ماضي الاعضاء ..تسرد عبر صفحات ميجا مكس..واقعيه..ارجوا الدخول

[Ashwaq]

..

السلام عليكم

طبعا سوف نخصص هذا المكان لقصص الاعضاء وحادثه حصلت لهم وضلت في ذاكرتهم الى الان.سواء...كانت مألمه او مفرحه ارجوا منكم سردها لنا لنقرائها.معا .

بسم الله ابدء...قصه حقيقيه حصلت لي

حصلت لي حادثه عندما كنت في العشرين من عمري..حادثه لن انساها مهما حيت طبعا هيه مؤلمه لكن الحمد لله..مرت بسلام...كنت قد ..حصلت على تقدير افرح اهلي ..فكانت لاختي بنت صغيره تحبني كما لو كنت اختها الكبرى..كان عمرها 8 سنوات..فقررت بعمل مفاجاه حتى افرح بها..وكنت اريد قطه لانني احب القطط كثيرا..وعندما اشترت الهديه..:تعجب: لم اصدق ما رايت حوض سمك..واسماك في قمه الجمال والروعه..سبحان الخالق..اثنتان شفافتا وبهما خط زهري واخضر فسفوري..والاخرتان برتقاليتين وذيل طويل كانهما عروستان..بفستان الزفاف...المهم..كنت اعتني فيهم طوال الاوقات لاني احببتهم جميعا..وفي يوم كتب لي ان يحدث ما حدث..قمت بغسل الحوض ووضعت الاسماك في حوض صغير..لا يتسع لهن لكن كانت مؤقته..ووضع الماء اعتقد فوق المطلوب..حملته من الفوهه كسر..سقط على الحوض..وشقف في يدي..رميت الشقف..وفجاه وانا انظر ليدي اليمنى...وجدت نزيفا خفيفا لا يذكر..قلت في نفسي لا باس خدش صغير..واذا الدم ينزل كانه صنبور ماء مفتوح..:محتار2: ..لم ادرك ما حدث لكنني تخيلت انني سوف اموت..نعم اموت:( ..اصبحت ملابسي ملطخه بالدم..كانه دهان احمر..ركضت وانا ابكي واصرخ..واستغيث باخواتي..كل واحد لم تعرف ماذا تفعل.. واحد ذهبت لاحضار الثلج..والاخرى ذهب لتخبر اخي..وركبت السياره وذهبت للمستشفى..طبعا الحمد لله انها لم تكن بجانب الشريان والا لكنت ميته الان..وقد وضعت 12 غرزه..ولفت بشاش حتى لا تلتهب..احسست بدوار نتيجه فقدان الدم ولكن الحمد لله..زال الخطر..واعطيت ابره لكي يخفف الالم..وهكذا رجعت الى البيت وانا سالمه..واحمد الله على كل شي..واشكره لان هو اللذي نجاني..طبعا الجرح بعيد عن الشريان ..نصف شبر..وطوله طول الخنصر ..ما زال الجرح موجود..وهذا لكي اتذكر واحمد الله دائما...طبعا الاسماك الصغيره ماتت في نفس اليوم اللذي قطعت فيه يدي اما الكبيره بقيت على قيد الحياه لمده ثم ماتت:بكاء: .

الحمد لله..على كل حال

تحياتي::جيد::

[سابرينا]

هلا ريمي ..
مشكووورة حبيبتي على الموضوع الحلوووو ::جيد::
وبصراحة قصتج وايد محزنة :بكاء: يحليلج بس الحمد لله على كل حال ..
وبصراحة ذكرتيني بيوم انجرحت أنا بعد بس أنا ما كنت كبيرة مثلج كنت صغيرة صف ثاني ابتدائي تقريباً ..
كان الوقت العصر وكنت قاعده أمشي وشاله<== حاملةً ;) في إيدي مجموعة من الفناجين وكان أخوي يركض وبعدين بوووووم :تعجب: حدث الصدام الكبير طاحت الفناجين من إيدي وتكسرت .. بصراحة أول شي ما انتبهت وعادي كان بس بعدين يوم شفت إيدي ( تقريباً مكان المعصم ) وشفت الدم الي يطلع منها انصدمت :تعجب: وبديت أصارخ وأصيح ودبعا ودوني المستشفى وخيطو إيدي وكانوا أربع ممرضات يبغون ايودوني مب قادرين :p وأثر الجرح والخياطة لين الحين ما راحت وكل ما أشوفها أتذكر ذاك اليوم :بكاء: بس الحمد لله على كل حال ..
يالله الحين دوركم نبغي نسمع قصصكم الحزينة ;)

[محبة الكابتشينو]

ااااه :( قصصكم اهيء.. بس الحمدلله انكم ما متوا و للا شيء :p (شوفوا البنت تتفاول على الناس)

انا ما اتذكر قصص كثيرة يوم كنت صغيره بس في مرة وحده اتذكرها.
يمكن كنت 8 سنين.. جبت كاسه بلاستيكيه و عبيتها بيبسي..خخ يعني بسوي مصاصه و دخلتها بالفريزر / الثلاجه.. يوم طلعت متجمده كان ودي ادخل فيها زي العمود الحديدي عشان اقدر امصها.. حاولت ادخلها بالقوة.. بالاخير دخل.. و كانت يدي تحت الكاسه و دخلت الحديده فيها بعد.. ااااااه :eek: رحت المستشفى و شالوها و الى الحين اتذكر الدم و هم ينزل على ارض المطبخ..

وووع :p

مشكوووووووووووووورةعلى الموضوووع

[ZA7EF]

ليش كل قصصكم دمويه حشا مو بنات هذولا دراكولات

[SERENA]

:بكاء: :بكاء: :بكاء: :بكاء: :بكاء: انتوا الجروح في يدكم وانا ايش اقول الجرح في خدي مشوه لي وجهي الحلو:بكاء: :بكاء: :بكاء:


لما كنت صغيره كان عمري 2 وكانت اختي ليدي 3 سنين المهم كنا صغار
وبنجري ورا بعض وكانت هي ماسكه موس في يدها:تعجب: بس وانا بجري تحط في الارض وتجيكم اختي ليدي وتشك تشرط لي وجهي:بكاء: :بكاء: :بكاء:
وبس ويشر الدم وانا ابكي واصرخ واختي تبى تسكتني وماهي عارفه كيف::مأزق::
بس بعدين رحت ابكي لبابا في الحمام كان بيغسل لاخوي الصغير وجهه:تعجب:
بعدين لماشافني بشر دم طلع يجري شالني ووداني على المستشفى وخيطوا لي وجهي وياريت الي خيط جراح لاء الي خيط طبيب عام لان الجراح كان في اجازه بس وجهي دحين مشوه من اختي وكمان الدكتور كمل الناقص :بكاء: :بكاء: :بكاء:

شكرالك ياريمى على الموضوع هذي موقصه حزينه بس مني فاكره شي هذي
جات في مخي لانكم كاتبين مواقف تقريبا شبهها:D

[ZA7EF]

حرااااااام عليك يا ليدي حتى اوسكار ما وصلت لهذي الوحشيه شكلك ماخذه دورات مع شارون يعني اذا وانتي عمرك سنتين تلعبين بالامواس لما يصير عمرك 20 وش تسوين؟؟؟ شكلك بتصيرين تمزحين ببازوكه :p

[تويتــــــي]

:بكاء: :بكاء: قصصكم مؤلمة كثييييييير :بكاء: :بكاء:



ليش كل قصصكم دمويه حشا مو بنات هذولا دراكولات

هههههههههههههههههههههههههه ::سعادة::


أنا ما اذكر قصة محددة حالياً ::مغتاظ:: ::مغتاظ::

[قلب اللازوردي]

:بكاء: :بكاء: :بكاء: شو هالحزن هذا يا ربي ... الحمد الله على سلامتكم حبايبي .. إن شاء الله ما تشوفون شر .. عاد اسمحلولي بزيد المأساة عليكم شوي ..:p

كان يا ماكان في قديم الزمان لما كنت بعدني ياهل بالـ KG أظن كان عمري 5 او 6 سنوات ,, كنت رادة البيت في الباص الصغيروووني اللي للكتاكيت مثلنا بسسس:D ولما وصلت عند بيتنـا انا الذكية لاني كنت يوعانة ركضت جدام الباص .. والله لا يوريكم أبداا طيرني الباص :بكاء: :بكاء: والمشكلة بعد ما طيرني سحبني وراه والله كلهم قالوا خلاص ماتت البنت صارت جثـة .. وأنا أنزف دم ( أكيد دم عيل شو :p ) ههههههههههه المهم الفريج كله خذوني المستشفى .. ما أعرف بعدين شو صار أظن سوولي ( مب سوليداد ):p عملولي عملية والله ما أذكر::محتار:: المهم وبعد ما زال الخطر وتعافيت الحمد الله عاد قاموا يدلعوني كل يوم كاكاو وألعاب:D حتى مدير المستشفى حليله ما قصر اييب اولاده عندي وانا اكفخهم وأطيرهم عند باباهم لانهم يشاركوني في ألعابي كنت بنت عنيييييدة جداااا:cool: وبعدين رديت البيت وعرفت ان سائق الباص انسجن لـ3 شهور ( شوييية::غضبان:: ) ويت الابلة بيتنا تترجى ماما ترد ترسلني الـ KG بس ماما قالت لا بنتي ما ترد بتم سنة في البيت ترتاح .. ( الله على ماماتي :D ) وبعد سنة رحت اول إبتدائي ..

أكمل القصة والا بس::محتار:: ::محتار::

لالا بس خلاص ... :D
شكرااااا ريمي ..::جيد::

[ليدي أوسكار]

خخخخخخخخخ
يالطيف:confused: خهخهخخهخهخه سلامتكم الف سلامه

انا بكتب شي حصل لي طبعا عمري ماانساه

كان عندي صاحبتي من اولى ابتدائي ولما اصبحنا في اولى متوسط نقلت من المدرسه بس كنت احيانا اروح عندها ودايما اكلمها بالتليفون

ومرت الايام وكنت في جده وتيجي اختي وبنت خالتي يقولولي ليش ماتتصلي على صاحبتك (غ) اقلهم دحين بعدين وكل شوي واحد يتكلم عنها وماما تتطالع في مدري كيف شويه وحتبكي

انا :rolleyes: :rolleyes: ياناس خير ايش في

الا يجي اخوي الصغير يقول (غ) ماتت:eek: :eek:

انا انبلهت مو مصدقه :confused:
اقلها ماما من جد

قالتلي ايوه 8 يوم العيد كانوا رايحين جده وصارلهم حادث وطارت على الرصيف التاني وماتت هي وولد عمها :(

انا اول يوم ماصدقت بعدين تاني يوم جلست ابكي زي المجنونه بس ابكي الين كنت حموت من البكى وقفلت على نفسي باب الحمام:rolleyes:

وبابا يسكتني ويقولي الاعنار بيد الله وانا ماارد
بعدين رحت لامها في البيت قالتلي انها قبل لا تموت كانت حاسه واتصلت علي تودعني وانا كنت في جده:mad:

واعطتني صورتها وشعر كتبته معلمتها

وفي بيت شعر لما قرأته حسيت الدنيا لفت في راسي وصرت ابكي

: (ابكي عليها مرارا وقولي متى وايان ارى (غ)

والله عيني دمعت وانا بكتب ذكرتوني

اصعب شي ان الواحد يفقد شخص عزيز ولن انساها طول حياتي واذا بعدين اتزوجت وجبت بنت:p

حسميها بسمها اهئ اهئ

==========
شكرا لك ريمي على الموضوع



==========================

:confused: :confused: :confused:

اقتباس:
حرااااااام عليك يا ليدي حتى اوسكار ما وصلت لهذي الوحشيه شكلك ماخذه دورات مع شارون يعني اذا وانتي عمرك سنتين تلعبين بالامواس لما يصير عمرك 20 وش تسوين؟؟؟ شكلك بتصيرين تمزحين ببازوكه




=============

:mad: :mad: :p ليش عاد شايفني مجرمه وكنت صغيره كمان

وعلى فكره عشان مااخلي الخبله اختي تبكي جرحت نفسي شوي بس راح اثرها >>>>>>>>>>>>خهخهخهخه:cool:

ماوصلت لشارون ياسحليه زاحفه ولا ضب مدري:rolleyes: :p

[ZA7EF]

الرسالة الأصلية كتبت بواسطة ليدي أوسكار :
وعلى فكره عشان مااخلي الخبله اختي تبكي جرحت نفسي شوي بس راح اثرها >>>>>>>>>>>>خهخهخهخه:cool:

ماوصلت لشارون ياسحليه زاحفه ولا ضب مدري:rolleyes: :p


يييييييييييييييو هذي مو ماخذه دورات مع شارون هذي راضعه معه
ييييو ياليهوديه جيتي تكحلينها عميتيها يعني مو كافي جرحتي البنت بموووووووووس يالارهابيه لا وتبغين تطلعين نفسك مظلومه وجريحه :p بس تدرين حركه زاحفه من الدرجه الاولى ::جيد:: >>>>>> التصريفه مو جرحك لسيرينا مسكينه

[OSM]

ما شاء الله تبارك الله


والله لو انا في مطاقة حواري

وحده وجهها ووحده داعسها باص
ووحده دخل سيم بيدها ووحده طقت سمكه وعضت يدها :p

على العموم سلمات ::::

بالنسبه لي انا ياكثر ما نزل مني دم واكثر مره هي مرتين مو مره
المره الأولى اني كنت بالحوش العب بالسيكل والله ومتحمس
والأرض مبلله لأنه الحوش كان مغسول
وكنت راكب السيل حافي مني لابس جزمه
المهم والله وازحلق
وتخش رجلي بين الترس حق الجنزير والجنزير
والله ومحل العظمتين الطالعات برجلي كله مفتت
العظم انحت والجلد انصلخ <<<<<<< وصف مقزز
وقالي ابوي يالله نروح المستشفى انا عييت ورحت غسلت رجلي
وحطيت عليها مكروكروم وغطيتها بشاش
وقعدت اسبوع لين هدا الجرح
ورحت للمستشفى وقالوا لي انه العظم تفتت
والحمد لله ما بقي من التشويه برجلي الا شي بسييييييط
والعظيم سليم معافى ....

القصه الثانيه
هي اني كنت ماشي للنادي (( هذا الكلام بثاني ثانوي ))
وكان ولد خالتي طالع فوق الملحق مدري وش مطلعه فوق
المهم كان ولد خالتي بيده حديده مدري وش هي المهم قلت له انزل بيدي شوي شوي
والله الا والولد ناقز فوق
انا ارتبكت ويوم طاح الولد بحظني احس شي بجنب حاجبي الا والحديده اللي بيده

ضربت عرق بشكل مبااااااااشر
وانا ما خوفني الا شكل الدم وهو ينزل
طبعا يوم رحت للمستشفى
المخل اللي دخلت فيه الحديده ما يتخيط لنه صغير بس ينزل دم كثير
المهم مدري وش حطولي واعطوني ابر ونمت وقمت
يوم سألت الممرضه وش صار لي
قالت لي اني فقدت 20 % من دمي واصبت بإغمائه
وتبرع اخوي العود بدم لي
وهذا كل القصه

اذا خلصت القصه ما انصحك تاكل
:D

سلام

[Endless tears]

والله قصصكم تعور القلب !!

بس والله انا ارد و انا ابتسم !!مب علشان القصص علشان تعليق الاخ زاحف !!
والله ضحكيتني !! زين انته قولنا قصتك !!

على العموم!! الصراحه انا لي مغامره !! اذكر يوم كنت صغيره ..يمكن عمري 6 سنوات ..كان عندي العاب صغيره على شكل السنافر !! المهم اخويه اخذ بابا سنفور و رماه ..فوق البيت .. وانا كنت مصممه اني ارجعه ..
فسرت يبت الدري .. و حطيته على الجدار .. و ركبت على الجدار !! بس ما قدرت اوصل لفوق !! و شفت بيب لصق على الجدار ...قلت بتسلق ! المهم انا فعلا مسكته وحاولت اني اتسلقه !! بس واير كهربه يأ على راسي !! وتكهربت ..وطحت من فوق لين تحت ..واغمى عليه و محد يعرف ... بس زين اني طحت على التراب .:.:.:.ولا كان مت !! المهم ..اكتشفوا امري بعدين !! و خذوني للمستشفى .. و كانت لي ضربه بجانب الحاجب !! وطبعا خاطوه ..ويمكن بعض الاشخاص يلاحظون انه في علامه على حاجبي ..بس خفيفه !! !!

و خلصت القصه !!

تحياتي
اندليس تيرز

[OSM]

الا يا اخ زاحف ليش ما تكتب لنا مغامراتك :confused:

[ZA7EF]

طيييييب نعطيكم قصه وعلى نفس النمط الدموي :p طبعا واقعيه مو زي باقي قصصي
يقولك هذا اول ما طلعت السياره قبل سنتين كنت طاير ومتجنن فيها تقول معي لمبرجيني مو هونداي
واجيك في احد الايام في اخر يوم من الاختبارات الشهريه الاولى زاحف عند كل زاويه هاند ( اعرف ان البنات ما يدرون وش معنا الكلمه هذي بس بصراحه ما اعرف لها مرادف في اللغه ما ادري ، الزبده اني قبيت ام التفحيط ذاك اليوم ) >>>>> يقولك الولد من يوم ما طالع فلم دريفين وهو يحسب عمره سيلفستر ستالوني ، الين طلعت اللي في راسي واطلع عالخط متجه للبيت طبعا المسجل يصدح بصوت ركي مارتين باغنيته الزفت ذيك >>( الحين صارت زفت) اللي يعد في 1 .2 .3 الي الي الي ..... ما ادري حتى وش اسمها نسيته من الدبجه اللي جتني بعدين ، طبعا زاحف خاش جووووو من الاغنيه وطبعا دايم انا تفاعلاتي الداخليه تبان على تصرفات سيارتي لأننا كلنا واحد >>>> تكفى يا روميو وجولييت ، المهم مع كل عده من ريكي انطل السياره يمين وشمال يمين وشمال ولا تقول واحد عاطبها ( سكران يعني ) وراجع من البحرين المهم المشكله ذيك الايام حرررر وطبعا الاسفلت نار والكفرات لحالها من دون حرارة الارض حارقها .... عاااااااااد اقولك في لحظه خاطفه وابو الشباب ينطل ومروق وخاش جو مع الاغنيه ويضرب ذاك الكفر وحوووووووووووووو السياره عقدت ثمان مدري عشر عقد في الشارع ما يسويها ولا سعد مرزوق ( هذا اسطوره سعوديه في التفحيط عند الزاحفين) عاد زاحف صابته حاله من الاستدلاخ ما عاد ادري وش اسوي لأنه اصلا مافي وقت وياليت الموضوع عدا على كذا السياره انحرفت عن الطريق اللي هو اصلا مرتفع عن الارض اللي حوله وضربت في الرصيف طارت في الهواء >>>> حشا مو سياره هذي لاعب اكروبات ، شالت شجرتين كانوا فوق الرصيف وطبت تحت جنب الرصيف على سور حديدي>>>>> يعني حركه لو بغوا يسوونها في فلم هندي ما صارت زي ما يقولون 3 في 1 .... ، طبعا السياره تكسر والدينها ومن فضل الله ان التنده ( سقف السياره) انكسر من جهه وحده هي الجهه اللي طاحت عليها الساره وبالتالي راس زاحف سلم لأنه في الجهه الثانيه ، في هذي اللحظه انا ما كنت افكر في السياره ولا في اللي يصير كان في بالي شي واحد بس هذا اللي يصير حقيقه ولا خيال :confused: ؟؟ ، المهم اول ما ثبتت السياره على الارض طبعا بدت تطلع دخان واصوات غريبه ، زاحف يييييو بتنفجر السياره سنفروا بحياتكم ، بس المشكله مو في هذي انه من الدلاخه قفزت مع الشباك المتكسر زجاجه وانجرحت في في راسي جرح بطول 16 غرزه مع ان الباب كان ينفتح (بس تدرون زين اني انجرحت لأني لو رجعت البيت زي الدلخ مافيني شي كان ارسلتني ام زاحف عالعنايه المركزه بعد دبجه قاضيه بالملاس.. عربجيه امي تعجبكم ) يعني سلمت من الحادث كله وانجرحت وانا قاعد اطلع من السياره >>>> بالله شفتم نحس اكثر من كذا.... طبعا ولا حسيت بالجرح لأني الى الحين في بالي ان الوضع مجرد حلم وبعد شوي بقوم >>>> ما اقولكم الولد عاطبها ....... طلعت من السياره ويا سبحان الله يعني من بدايه الحادث الى طلوعي من السياره ما اخذ خمس ثواني بس اول ما طلعت لقيت امة محمد واقفين يطالعون :eek: :eek: ولا تقول كائن فضائي من المريخ نازل قدامهم ، عاد طبعا زاحف لا زال مصاب بحالة الاستدلاخ قاعد يطالع مره في الناس ومره في السياره طبعا الحواس كلها طافيه >>> مكينه مولنيكس هذي مو حواس ....، المهم الناس قاعدين يأشرون ويصرخون من بعييييد وزاحف لسا مسطل يرفع يده ويأشر لهم >>>>> يزعط سامي الجابر .... المهم بعد فتره فهمت انهم ما يبون يسلمون علي كانوا يبوني اطفي محرك السياره عشان ما تنفجر طبعا قعدت احك خشتي عشان افهم الموضوع ونزلت يدي الا يدي حمرا ......... حمرا :eek: ااااااااااااااه بموووووووت وين الاسعاف تعالوا احد يشيلني هااااااااي >>>> ( ما كنك توك كنت تنطنط وتأشر للناس ما فيك الا العافيه .... ولا حياة لمن تنادي الناس خايفين تنفجر السياره عندها بديت اثقل رحت للسياره طفيت المسجل ( لاحظ الرايق ) طبعا لعنت والدين والدين ريكي مارتين واللي يسمعونه مره ثانيه وطفيت السياره ........ الا امة محمد نزلوا لي اللي يشدني مع ثوبي واللي يمسك راسي واللي يقول سلامات واللي يرشني بمويه من بعيد :confused: واللي طلع شريطي ( تاجر سيارات )ويبي يسوم السياره عشان يبي ياخذها التشليح ، ناس فاضين عاد زاحف زاحف في كل مكان قعدت اطالع فيهم وعلى وجهي ابتسامه صفراء >>>> سقراط على غفله ، عاد اول ما شافوني الناس ابتسم قعدوا يتحمدون يقولون الولد صفق براسه وانهبل ، المهم بين الزحمه هذي كلها وصلت الدوريه بعد ربع ساعه من الحادث والاسعاف طبعا ما وصلت ( سبحان الله والناس يقولون ان الدفاع المدني السعودي اي كلام ) جاني العسكري شالني ركبني الدوريه ورحنا عالمستشفى والمستشفى له قصه ثانيه طويله هو الثاني .... اعرف اني طولت عليكم وان الاغلب ما بيقرون هذي الجمله اصلا لأنهم بيوقفون عند السطر الثاني ولا الثالث والصبور على الرابع وبيكتبون رووووعه نشكرك عى الموضوع الجميل والمفيد >>>> والله انكم مانتم دارين وش الطبخه ...... عموما شكرا

[nyskoa_pek]

أة منكم بس على قصص ::غضب شديد

[ZelDa]

و شو هذي المواقف الي تعرضتوا إلها الله سلمكم ..

انا ما اذكر وايد شو الي يصير معاي

بس اذكر مرة و عمري ما بنساه هذاك اليوم كنت صغيرة كنا انا و خوي فوق السطح .. انزين ... فوقفنا على الحافة تقريبا .. جان أقوله .. اقفز قال : لا .. ما بقفز اروحي جان اقولة اقفز بقفز وراك .. قال انزين :تعجب: والله قفز بس شو صارر ؟؟؟؟؟؟؟؟؟

انكسرت ريله الله ستر زين ان المسافة ما كانت و ايد :p

وايد مواقف تعرضت إلها بس ما اذكر احين بهذي اللحظة ..


مشكوورة ريمي على الموضوع ::جيد::

[OSM]

انا عرفت الحين ليش زاحف زاحف


والله من الحادث اللي جاك تلاقي دماغه لف مع العقد

لا وريكي مراتن بهوندا
يلعن ام الأقلاع

ومدري ايش ام الرواق اللي عليك
تروح تطفي المسجل وتطلع الشريط


بسم الله عليك


ما سوو لك فحص دماغ


على العموم ما صار الا خير


ذكرتني على سالفة السياره
مره كنت راكب مكسيما جديييييييده موديل 2000 ( اول ما طلع ) وكان خويي توه يتعلم السواقه
شوي الا هالدبشه ينطل بمكسيما ويا ليته يعرف ينطل
الا شوي تجي زي بقعة مويه بالأرض ويتل هند عليها
وتزحلق السياره يا سلااااام
انا ما كنت خايف
كنت انتظر متى توقف السياره
والله وكان فيه حفريات على نهاية الشارع
الا وتدخل المكسيما وتطيح جوى الحفريات بالعرض
والطيحه على شباكي
والحمد لله ما جاني شي
بس اللي عقدني انه الولد طلع من السياره يظحك

وجانا بعد اسبوع مطلع لومينا حمرا اس اس :mad:

[WaSiMoO]

وش هالقصص البوليسية ياعيني:rolleyes:
الله لايبلانا بس:cool:
من المواقف الي صار لي يوم انا كنت صغير توه جدي الله يذكره بالخير ويخليه لي اشتريى لي دراجة (سيكل هنود) بمناسبة نجاحي من اول ابتدائي ورايح ثاني ابتدائي طبعا فرحان ومتشقق من الوناسة بالسيكل:cool:
وانا كنت داعس بالسيكل ومسرع جيت طاير وكان في درج في الحوش في بيت جدي وصدمت رجلي بزاوية الدرج الحادة والله لايوريكم المنظر المقرف اعوذ بالله رجلي صارت الوان والعظام مادري وش صار فيها المهم خذوني على المستشفى وجبسوا رجلي على ماظن والله ناسي السالفة قديييييييييييمة
المهم اخذتها عبرة وماصرت اسوق سياكل:بكاء:
================================================== =
في قصة ثانية وانا عمري اربع سنوات كانوا الاهل طالع مع الوالد في احدى الحدائق الكبيرة
واول ماجلسوا اهلي وانا ملقوووووووووووووووف يوم كنت صغير المهم رحت وخليتهم وجاني واحد تقريبا عمره 10 سنين سايق سيكل وطاير فصدمني بالسيكل وطحت واغمى علي ماصحيت الا بالمستشفى بعد ماخيطوا لي الدكاتره راسي وللحين اثر الصدمة وجود في راسي:( تهي تهي تهي:بكاء: :بكاء: الله ينتقم من الي كان السبب :( تهي تهي تهي
واشكرك ريمي على الموضوع الي ذكرني بالماضي تهي تهي تهي:بكاء: :بكاء: :بكاء:

[TOON BOY]

مشككوورة ريمي على الموضوع
والصراحة قصص الاعضاء محزنه جداً
بالنسبة لي لا احب اتذكر الاشياء المحزنه التي حدثت لي ::جيد:: ::جيد::

[فلونا]

هههههههههه يحليكم صدق ان قصصكم محزنه :(


اسمعوا قصتي .. في يوم من الايام يوم كنت صغيره (( ما اعرف بالتحديد كم كان عمري )) كنت رايحة مع امي بيت الجيران وكان عندهم قفص حماااام كبييير بس كان متكسر يعني الحديد إلي يغطيه طالع منه .. ولد الجيران قالي تعالي نلعب عند الحمام المشكلة ::مأزق:: اني كنت اخاااااف من الحمااام واايد :بكاء: فرحت وياه ودخلنا داخل القفص وانا كنت واقفة بعيييد وهو كان يالس يلعب وياهم وفجأة :eek: طارت حمااام في القفص فأنا مت من الخووووف وقفزت برع القفص لين ما عورني الحديد المتكسر ولين إلحين مازالت العلامات باينه :بكاء:


شكراً ريمي على هذي الفكرة ::جيد::

[Ashwaq]

شكرا لكم من سرد قصه عبر هذي الصفحه...

الصراحه كل واحد وقصه شكل ...هههههههههه؟؟؟

سلامتكم ماتشوفون شر..والله يبعد عن كل واحد الشر...

ما فيه احلى من الصحه..:cool:

تحياتي::جيد::

[ЯŘ]

هههههههههههههه
ماشاء الله والله عليكم مواقف
اما انا اممممم ماذكر موقف معين
بس امممم اذكر اختي العفريته لما كان عمري ست سنواات احم
حرقتني بالشاااي يعني الشااي ثاااير يعني يغلي توه نزل من على النارؤ وقامت ست الحسسن هي عمرها كان خمسه شيلي الشاي وهو حار وقامت الجده تصارخ عليها وتقلها سيبيه لمنن يبرد وقومي يالخبله كبيه كله على خد اختك وااااااء.....انا طبعا واااء وااااءوماسكت لين ماورت من المستشفى المهم
واتذكر كمان هذيك العضه الي في ظهري واااااء تقولو اسد هذي مو اخت :p
خلتها تعلم والله بس دحين راحت مالها اثر:p
احم وابشركم انا ماسويتلها شي اختي الوحيده وماقدر اضرها بشي
كل الحكايه اني بس حرقتها بالمكوى في رجلها هعه هع وزياده البشارة لين الحين الحرق معلم
ههاااااااا وايش رايم فيني طيووبه:p
وتوشكري ريما عالموضوع::جيد::

[المتحري سينشي]

لا طيوبه كثيير :rolleyes:

هههههههههههههههه



أنا الحين مذكر شيء بعدين بقولكم :p :p