PDA المساعد الشخصي الرقمي

عرض كامل الموضوع : دعايات مدري وش تبي



الدوق فليد
03-05-2007, 10:58
مساء الخير ..او...صباح الخير (كلن وتوقيته)



بدون مقدمات <<-- منتاب عاقل ياحق المواضيع

اول مايجيك الصيف تكثر الدعايات والاعلانات اللي تخلي الواحد ينحاش من السعوديه
والرياض تحديداً ..


اول شي نبدا في دعاية قرية مصقال

اسف مرسال اقصد ..

يلله هذي لحالها يبغالها موضوع كامل

اما سالفة رواد الفضاء اللي تجي بالاف ام

اول ماتجي لاشعوريا الواحد يطفي المسجل <<-- وانا اولهم ..

اجل في الفضاء ويفكرون في قرية مرسال .. وينا عايشين فيه ..

لا وغير كذا شف الدلع جنقول الجناقيل

لازم كلنا نروح .. هذي وحده ..


والا دعاية الكوكاكولا حقت عبدالمجيد

جايبين ناس من سوريا ملبسينهم شمغ

والله استحيت يوم شفت الدعايه من بعدها ماصرت احرص على الشماغ

يله كوووووولنا بصوت واحد .. مهيب كلنا لا كووووولنا ..

وهذي الثانيه ,,


والا دعاية دانيت حقت الصافي

مجمعين بزارين عشان يشوفون من احسن طبخ

لا جد صراحه دعايه تخلي الواحد يطلع يشتري دانيت <<-- ايه مره ..

جد يعني يوسف الجراح اثبت انه ماعنده شغل .. مع انه رهيب ومنسم بس مدري وش جاه هالدب ..

وهذي الثالثه ..


عاد جينا للدعايه الكامله ..

كله كووووم ودعاية دجاج الوطنيه كوم ثاني

" حقيقي اوومك بتحووبك " <<-- اموت واعرف عربيه هالكلمه الحين .. يعني وزارة الاعلام مقتنعه منها والا شلون يعني .. النطق اخر شئ يفكرون فيه الظاهر ..

لا ومن زين الطبايع الدجاج على الصبح ..

طيب انا امي ماتطبخ لي دجاج الوطنيه .. ولاعمري ذقته ..

الله يخلي الاخوين ولا اروع .. اللهم لك الحمد .. الله لايغيرها نعمه بس ..

انا كنت شاك اساساً من اول انها ماتحبني بس عقب هالدعايه تاكدت ..

وهذي الرابعه ...


والا دعاية المسحوق حق الصحون " الازرق والاحمر والاصفر "

من جد هالدعايه احباط للمقبلين على الحياة ..

طيب يعني وش حيث هالشقه من كل هالشقق دخلتوها .. فيه فوقها وفيه تحتها ..

وش الدليل انها نصبه يقولك من كبرها ...

بس صدقوني يوم شفت هالدعايه طلعت شريت زي ماقالوا <<-- ايه هين بس ..



عاد جينا للدعايه " الطـــــــامه اسميها الحقيفه " من كبرها ومن كرهي لها من جد " كسرت ريموت واحد من العيال بسبتها يوم شفتها مره من المرات ..

دعاية جاكم الصفر ؟؟

هذي مايحتاج اصلن الواحد يتكلم فيها ..اجل جاكم الصفر وخر عن طريقه

يذكروني بالمنتخب السعودي يوم ينهزم

8 \ 0

اللهم لاشماته يالسعوديين

<--- يرحم والديك يالاسباني الحين ..

والا دعاية تويكس

مسوي انه مايبي يشترك في سوبر ستار عشان يقعد يرقص هو ويا شعره هاللي مدري شلون متحمله ..

بس هذي الدعايات اللي احس انها مالها اي هدف بالحياة

واذا عندكم دعايات عادي انشروا طلعوا اللي في قلوبكم ..

مافتحنا هالمنتدى الا عشانكم .. <<-- وش عنده راعي الموقع الحين ..

نقطه انتهى الموضوع ..

قلبي حاسن انه محدن راد علي بس يالله

تحياتي .. اخوكم راعي كلنديزر ( كنت اقولها وانا صغير كلنديزر )

بدوي وعزمي قوي
03-05-2007, 11:08
تسلم على هذا الموضوع الرائع يا اخوي راعي كلنديزر