PDA المساعد الشخصي الرقمي

عرض كامل الموضوع : [ شعر ] قصيدة خير بالعاميه للشاعر عماد سمرى من ديوان مركب من ورق



emad samry
26-03-2017, 23:15
قصيدة خير
خير
اللهم اجعله خير
اصلى شفتك فى المنام
لابسه بمبى
شاده كحله فى جوز عيونك
وقاعده جنبى
حاطه راسك فوق كتافى
وعماله تبكى
بتقولى انا متزوقالك
متحنيالك
جايه فى خيالك
متقومش من نومك
خليك في الحلم جنبى
اصلى حاسه بالامان
خير
اللهم اجعله خير
اصلى شفتك فى المنام
عارفه يا جميله
وحياة عيونك دول
اللى الطهر ماليهم
انا بوعدك فى الحلم
ان فى الحقيقه منى همليهم
وكفوف ايديكى دول
المغروزين فى الشوك
بكره بالورد تمليهم
لو حتى كان فالواقع
سقف الامانى واقع
عن حبنا هترافع
فى محاكم الايام
وخير
خير اللهم اجعله خير
اصلى شفتك فى المنام
قومى غنى
مقلوش الغنا فى الحلم عيب
غنيلى اغنية الحب عمره
ما كان بالجيب
الحب شيب ومحدش دخل
فى علم الغيب
ف متخافيش متياسيش
متقلقيش متتوتريش
فى الحلم او فى الحقيقه
معاكى هعيش وهاكل
من يدك لقمة عيش
وهتحلالنا الايام
خير
اللهم ما اجعله خير
اصلى شوفتك فى المنام
.....
فى هذه القصيده : هذه القصيده تعبر عن حاله شعريه ممزوجه بتوقيت واطار محدد للقصيده الا وهو الحلم حيث اننا صغناها لكى تعبر عن فكره ندور حولها ونضع لها مغزى يعبر عن الحدث فى إطار شعرى متدرج ففى كل قصه نجد العله والاسباب والعلاج وهنا نصف شغف الحبيب الى حبييه عن طريق حلم فى منام نتسلل من خلاله الى مضمون القصيده ليروى لنا بطلها انه رائ محبوبته فى حلم وهى فى زينتها لكى يطفى جو من الثناء على انوثتها . ثم نتدرج فى الشطرات الى حزن يعتريها نتيجة الحرمان من الحبيب والتوسل اليه ان يبقى بجانبها فى الحلم ثم يبادرها هو بطمأنتها انه مهما حدث فى هى حبه وانه سيسعدها فى يوم من الايام الى اخر القصيده
اشكركم جميعا
الشاعر عماد سمرى

للاسنماع للقصيده بصوت الشاعر

https://www.youtube.com/watch?v=xHAKVH7FOj4

ابتسامة خريف
27-03-2017, 11:10
ولو مافهمت كثير لانها مكتوبة باللهجة المصرية بس التوضيح في الاسفل ساعدني شوي ..
على العموم تسلم ايدك ..
في حفظ الله

emad samry
27-03-2017, 23:38
ولو مافهمت كثير لانها مكتوبة باللهجة المصرية بس التوضيح في الاسفل ساعدني شوي ..
على العموم تسلم ايدك ..
في حفظ الله

شكرا جزيلا