليد : شوفي يا رولا انا جبتلك الهدية على قد فلوسي .....لأنه بصراحة انا صرفت كل فلوسي على سي ديهات أغاني و افلام ...
رولا : عادي أي شي منك حلو ...و اكيد حيعجبني ....ممكن افتح الهدية دحين ؟
وليد : ايوة....اتفضلي ...
رولا : يااااااااااااي عطر من جيرلان ( انسولانس ) تصدق اليوم شميته عند صحبتي و مررررة عجبني ...ثانكس ...بصراحة ما اتوقعتك تعرف تشتري عطور ...
وليد : هههههههه... لا طبعا ..ما اعرف ....هادي ست الكل ماما هي اللي اختارته ....
رولا : ماما ....الله يخليها لينا ان شالله ...
مؤيد : وانا هديتي هادي اتفضلي ....
رولا : واااااااااااااو علبة مليانة حلويات ....يااااااااااي شوكولاتة هيرشي ....مررررة طعمة هديتك يا ميمي ....خد هادي مني بوسة ...
رانيا : ميمي .....ترى مرررررررة ما يليق عليك ....على العموم شوفي هادي هديتي ...( كانت هديتها فستان ناعم من كارن ميلن )
رولا : الله ...شكرا يا رانيا هديتك مرررة حلوة ....بصراحة الفستان مرررة رووووووعة ...الله يخليكم ليا يا أخواني و ما اتحرم منكم ....
وليد : ايشبك كده سرتي تتكلمي زي ماما ....
رولا : لأني اكتشفت انها اهم و احلى دعوة ...
رانيا : انا جعت ...ايش رايكم نقضي على بقايا الكيكة اللي تحت ....
وليد و مؤيد : يللا .....