PDA المساعد الشخصي الرقمي

عرض كامل الموضوع : )(=)(حـــــــــــالة أستنـــفــــــــــــــــار)(=)(



ANGELixna D
15-12-2006, 23:41
هذي مذكراتي في فترة الأمتحانات ^^
----------------------------------------


بقى أسبوع ع الأمتحانات (ياويلي) وهكذا يقول لسان حالي.. مرة تشوفني أضحك وفجاه أكشر اذا ذكرت الأمتحانات... الأمتحانات....رعب جميع الطلاب والطالبات...... وفترة فقر محلات ألعاب البلايستيشن والأنيميات ^_^

في ذاك اليوم دخلت ع اهلي وهم يتقهوون ويكركرون وموسعين صدورهم ع الحش واكل لحوم الناس ( أكثر شيء اكرهه بالدنيا بس ياسبحان الله يطلع للحش طعم اروع بفترة الأمتحانات) طالعتهم بحاجب مرفوع ويعنني عندي سالفه ورابطه رقعه سوداء ع راسي( حاطه نفسي ثائر ارجنتيني لو شافني تشي جيفارا ماتخسر رصاصه في جبهتي)..

المهم قلت لهم: اسمعوا يالسلق (ناسيه أن أمي جالسه بينهم >_<) ترى أ...
ماكملت كلمتي الا ومخده مدري من وين جت وفي وجهي..
الوالده العزيزه:: ووجع يكسر ضلوعتس قايمه بلا... من السلق يابقره..
أنا: أسمعي ياحرمه أنتي أمي ع عيني وراسي بس...... (بقول شيء خطير) في الأمتحانات لا أنتي أمي ولا أعرفتس ولا أحد أبي اشوف رقعة وجهه في غرفتي (قويه ^_^)
أنسوا أن لكم بنت جميله اسمها أنجل (مادح نفسه كذاب)
وحدة من الأخوات: شرهتك ع اللي معتبرك أخته اصلا
أنا بغضب: أجل وش أنا؟
هي : أخوي
قاموا يضحكون علي يقال دمهم خفيف ..... مالت (خفيفة عقل أنا حقدت بقوه)
قامت امي تشرب من قهوتها: في اللي مايحفظتس بس نشوف عاد وش بتسنعين في الأمتحانات!!
رفعت حاجبي ع طريقة جيمس بوند وأبتسامه ساخره تعلو خشتي: في الميدان ياحميدان(هذي اخرتها بوند وحميدان والله اني قرويه)

المهم اني قمت لغرفتي اللي كان اسمها غرفه لين بدأت الحملة الصهوينيه للأمتحانات.. أول شيءسويته تعليق اليافطات ع باب الغرفه لا يفوتكم الصوره مكتوب عليها (بدأت الأمتحانات أدعولي بالنجاح بليز)
أما أدعوا لي هذي ف...لاتعليق ^_^

جهزت الكتب والملازم وحطيتهم جنب طاولتي وبدأت الأمتحانات....

----------------------------------
ياالله بكرا أمتحان الماده الزفت ........ والحين الساعه 12 الليل والنوم تسلط أعوذ بالله ...... وشلون بطير النوم الحين....
أقرا سطر وانام وأقرا نص سطر والباقي تفكير...
خلااااص بروح أتمشى في الحوش ( الساعه الحين 2 ونص)
وامشي ...ياطووول المشوار للحوش ....الحمد لله وصلت ....وووووووووجع وراه لمبات الشارع مطفينها .. قمتامشي واسمع صوت وراي ..... بسم الله يمكن جني .. فجأه اسمع صوت رجلين تسحب ع الأرض وكل مالهاوتقرب من وراي
اااااااااااااااااه زومبيييييييي هم كذا يمشوووووون ... وألتفت ببطء( فلم رعب) الا واشوف في الظلام ظل طويل ويحك شعره.... مافيها زومبي..... وجا يمشي ناحيتي هالمره صرخت صدق
انا:: اااااااااه يمممممممممه
....: ووووجع بلا لو شافك جني كان تخرع
(أخوي يامال الصلاح قايم مدري وشوله خخخخخخخخخخ)
أنا: متى تتعلم تتنحنح يارجال بغى يسكت قلبي .. بعدين وش قصدك اروع الجنون ليش قبيحه أنا
أخوي: لابسم الله عليك جميله (بنبرة استهزاء)أنت وشوشتك اللي كنها مكانس الأولين
انا: تحلف
وأطالع في ظلي ع الأرض والا والله ارتاع انا ...
أنا: بسم الله الرحمن الرحيم وش ذا... الله يكرم مكانس الأولين بس كذا العباقره مثل اينشتاين دايم شوشهم في السماء
أخوي: افا الحين صرتي اينشتاين... يصير خير ... الحين تخرجي ويصير خير
أنا (بصوت منخفض): ورا ماتنطم عاد ولايكثر
هو: وش قلتي
أنا: اكلم عمري..............الا ماشاءالله الليله منوره يمكن ليلة القدر
مادريت الا والخبطه اللي في راسي
أنا : ووووووووجع بلا ليش تضربني
هو: أجل تقولين ليلة القدر يالسكرانه وحنا في شوال
أنا :ايه صح... بسم الله علي من زود المطاعه ( ما اعرف ارقع)
حامت كبد اخوي: يالدايخه الحين مخلصين صلاة الفجر
أنا في صرخه:وشوووووووووووووووووووووووووووووووووووو؟
ساعتي تقول الساعه 2 ونص
هو: ولاتزعلين كل المؤذنين غلطانين وساعتك صح
انا: تنكت انت ووجهك ماراجعت ياويلييييييييييييي
الا واقوم وأرجع لغرفتي واقوم ادغ في الماده اراجعها...
------------------------
الساعه الحين 7 وشوي دخول اللجان الساعه 7ونص...
رحت البس والله مدري وش لبست المهم اني لبست .... ووووجع شعري وش اسوي به ..
قمت وحطيت فيه كل شيء مااااش طالع كنه عشب ينبت فوق....
أقول يمدحون الكاسكيت.. الا وأقوم والبس واحد....
والى مقر التعذيب ذهبنا.......
---------------------
دخلت الكليه ما أشوف دربي ونظراتي ع خشمي وبسرعه للدور اللي فوق.... ماودي اسلم ع احد ... ماني فاضيه الا وأسمع وحده قدامي تتكلم عن برنامج شافته امس ... أنا أنقهرت حارمه نفسي من فلم ودي اشوفه والمملوحه قاعده تتطالع برنامج.... من القهر قمت ودست ع رجلها بقووووووه:: يؤؤؤؤ آآآآآآآسفه جد ماشفتك
البنت: هذا وأنتي حاطه نظارات اجل لو مالبستيها وش سويتي
أنا: كان فجرت فيك
هي : وشو
انا بعصبيه: ورى ماتضفين وجهك يابزر لأقوم اشين يومك ذا
البنت تخرعت ووخرت عن طريقي... كنت ناويه اوريها شوشتي عشان جد تلعن نفسها ليش تحرشت فيني ( مين تحرش في الثاني!!!)

المهم بسرعه للجنتي وألقى ربعي كل وحده بزاويه وحده جالسه في أخر زاويه تهز كنها بوذيه ^_^ اعوذ بالله
والثانيه ماسكه أوراق وقلمها ( الله يرحمة) مابقى منه شيء.. البنت جاها تسمم كل الحبر في بطنها وشافتني وجت تركض يمي
ام قلم: انجل وش سويتي؟ البارح دقيت عليك ومارديتي
أنا أطالع في فمها الأزرق: يابنت انا فاضيه لك كنت اتهاوش مع الزفت ذا أنت وش سويتي غير شرب الحبر؟
أم قلم:أبد والله كان عندنا عزيمه يوم الخميس وماذاكرت
أنا: ابرك ... ماتعرفين تتملصين من العزيمه .... عندك امتحانات والا تهجين في شقه بلحالك......أنا تبريت من أهلي
أقولها بفخر
أم قلم:هاه؟!!
أنا: هويتي قولي امين وش هاه أنقلعي عني الحين بحفظ لي كم كلمه بيضاء تنفعني باليوم الأسود
أم قلم ظفت وجهها وأنا قمت وووقت عند الباب لين جاء وقت السلخ... قصدي وقت دخول اللجان وبدأ داء النفاضه ( تعرفونه اللي يخلي ركبكم تصافق ويالله تمشون من الخوف
أخذت لي كرسي بأخر الغرفه وأنا احك الحبوب اللي ملت وجهي من الحاله النفسيه التعبانه
الا وتجي المشرفه :أنجل ليش لابسه قبعه
(قبعه... قرف في شكلك ياقرويه بغيت استفرغ عليها الله يكرمكم)
أنا : ليش تسألين؟!
المشرفه القرويه: تعرفين انه ممنوع تدخلين بها في لجنة الأمتحان ممكن تنزلينها!!
(افاااااا الحين وش السواه ... شكلي بنتحر ....................وش اسوي)
بديت أعرق وارتبك والمشرفه تأكدت اني حاطه لي كم برشوم غش
المشرفه القرويه: انجل نزليها لو سمحتي
أنا بيدين مرتجفتين وفي نفسي اقول( الله لايبارك فيتس يابنت الذين)
ونزلت الكاسكيت الا يوم انتفشت الشوشه.. المشرفه رجعت خطوتين للوراء وهي تسمي
هي: اقول البسيها الله يستر عليك
أنا بأحراج: تعرفين امس يالله بطلعة الروح تجعد
هي: واضح
(يامال اللي ماله اسم بلا جعلتس الموت يابعيده)_________________----
لو أعجبتكم علموني عشان أكمل ^^

D.Lucifer
15-12-2006, 23:59
هههههههههههههههههههههههههههههههههههههههههههههههههه ه
هههههههههههههههههههههههههههههههههههههههههههههههههه ههه بس بموت آه يابطني
ههههههههههههههههههههه بموووت حرااام عليك من جد منتهية ههههههههههههههههههههههههه
خطيررررة مت من الضحك Xd
معذورة والله امتحانات قرف وحالة الواحد مايدري وين الله حاطه فيه هههههههههههه
بس رحمت البنت اللي نشبتي في حلقها ههههههه
أما ليله القدر Xd خطيرة من جد منتهية والا النهاية هههههه تصورت شكلها وهي تشوف الشوشة
تنتفش--->مشكلة الشوش خاصة أوقات الامتحانات الواحد يبحل بها مايدري وش يسويxd

ANGELixna D
16-12-2006, 00:03
زين أنها أعجبتك لوسيفير والجايات أحسن ^^
اريقاتوووووووووو ع المرور

ANGELixna D
16-12-2006, 00:19
أكثر البنات مروا في حالة البؤس هذي ^^

بس بالله وش رايك بالبنت أم قلم ..؟ مو فله؟؟؟

مشكوره ليدي 13 ع المرور الكول!! قلبوو