PDA المساعد الشخصي الرقمي

عرض كامل الموضوع : دمووووع



فاقدة البسمة
18-11-2003, 08:22
السلام عليكم ورحمة من الله وبركاته....


إخواني حبيت أنقل لكم هذي القصة وبنزل كم من جزء وقولولي رايكم لو ما عيبتكم ما بكمل نقل....وإذا ما عيبتكم قولولي ..... وأبطال القصة بتتعرفون عليهم من خلال القراءة....

في غرفة ريم وفطامي....

ريم: فطيم عطيني زليقي بسرعة الباص بيي...

فطوم: والله أنا أبى أسحي شعري حبيبتي علينا حصة رياضة، روحج خذيه..

ريم تربع في الغرفة وفطوم تتعدل ...
ريم وفطوم يركبن الباص ...

ريم: السلام عليكم ورحمة الله وبركاته...

مجموعة البنات... يردن السلام...

يلست ريم بكل هدوء عدال ربيعتها منى ...

منى: شحالج ريماني...؟
ريم وهي تبتسم: الحمدالله بخير...
منى: ذاكرتي حق امتحان التاريخ؟
ريم: هيه ذاكرت...
منى: أقول كم في خاطرج تيبين في الثانوية العامة؟
ريم سكتت كأنها إنهمت وقالت: تعرفين أنا أتمنى أييب نسبة عالية...
منى: يارب يا ريماني تيبين نسبة عالية...
ريم تضحك: وإنتي بعد يا عمري...

نزلن البنات من الباص وراحن لصفوفهن في صف جوم فطوم...

المعلمة: عللي علم الإجتماع علم موسوعي؟ فاطمة محمد ....
فاطمة وين بدنيا غير هذي الدنيا ...
واقتربت المعلمة من فاطمة وقالت لها:وصرخت فاطمة محمد؟
فاطمة : هاه...
البنات يضحكن....
المعلمة : برى الصف...
فاطمة وقفت وقالت: شو تبين أييبلج أي كتب وين محطوطات... إنزين شو بلاج أبلة معصبة...
شيخة: فطامي يغربلج اسكتي...
فاطمة..... ساكتة مؤدبة يحليلها....

في صف ريم.....
المعلمة: ما شاء الله عليج يا ريم أنا أتوقع إنج تشرفين أهلج...
ريم في نفسها: يارب تهديهم يارب....
منى بعد ما طلعت المعلمة من الصف : ريم شو بتخصصين في الجامعة؟
ريم: خير....
منى: ليش ؟ لا تقولين ما بتروحين....
ريم : الله ناس تحيا وناس تموت...
منى: بسم الله عليج وعليه...إنزين أبى أييكم عشان تشرحين لي نحو تراني بالمرة مافهمت هلأبلة...
ريم إممم: أقول أنا بييج شرايج؟
منى: صدق!
ريم: هيه تدرين بيتنا ضيق .. ووو
منى: ريماني ما هجيتها منج أنا أخلاقج عندي في الدنيا ووضعج الإجتماعي ...
تقاطعها ريم: لا أنا ما أستحي من وضعي.... بس في شوية مشاكل في البيت...
منى: هيه... أوكي تعالي عقب صلاة المغرب.
ريم : أوكي بيي ويا سالم تدرين اليوم الأربعاء وبينزل وهو رايح لربعه بخليه يخطفني...
منى : its ok my darling..
* **************************************************
**

في البيت ريم تعابل كتبها وفطوم يالسه بطرف الحوش تفكر....
طلعت ريم من غرفتها ةلاقفت سالم سلمت عليه وقالتله: هاه مسود سويلم ما تسوى عليك الكلية ..
سالم: يالله هانت فديتج... إلا الثانوية شو أخبارها...
ريم: الحمدالله زين...
سالم: شو فيج موطية راسج مهمومة فديتج..
ريم: لا سالم بس....
سالم : تعالي نسير غرفتج...
يالله بلج يالريم..؟
ريم: أبويه يبى يطلق أميه...
سالم: ليش؟!!!
ريم: مادري بهم.... وهي التردد باين عليها...
سالم وبإنفعال: رمسي شحقه؟
ريم: ماقدر يا سالم الرمسة صعبة...
سالم سكت وحس بأنه في شيء جايد عيل ليش طلبه أمه الطلاق..
أوكي أوكي شيء في خاطرج...؟
ريم: هيه.. طلبين؟؟؟
سالم : آمري..
ريم: أول شيء أبى فلوس عشان الثانوية والحفلة، والثاني أباك توديني في طريجك لبيت جوم منى ربيعتي تباني أفهمها نحو....
سالم: الأول أوكي .. بس الثاني مادانيته...
ريم: سالم إنته تعرف أخلاقي وبعدين هي كانت بتي هنيه بس أنا خفت أمي وبويه يسببولي إحراج..
سالم: يا لغزال الشمالي أعرفج زين....
يالله البسي ....
وهم طالعين شافو فطوم تصيح جام سالم بيروح لها بس ريم مسكت إيده وقالتله: بعدين خلها...
سالم : شو مستوي ليش فطوم تصيح....
ريم: هي جذيه تصيح عشان أميه وبويه شاله همهم...
سالم: وليش ما تبين أسير لها...
ريم: أباها تصيح لين ما ترتاح وبعدين أبى أذاكرلها من دون ماحسسها بأنها ضعيفة....
سالم: فديت الأذكياء؟؟؟
ريم يالله....
في السيارة....
سالم: أووووووف ريماني نسيت شيء مهم؟؟؟
ريم بسم الله شوه...
سالم: سمعتي شريط عيظة اليديد.. وهو يطلع الشريط.. فيه أغنية أبى أهديها لج جن اللي كتب الكلمات كتبهن حقج...سمعي...
شغل الشريط وحط على(( يا طارشي))..
ريم مستحية: لا والله....
سالم: هيه والله إختي فديتها عيونها وأهدابها مسودة وشعرها ماشاءالله عليها...
ريم: بس بس....
سالم: أفااااااااااا بزعل تراني...
ريم: هاهاه براضيك كم من سالم عندي هو واحد لولاه كنت ميته....
سالم يقصر على المسجل : والله ياريم لوما تشجيعج لي وتوجيهج لكنت عاطل ، لو ما إنتي مذاكرتلي في الثانوية والله والله عزيز في سماه ما كنت بهالحالة .
ريم: إنته الأمل في هالدنيا....
سالم: أنا ما بنسى إنج كنت تضيعين وقتج وتروحين عند بنت خالي وتخلينها تذاكرلج منهجي عشان تذاكرينه حقي...
ريم: تصدق هذيج السنة الوحيدة إللي كنت فيها مب الأولى على الكلاس....
سالم: سامحيني...
ريم : هاه وصلنا.. بعدين لا تستسمح أبدا إنزين....
سالم الساعة كم أيي؟
ريم: ألحين سبع تعال 9 / 9 ونص...
سالم : لحظة طلع لها تيلفون ومد ايده...
ريم: إنشالله تباني أشله...
سالم: خذي دقي لي ولا تتصلين من بيتهم عيب..
ريم فهمت قصد أخوها... وخذت التلفون... نزلت واطالعت أخوها وهي تبتسم له .. أشر لها تغطي ويهها ...
ريم : محد إنزين في البيت.؟...

بيت جوم منى كبير وفيه حديقه كبيرة....
فتحت الخدامة الباب لريم...
ريم : تمد إيدها للخدامة تسلم عليها...
الخدامة: تبتسم كيف هالك ريم..؟
ريم: تمام الحمدالله...

ريم حلوة وااايد .... عشان جذيه أخوها يخاف عليها من كل شيء....

ريم: شكيله مسكي الكتب بعدل شيلتيه...
ريم عدلت شيلتها بس عاد هالمرة طلعت قصتها وهي شعرها أسود واايد وهي عاد بيضاء مسكت كتبها ومشت لباب الصالة دقت الباب ودخلت تسلم على أم منى...
أم سعيد: هلا والله بالغالية ربيعة الغالية..
ريم: وهي تحضنها بالمهلي....
ومن فوق كان نازل سعيد وقف يوم شاف ريم وتم يطالعها ...
نزلت ريم الكتب وقالت: هاه خالتي شو حالكم؟
أم سعيد: كلنا بخير شحالج إنتي وشحال أهلج؟
ريم وهي تعدل شيلتها: الحمدالله...

سعيد يقول في نفسه: منوه هالبنيه الغاويه... يالله ماشاءالله؟؟؟
ريم: أوكي خالتي ألحين ممكن أروح أغث منوتكم...
أم سعيد: سيريلها حجرتها....
جامت ريم وصعدت الدري تراجع سعيد يوم سمعها واندس وتعمد إنه يطلع لها عشان تشوفه..
ريم ماتدريبه إنه في البيت عشان جذيه ماخذه راحتها...
ريم: تدق باب حجرت منى..: مناني يالله فجي الباب الله يغربل ابليسج وعيضة وياج...
سعيد: هيه والله...
ريم نزلت صاعقة على راسها.... وطاحن الكتب من ايدها ...
سعيد: والخيبة .....
ونزل وراح...
منى : هلا والله بالغلا....
ريم : الله يغربلج يالخايسة...
منى: أفااااااا why?
ريم: أخوج ماعرف شسمه.....
كان ورايه ورمسني والله إنه ما يستحي....
منى وهي تضحك: سعود محد غيره في البيت....
ريم: ضحكتي من سرج...
منى: ماعليج من راعي الحركات ...
ريم: يالله يالله...
منى .... جان زين...
ريم: شو هو؟...
منى: لا لا .. سلامتج...


الساعة 9....
ريم: يالله بدق لسالم إييني...
منى: صبري بسير أييب التلفون...
ريم لا لا عندي موبايل...
منى اطالعتها بنظرة : ليش يعني نحن شو بينا؟
ريم: مب أنا سالم...
منى: أمممممم زين....
في بيت جوم ريم.....

أم سالم دخلت على بناتها اطالعت البنات...
فطوم: هلا أميه.، تفضلي الغالية..
ريم: أميه تعالي عندنا...
الأم: شحالكن؟ الأم باين عليه شاله هموم الدنيا...
فطوم مخنوقة: أميه أنا......
جامت ريم ومسكت ايد أمها : الغالية كله بأجره والله ما ينسى عباده...
الأم بصوت منخفض: فطوم بلاها؟
ريم: تدرين بها ...
مشت الأم صوب فطوم ويلست عدالها: حبيبتي فطيم مابخليج ...
فطيم انفجرت تصيح: أميه فديتج لا تتناجرون...
الأم خلاص... يالله عاد بس ليش تصيحين؟
ريم: هيه ادلعي منوه جدج ...
الأم: كلكم غاليين محد أزيد عن حد...
فطامي...... : أميه أحبج وااايد....
الأم : حتى أنا...

أبو سالم: مرحبا... قالها من دون نفس...
أم سالم: مرحبتين.
أبو سالم: شجلتي..؟
أم سالم: في شوه؟
أبو سالم: اسمعي أنا مب يالس استشيرج...
أم سالم: خلاص لاعت جبدي ..
أبو سالم: بعرس عيل..
أم سالم: عكيفك..
أبو سالم: هاه غيرتي رايج؟
أم سالم: عشان بناتي والله.
في المدرسة...
فطامي : بيعرس أبويه؟
شيخة: شووووووه!!!
فطامي: لا تتفاجئين...
شيخة: ماعليه. أمج زعلانة..؟
فطامي: آآآآآآه يا شويخ....
شيخة: لا تفكرين..
فطامي: أنا مستحيل أتزوج...
شيخة: مب عكيفج ..
***
ريم: بسير غرفة المدرسات أبى أسأل أبلة مفيدة عن هذي المسألة ...
ليلى: أقولج حطيت لج أوراق امتحاناتج على الطاولة.
ريم: أوكي يالله بااااي...
منى: ريماني أترياج ....


الحصة 7....
كانت هالحصة فاضية والبنات خلاص على أبواب الإمتحانات...
ليلى: يالله متى الفكة من هالمدرسة...

منى: قريب يابوج...
ريم:ذاكرن عاد الجد بدى..
نجود: مالت أنا وحدة بخلص مني وبعرس مناكي..
منى: هيه شوفوا الطموح..
ريم: الله يوفقج.
اليازية: ريماني مانخطبتي؟
ريم احمرت: ويه ويهج على هالرمسة..
منى: هاهاها...
اليازية: وحدة بجمالج و.....
ريم: بليز خلاص...
وتفرقن البنات وكل ثنتين صارن يتكلمن ويا بعض...
منى: ريم ؟ أبى أقولج شيء...
ريم: يالمستحى...
منى: لا والله .. سمعي.. سعود خويه متخبل...
ريم: لا والله شو السبب؟ اتصدقين ما يستاهل... انزين وديتوه المستشفى.؟
منى: ايه ايه... مرة سويتيه حالة مستعصية...
ريم: عيل شو تبيني أقولج؟
منى: متخبل عليج؟
ريم استحت: شو هالرمسة؟
منى: هو ما قالي شيء قال حق أميه وأميه قالتلي... هذاك اليوم شافج..
رن الجرس وصار الإنصراف...
ريم: يالله...
منى : بس ما كملتلج السالفة..؟
ريم: عندنا دراسة... وأنا العرس وهالسوالف آخر اهتماماتي...

في البيت....

الأم: ريم باجر أول امتحان.. شو عليج؟
ريم: تاريخ وإنشالله يالغاليه 100...
الأم: آمين..
فطوم: يارب...
ريم: يالله توفيجك...

اليوم آخر امتحانات الثانوية العامة...
البنات...
اليازية: الحمدالله....
ريم: وراكن النسب...
منى: يالله زياغ....

ريم : ألوه هلا سالم ألحين بطلع...
منى : بتروحين ويا أخوج اليوم....
ريم: هيه بنروح أنا وفطوم واميه... بنسير العين....
منى: عندكم أهل هناك؟.
ريم: لا بس تدرين دار الزين تينن...
منى: يالله...
ريم: مع السلامة...
يالله بنات مع السلامة أشوفكن عخير...


***

وسأنقل لكم بقيةالاجزاء هذا لو اعجبكم
ارجو منكم الرد عل الموضوع
ولكم جزيل الشكر

أختكم في الله :
فاقدة البسمة

الشلال الهامس
19-11-2003, 02:37
مشكوره على القصه الروعه ياريت تكمليها و انا مستنيه البقيه
تحياتي
الشلال الهامس

بيكاسو
19-11-2003, 04:24
القصه طويله بعض الشئ لكن تبدو كالحقيقيه ارجو تكمله الباقي من القصه سلام

Priscilla
19-11-2003, 11:57
القصه طويله بعض الشئ لكن تبدو كالحقيقيه ارجو تكمله الباقي من القصه سلام

وننتظر التكمله

واحد من الشباب
22-11-2003, 10:58
شكرا على القصه اختي وننتظر التكمله

فتى نجد
10-07-2004, 14:04
مشكورة على القصة

بنت الامارات
19-07-2004, 08:07
القصه حلوه
مشكوووورة
و بأنتظار التكمله:)

مردوخ الدايخ
08-01-2006, 18:54
مشكووووووووووووووووور إختي على هالقصه

وأنا أنتظر التكمله

سلام


لكم حياتي قبل تحياتي

هشام رجب
08-01-2006, 20:33
شكرا اختى على القصة الرائعة