يوميات جمعاوى

[tito20111]

أنا هقدم لكم أحلى حاجة من يوميات جمعاوى وهو شاب فى كلية الهندسة بس مشاغب أ,ى ودى أول حكياته




جمعاوى


اليوم مكعبل من أوله مش كفاية ما جاليش نوم طول الليل من ساعة ما عرفت ان النتيجة ظهرت ..

قمت الصبح مستعجل ومتسربع كعادتي عشان ألحقلي مكان أعرف أشوف منه النتيجة كويس قبل الزحمة والمرمطة وتقطيع الهدوم ..

ربع ساعة على بال ما أخويا الصغير طلع من الحمام أصل كان عنده اسهال وكمان نصف ساعة على بال ما طلعت أنا من الحمام أصل كان عندي اسهال زيه ..

ما حدش فيكوا شاف الشراب بتاعي ؟.! ياجماعة لو حد شافه يقول أنا عاوز الحق اشوف النتيجة .. أيوة أيوة هو الشراب المخروم ابو ريحة معفنة انا أقدر أطلعه ولو كان مدفوس من بين 100000 شراب بريحته أهو لقيته خلاص .


نزلت الشارع وانا متسربع على الأخر وبالبس القميص وانا نازل على السلم .. لقيت واحد بينادي عليا : كابتن اقفل السوستة !!.



يادي الفضايح هو ده اللي واخدينه من الامتحانات السربعة على ما فيش


أنا دلوقتي بكلمكوا من الأتوبيس .. ياترى ايه اخبار النتيجة .. يارب طلعنا منها على خير يارب ، يارب انا مش عاوز جيد جدا ولا جيد كفاية عليا أطلع نضيف ، قعدت أصبر نفسي واقول ما فيش حاجة تستاهل انت كده ولا كده هتتخرج وهتبقى عاوز تبيع المؤهل بتاعك حتى لو هايجيبلك نص كيلو كنافة وهايبقى هاين عليك تدعى

. على التعليم العالي اللي هوا ما طلعش عالي ولا حاجة هو عالي بس عشان بيعلي الضغط عند البني أدم .

الحمد لله وصلت بالسلامة الواحد حاطط قلبه على ايده من كتر الرعب ( أأأ.. قصدي حاطط ايدي على رجلي ) اعذروني ياجماعة الواحد مرعوب قوي من النتيجة رغم ان انا عارف ان العملية ماشية " بزرميط " يعني لو جاوبت هاشيل المادة ولو ما جاوبتش هانجح واجيب تقدير كمان واللي ما يشتري يتفرج ... مش بقولك تعليم عالي !!!!


ايه اللي انا سامعه ده هي الطالبة دي طالعة تزرغت ليه ؟؟ هو العميد بيجوز ولا ايه ؟! وايه دي كمان طالعة تصوت ليه ؟!! هو العميد ما استحملش الفرحة بتاعة جوازه ومات .


لما نسأل الشاب الحليوة اللي طالع من على الباب ،

كابتن سؤال : هيّ طلعت ولا لسة ؟؟

ابتسم ابتسامة عريضة وقال : الواد كان عنده حق إوعي تقوليله لأ

الواد كان عنده حق إوعي تقوليله لأ


لاحول ولا قوة الا بالله الواد مخه فوت من النتيجة استر يا اللي بتستر ، لما الواحد يدخل ويتأكد بنفسه ياللا بقى الواحد يدخل برجله الشمال زي كل مرة ويقول الدعاء ( أعوذ بالله من الخبث والخبائث )


جمعاوي يصرخ : معقول .. معقول كل ده ولسة ما علقوش النتيجة دي لو كانت نتيجة الشمرلي بتاعة السنة الجاية كان زمانها اتعلقت

- واحدابن حلال رد عليا وقال : ما هي النتيجة اتعلقت من 5 دقايق

جمعاوي : امال هي راحت فين انا مش شايف حاجة .

- ابن الحلال رد وقال : كل واحد كان بيلاقي النتيجة بتاعته مش عجباه كان بيكعور الكشف اللي فيه نتيجته ويرميه في الزبالة ،

انت رقم جلوسك كام ياجمعاوي ؟

ليه يعني ؟! ... 120 ياسيدي .

- رد وقال : هتلاقي النتيجة بتاعتك في برميل الزبالة رقم 3

وساعتها ما حاسيتش بنفسي عملت للخلف در وانا بغني واقول

في البحر سمكة بتزوق سمكة

ع الشط واقف صياد بشبكة




ويريت رددكم:ميت: :تدخين: :رامبو:

[x phantom]

مشكووووووووووووووووووووورة جداً جداً على الموضوع الراااااااااائع
بصراحة , موضوع لا يوصف

[ماتشي ريودان]

مشكور جدا على موضوعك الرائع






تحيات ماتشي ريودان

[غـــღღــلا]

مشكوووور اخوي على الموضوع

[tito20111]

أنا رح أجيب جمعاوى تانى بس ياريت ويا رب يعجبكم مشكور:cool:

[tito20111]

طبعا كلكم عارفين نانسى عجرم بس تخيل لو نانسى زارت جمعاوى فى الكلية أيه ألى هيحصل تعالو نشوف:لقافة:

كفاية ..حرام..خلاص مش قادر..زمان وأنا صغير كنت بحلم باليوم اللى هدخل فيه الجامعه ولما كبرت ودخلت الجامعه وشوفت اللى فيها قلت يارتنى فضلت عيل على طول. المشاهدين فى المنازل بيتعبوا لما يشوفوا (نانسى عجرم) فى التلفزيون..أُمال إحنا نعمل إيه اللى عندنا فى الجامعة ألف نانسى ونانسى لمّا الواحد خلاص هيتلوح





الصبح وانا داخل الجامعه باقول فى سرى يارب طلعنا منها على خير..لكن وأنا طالع مبقولش حاجه بكون عامل زى رُبع كيلو لحمه مفرومه لسه طلعه طازه من المفرمه كل ده بسبب البنات المتعجرمة( نسبةً إلى نانسى عجرم) الكلام ده ولسه الصيف مادخلش أنا الحقيقيه مش عارف البنات دى ايه بالظبط دايماً حرانين ومبيسقعوش زى بقيت البشر ؟ جوه الجامعه الجو حر طول السنه هتلاقى واحده لابسه بنطلون أخوها الصغير (حاجةأوفر على الآخر) والتانيه لابسه َبدى كبس واللى مايشترى يتفرج عليها أما التالته فكان نفسها تلبس هدوم حشمه ملحقتش ياعينى ..يدوبك غطت شعرها بالطارحه ونزلت (كانت لابسه المريله بتاعت الحضانه فوق الركبه حاجه كده سمباتيك على الاخر..وياصباح الكوارع اللى ملهاش جزار.











طبعاً أنا مش بأعمل فتنه طائفيه بين الولاد والبنات لأن إحنا والبنات نسيج واحد وفيه بنات كتير جدعان قوى وأنا دايماًكنت بأقول (لو لم أكن راجلاً لوددت أن أكون ستاً) و أنا بتكلم هنا عن صنف واحد وبس البنت اللى ممكن تعكسك وإنت ماشى والبنت اللى فاكره نفسها حنفى وممكن تهزر مع زميلها فى الكليه وتضربه بالقفا والبنت اللى بتقول ده زى أخويا والبنت اللى بتضرب شعرها فى الخلاط وبتدهن وشّها دوكو وهيه نازلة

زمان أيام الطربوش والجنيه الجبس كانت البنت زى الجوهرة البنت كانت بتلاقى أهل يخافوا عليها كنت تعرف البنت من كسوفها مش زى دلوقتى تلاقى أهلها بيقولوا خلى البنت تتدردح وتتنجّر خليها تعيش حياتها.. يعنى إحنا عشان نعيش حياتنا نعصى ربنا.!!!!







على فكرة البنت المتعجرمة مفيش عليها كنترول فى البيت من أساسه يعنى مثلاًأمها لما تحب تنصحها هتقولها:ظبتى نفسك يابنتىوإتروشنى وإنتى رايحه الكليه يمكن ترجعلنا بعريس ولا أتنين

أما أبوها لما يحب يشد عليها هيقول:هوه إنتى مبتزهقيش متن البَديهات أم كمام ليه مبتلبسيش البَدى الكت اللى جبتهولك.(قال إيه أبوها..ده محصلش إزازة سفن أب)



برقية إلى كل الشباب التعبان اللى زى حالاتى:إمسكوانفسكوا شويه..هيه كلها عشرة خمستاشر سنه وكلكم هتتجوزوا

[tito20111]

وين رددكم الجميلة:eek:

أيه هى القصص مش عجباكوا ولا أيه;)

[shegoon]

هههههههههههههههههههههه
حلوة منك!!

[RoCk AnGeL]

كتييير بتضحك ....

هههههههههههههههههههههه....

تسلم على الموضوعين ..........

[M!ss rozy]

والله انو من جد واحد فااااااضي يصلح يشتغل في زبالانوhttp://www.w6w.net/album/37/w6w200504122306126b89275b9.gif

ومني نصيحه للجمعاوي الفاشل انو اول ما ياخد النتيجه لمن يساله احد عن رقم جلوسه يقول لهم:رقم جلوسي110<<رقم جلوسي سابقا

وحيلاقي نتيجته مرفوعه فوق زباله رقم1

[tito20111]

مشكور أخوى على هذه الردود الجميلة وعلشان خطرك أدى كمان واحدة من جمعاوى::جيد::

المطرب الشعبى المشهور جمعاوى الحنجور

جمعاوى طلعله عفريت من القله وقاله ليك طلبين ,اتحقق الاول وناقص التانى00 ياترى هيطلب ايه!


جمعاوى: شوف ياعفريت انا00امنيه حياتى من زمااان أنى أغنى أنا صحيح صوتى بيخروش وحنجرتى شبه السفون البايظ لكن العبرة ف الزمن ده مبقتش بالصوت
العفريت أمرك مجاب اناهنزلك حالآ فالسوق خمس شرايط
جمعاوى:خمس شرايط مره واحده 00ليه هتنزلى شرايط برشام!
العفريت:ولسه00أناهخليك تطلع ف ليالى التلفزيون وليالى الراديو وليالى الشتاء القارس00هتغمض عين وتفتح عين هتلاقى نفسك اشهر مطرب ف مصر ولبيا والدول الصديكه (ياشمهورش خليه فنان من غير كليب عريان ولاكلام تعبان)0000
_(ومرت الايام..وداس جمعاوى على كل المبادىْ بعد ما بقى فنان )
المذيعه : سيداتى ساداتى معانا انهارده فارس من فرسان الأغنيه الشبابيه حاجه كده فرز اول المطرب العاتفى المشهور جمعاوى الحنجور فى البدايه نحب نقول لك مبروك على الألبوم الجديد الى مكسر الدنيا
جمعاوى : شكرا ياغالية يا بنت الغاليين يا اصيله يا بنت الأصليين
المذيعه : عاوزين نسمع حته منه فى بداية حوارنا
جمعاوى :

ياحبيبى حرام كفاية ........ضحكتك برشام دوايه
لما مره زعلت منى.........كف ايدك شال قفايا

المذيعه:برافو برافو ايه الحلاوه دى مفيش جبنه ??? طب ياترى تحب ترد ع الناس اللى بيقولو ان الشرايط بتعتك فيها اسفاف؟
جمعاوى:اسفاااااف انا معنديش شريط بيسف ...أناهقول للناس دى أتأكدوا أكيد العيب ف التسجيل
المذيعه:لأ أنا أقصدانها لا أخلاقيه
جمعاوى:لأ لأ كله الا كده أنا راجل عندى أخلاق وتين ..أنا بحج مرتين ف السنه مره ف الصيف ومره ف الشتا
وصليت الجمعه الى فاتت كمان
ومكنتش عاوز اتكلم بس مضطر .. انا اتبرعت بمليون جنيه من يومين لاعمال الخير
المذيعه:اعمال الخير؟
جمعاوى:انا أتبرعت لمدرسه الرقص الشرقى عشان العلم نور
المذيعه : طب ياترى مين الاسماء الى كانت ورا نجاحك؟
جمعاوى هما اسمين بس اسم المنتزه واسم الرمل
المذيعه : وايه اخبار ألبومك اللى جاى
جمعاوى: ألبونى اللى جاى غنيت فيه للوطن وقلت ...مصر هيه أمى طنطا هيه خالتى
وغنيت عاتفى...اللى يرن عليك ياقلبى كل يوم كنسل عليه
وغنيت عن التعاون ...ياحبيبى فلينى فلى دأنتا حبك انتاج محلى
المذيعه:ومعانا دلوقتى اتصال تليفونى
العفريت:ألو يامذيعه ممكن اكلم جمعاوى؟
المذيعه : اتفضل بس قول اسمك الاول
العفريت:اسألوه وهوه يجاوب أنااللى كنت فاكر أنه لما هياخد الصوت الجميل هيستخدمه صح
جمعاوى:اهده بس حضرتك احنا ع الهوا بلاش فضايح
العفريت:ياشمهورش ياشمهورش حبشتكان حبشتكان ارجع ياجمعاوى زى زمااااااااان;)

[RoCk AnGeL]

hhhhhhhhhhhhh..............
kol mawdoo3 bet7otto beyda7ek aktar men elle ablo ........

teslaam.........

[tito20111]

شكرا على هذه الردود الجميلة

وأرجو أن تنا أعجابكم::جيد::

ودى هدية منى لكم واحدة جمعاوى كمان

ما تفهمونيش غلط يا اخونا يا بتوع الفول ... أنا مقدرش على زعلكم اليومين دول بالذات .. خلاص مالنا غيركم

منعوا عنا الفراخ وإحنا مش وش سمك ولا اللحمة بتيجي معانا سكة ... أنا أقصد من العنوان ده إن العلاقة بين الفول والمصريين علاقة طردية .. خاصة لما اكتشفنا إن مش الشعب لوحده اللي بيعشق الفول ده الحكومة المحروسة كمان طلعت بتاكل معانا من نفس الطبق .

ياعني غرقانين في الفول حكومة وشعبا ...

الدليل على كده إن حكومتنا دوناً عن كل الحكومات اللي خلقها ربنا بتتعامل معانا زى السباك اللي شغال باليومية أو الحلاق اللي شغال بالراس ، عشان كدة استحالة تلاقي عندها خطط لمواجهة الطوارئ أو سيناريوهات لمواجهة الأزمات ولو سألت أي وزير

وقلتله : عندكوا خطط طوارئ هيرد عليك ويقولك : مين أم طارق ؟.

وأثر الفول ظاهر في مفاصل الحكومة مع المصايب اللي نازلة تلف علينا ليل نهار ..

وحادث العبارة مش بعيد عننا " لما حصل اللي حصل الحكومة اتلبشت وبقت بتخبط في الحلل أ ُسر الضحايا ما استحملوش ولما حست الحكومة إن الموضوع فلت من إيديها نزلت ( القمل ) المركزي وهاتك يا ضرب في الناس الغلابة : البحر من أمامكم والحكومة من خلفكم والدكر منكم ينفد بجلده ،

وبدل ما الحكومة تقعد وتواجه المشكلة كبرت دماغها وراحت الإستاد تتفرج على الماتش

ولما انتصرنا وأخدنا الكأس الشعب هو كمان اتبنج من الفرحة والفول اشتغل ...

واحد يقولك : كابتن حسن شحاتة هيبدل مع كابتن نظيف وهيشكل الوزارة الجديدة

وواحد تاني يقولك : اللي حققناه ده أعظم من انتصار 6 أكتوبر

- وعلى رأي الشاعر : ( مصائب قوم عند قوم فوائد (

فلما بتوع الفراخ اتخرب بيتهم مش بس بتوع السمك والجزارين اللي لعبت معاهم وبس دا كمان الحكومة لعبت معاها وقعدت تدبح في الفراخ والحمد لله إن الناس ملهية في غرق العبارة ...

وطبعا يا ويله وسواد ليله اللي هيقف في الشارع مع فرخة .

وإيه يعني لما حوالي 2 مليون مصري ( اللي شغالين في الفراخ ) يتخرب بيتهم لازم نضحي بجزء من الشعب عشان جزء من الشعب يعيش .

وعشان أكون محايد ما ينفعش أنكر ان الفول اشتغل معانا إحنا كمان كشعب ..

أول امبارح وأنا داخل الشارع لقيت الناس عمالة تجري ..

- إيه يا عالم في إيه

- الحق نفد بجلدك ، فيه فرختين بيتمشوا على الرصيف

وبالبحث والتنقيب عرفت إن ) عم أحمد كتاكيت) بتاع الفراخ اللي جنبنا خاف يدبح الفراخ اللي عنده فأطلق سراحها .

وعلى فكرة عم أحمد ده ما يقدرش يعيش من غير طبق الفول بالطحينة كل يوم عشان كده مخه بقى طحينة ..

المشكلة في الفول انه هو اللى خلى الحكومة تسقط شبكة والشعب فاصل شحن




وصباح الفـول يامـصر

------------------------------------------------------:rolleyes:

[RoCk AnGeL]

هههههههههههههههههههههههههههههههههه................

كفايةةةةةةةةةةةةة هييك ..أنا هموت من الضحك

[عاشق الانيمي]

ههههههههههههههههههه بس بس بس كفاية خلاص

[tito20111]

hiiiiiiiiعاملين أيه معلش أنا أصل كان عندى أمتحانات علشان كدة بألى مد محطتش جمعاوى

بس علشان خطركوا أدى وحددة جمعاوى منى هدية::جيد::

فيه بنات كتير زعلانين من الموضوع اللي فات وأنا مقدرش على زعلهم وراجع عشان آخد بتارهم (إحنا جين نهدّى النفوس)

بقول, زى ما فيه فى الجامعة بنات متعجرمه فيه عندنا برضه شباب آخر خنفسه..منظرهم هيخلى روحك فى منخيرك .. وودانك فى مصارينك..تخيل إنت بقى لوبعد عُمر طويل الواد المتخنفس اتجوز بنت متعجرمه هيطلّعوا إيه؟؟

سألت واحد من الشلة فى كلية التربية لغة عربية عن معنى( الخنفسة) رد وقال: ليها معنايين



المعنى اللغوي لخنفسة : هى حشرة أغمق من الصرصار وجّيه من التخنفس وجمعها خنافس ولما بيدلعوعها بيقولولها (خنا فيسو)

أما المعنى الإصطلاحي فملهوش دعوة بالمعنى اللغوي خالص معناه إنك تكون هايص ومايص وكمان لايص إنك ترقق كلمتك وتدلع مشيتك وتشخلع ضحكتك وتقول بعلو صوتك .. الوداع يارجولتى مع السلامة ياشنبي



وسألت مرة واحد صاحبنا متخنفس إنت إيه اللى خنفسك ؟ قال : (عشان أجنن البنات..ويبقوا بيموتوا فى دباديبي وأمشي مع أكبر عدد منهم وأختبر أخلاقهم وأختار من بينهم شريكة حياتى اللى هتكمل معايا مشوار الحياة الطويل)..

ياسلام عليك يا أبوجلمبوا ده أنت ولا أفلاطون فى زمانه..هوّ إنت فاكر نفسك نازل السوق تشتري إزازة خلّ..دا جواز يابابا مش لعب عيال....




إلى كل الخنافس البشرية أتحدث:

إنت ياللي مسقّط بنطلونك وماشي تتمختر, وأنت ياللي آخر مرة حلقت شعرك من 3 سنين ومربّى شعرك وعامله غابات إستوائية وأنت ياللى لابس حلق فى ودانك وعاملنا فيها ( حسنية) , وإنت يالّلى صوتك أنعم من باكو بسكويت نواعم

إلى كل هؤلاء وآخرون بنقولوا:

فرق كبير بين الروشنة والخنفسة .. مش عيب إنك تكون واد روش بس العيب إن الروشنة تقلب معاك خَنفسة وتبقى الجامعة بلاعة على حِسّك

الخَنفسة إدمان مش مرتبطة بزمان ومكان هتخلّى صاحبها عنده 28 أو30 سنة ولسّه ما إتفَطمش..اللي زى ده ميعرفش يفتح بيت أخره يفتح إزازة حاجة ساقعة ويشربها.....

ويا يرب يعجبكم و يا يريت أشوف الردود المشوقة والجميلة

ولكن انا أبغى أسال سوال ليه ما بتظهر التوقيع فى الردود والمواضيع

[وائـل]

عارف يا تيتو

انا من اشد المتابعين للاعمال المصرية و بـ (( شغف ))

والموضوع حقك والله روعة الروائع ولكن ينقصه الترتيب بس

وياليت اشوف جديدك وجديد (( قمعاوي ))

[tito20111]

شكرا على هذا الرد الجميل منك على العموم أنا بنقله من موقع أسمهwww.gam3aonline.com (www.gam3aonline.com)

ياريت تخشوا عليه أصل ده فى حاجات حلوة كتير




السلام عليكم

[السلحفاة المحتجة]

هههههههههههههههههههههههههههههههه

مشكوررررررررررررر اخوي

[Ranzy]

شكراً أخوي على الموضوع

[Demons Hunter]

مش عايزينك تبطل جمعاوي
القصص تموت من الضحك