PDA المساعد الشخصي الرقمي

عرض كامل الموضوع : يلعن إمه من كي بورد قصه من معناتي >_<



Life_End
19-11-2005, 15:18
[CENTER]يلعن أبـوه من كيبورد " قصه من معاناتي " ....

-----------------------------------------------


[COLOR="Navy"]صباحكون إشطه .. وللي جاين بالليل مساكون عـدس .. دا أول موضوع لي عاد لا أوصيكم مابي أتحطم xd
المووهيم .. أقولكم سالفة الموضوع حقي ذا لكن بشريطـ (ن) صغيرون قبل لا أبتدي فيه .. أبيكم ولا هنتوا <-- أي لا هنتوا ..
إلا ياأخي وياوخيتي .. أبيكم تسمعون هالأغنيه قبل لا تبلشون تقرون بهالموضوع .. تسمعون هالأغنيه علشان تربيط الجو <-- اسمها بالترطيب يالدقمه ؟؟ ..
إيييوه أقولكم عـاد علشان ترطيب الجو .. وعلشان تخشون جو
.
.
.
.
.
.
.
.

خرمان رقص وقتها ترى يعني العذر والسموحه .. المووهيم بلا طولة قرق ماله سنع .. الأغنيه للذوق الشعبي .. يعني على بلاطه تراها لموضي الشمراني مدري الشهراني .. كلهم سنايديه



ولا أقول لكم خلاص مو لازم اغنيه
ابيكم تخشوا جو مع القصه احسن

ومسوي إزعاج وأغنيه ووو أقول تلاااايط بس






START

يوم انها جاتني فترة الطفرة والمهايط والبذخ"امما البذخ؟!!<<يعني صرت منغنغ
احس اني صرت الوليد على هالكلمة".. قررت اني اشتري لاب توب جديد دي اس إلللل فل كامل مراتب جلد"ياشين اللي يتحمس بشغلة مايفهم فيها"...
رحت لسوق الكومبيوتر .. واول ماطبيت السوق وألقى هذاك الهندي،، قلت هذا سوق الكومبيوتر؟!!.. قال: ايوه هدا ثوق.. يغبى ثيديات؟!!..
قلت: خير يبو؟!! وش قاعد تقول؟؟؟..
قال: يغبى ثيديات ثديق؟!!
("والله انه حمار رسمي".. يقصد تبي سيديهات.. بس اثرم وحالته حالة.. وانا مافهمت )
المهم حلفت ما امشي من عنده الين اعرف وش يقصد.. واطفى السيارة واتكّـي انا وياه ..وأطلب اثنين شاي هو يقول: يغبى ثيديااااااااااات ثديييييق؟..
وانا اقول :ايييييييييش؟!!..
والعالم تروح وتجي واحنا مكاننا والمحلات تسكر وتفتح واحنا مكاننا..
عجزت افهمه,, وعلى هالحالة أربعه ايام..
ويوم فتحوا الناس المحلات عقب اربعة ايام الا يشوفوني وانا زانط الهندي برقبته في الشارع وانا ابكي وهو يبكي!!.....
ولافهمته الا بعدما طلع لي سي دي من جيبه"
المشكلة السي دي بعد مكسور من طرفه.... قمت سألت السيدي وش اسمك يابابا؟!..
قال: ثي دي<<< والله ان بعض الهرج يقول لصاحبه: دعني،،،،،،،

بعدين قلت له : لا ياصديق ابي لاب توب دي اس ال فل كامل مراتب جلد..
قال فيه موذود(ياخي هالسمللق لو تقول أبي كومبيوتر يبيض ويفقس زرافات خضراء قالوا موجود.. وبالملعنة يقنعونك)..
المهم قلت يالله واروح للمحل حقهم الا فيه مصري.. اسمه وائل قلت : إييييواااه والله اللي رحنا فيها!!..
بس قلت في بالي خلني ازيّـن الاخلاق معه عشان تخف نصبته علي"والا النصبة جايه جايه"..
وادخل المحل وابتسامة شاقتن وجهي شق لدرجة اني من كثر الابتسامة حسيت اني جوليا روبرتس
وحسيت ان وجهي انقسم مثل كوريا وصار وجهي الشمالي من فمي وفوق,, ووجهي الجنوبي من الفم وتحت وهذا ملحط بعد.. لعب عليه وجهي الشمالي ولا خلى له الا السكسوكة
(الله ياخذك ياوجهي الشمالي وراك تلعب على وجهي الجنوبي.. والله مالك داعي ياخي!!..)<<< والله يا انت ماثل بعد"ماصل"(انعديت)..

المهم ماعلينا.. واسلم عالمصري
قال : عليكم الثلام"اثاري البشكة كلهم رايحين فيها"..
قلت: بالله أبي لاب توب جديد دي اس ال فل كامل مراتب جلد..
قال : بث(بص) يافندم احنا عندنا كل حاقة موقودة أثل احنا أحثن محل بالثرق الاوثط.. لأأأ الثرق الأوثط ده إيه يااكث لارج .. بالعالم كلوو!!!.."يرد على عمره".....
قلت: ورا ماتاكل تبن يااكث لارج وتشوف لي جهاز!!....
وأشوف لاب توب كومباك أسود رحت أخرخر عنده قلت بكم ذا يابو بيضــة..
قال : بثبعة الاف بث..
قلت : بث؟!!..
قال: بث..
قلت : بث بث بثثثثث؟!!..(استلمت والدينه!!)..
فتحنا بركه جنبنا من السعابيل
واعطيه الفلوس وآخذ الجهاز للبيت.. ولو انه ماعجبني لونه أسود بس قلت عادي بعدين اغير له وجه"
قلت لكم ياشين اللي يتحمس لشي مايفهم فيه"،،،،،،،،


سويت له احتفال بالبيت وعزيمة وذبحت له وجبت محمد عبده وراشد الماجد يغني بعد"
بيبتوا <<< لاعب في البرازيل اللي جابوه الاتحاد مهوب اطلق منه"
بعدما رحبنا فيه خير ترحيب حطيته بغرفتي وشغلته ثم ركبت الهيدفون...
وجلست اطقطق عالكيبورد .. بس من الجفاسة أكتب باصبع وحدة .. واذا جيت ابي اضغط على حرف اقعد اناظر فيه مدة ثم ارفع يدي اليين ورا رقبتي ودووووف دااااف تقل ذابح أحد من اهلي،، وعلى هالحال .. بس انقهرت من الزر"حرف الكاف" حق الكيبورد اضغط عليه مايكتب.. محجّــر.. احاول يمين يسار.. مررة معصلق،، وأقوم وأصنّــه بكوعي!!!.. وابقّــسه .. ماااش!!........ والله واعصّـب"وياساتر لا عصّـبت" وابعد عن الجهاز الييين لصقت بالجدار.. وارررركض الين عند الجهاز واطمممر وصلت السقف ثم نزلت عالكيبورد وارافس برجلي على حرف الكاف .. ثم نطيت مرة ثانية وتربّـعت عالكيبورد .. وانا جالس عالكيبورد اناظر للشاشه وانا فاقن خشتي ابي أشوف انكتب الكاف والا لا؟!!..
بس قهرررر ما انضغط الله ابوه!!!،،،

بعدت عن الجهاز ورحت أدور سكروب عشان أطلّـع مهارتي في التخريب.. الا اشوف حرف الكاف طلع من الكيبورد ... ناظر لي نظرة من فوق لتحت ثم رفع خشمه وطلع من الغرفة ،، الأخ مو ضارب حساب
قلت : ارجع ياعبد السوء!!...تعال هنا
ويفك الباب ويطلع ويسكر الباب وراه .. جيت أبي ألحقه واتعثر واطيح على وجهي ثم قمت وانا انادي: تعال تعال .... وافتح الباب واشوفه نازل من الدرج يتزحلق عالدرج .. واركض وراه واتزحلق وراه ،،، ولاخلى غرفة بالبيت الا دخلها وانا انواع الطريدي وراه .. ويدخل المطبخ .. ويطلع عالمجلس واطلع وراه ونكسّـر ابو الدنيا على أمي وهي تغسل الصحون ..
عاد الوالدة الله يحفظها ويطول عمرها تدور الغلطة علي وتمسك المايكرويف وتلخني به .. بس هربت منه وألحق حرف الكاف والمايكرويف يلحقني من غرفة لغرفة تقل بجبهتي مغناطيس .. ويدخل حرف الكاف للمقلط وادخل وراه ويدخل المايكرويف وراي .. واحجّـر له بالزاوية
(ونسيت من المايكرويف) ويوم جيت بامسكه خلاص و طررررررررربق يصك المايكرويف براسي .. وطلع براسي ورم يشبه عظلة بوبباي بعد ماياكل قوطي سبانخ
وقامت تلف العصافير فوق راسي بس هوّشت عليها وراحت(<<< يحلفون كل ثقافتك أفلام كرتون<< يحلفون لوما اتتلايط وتخليني اكمل!!..)،،
الموووهم ويركض حرف الكاف الين صار عند ابوي وأنا ألحقه ... وقفت انا شوية تروعت من ابوي بس تمالكت نفسي وقلت .. ماسكك ماسكك يالعبد.....الله لايعوق بشر..

ويطمر فوق كتف أبوي واطمر وراه ويحوس يحوس يحوس ويدخل في اذن ابوي وادخل وراه .. ويطلع من الاذن الثاني واطلع وراه.. طبعا ابوي يقرا الجريدة ولاطق لنا خبر"مو هم يقولون دخل الكلام من اذن وطلعه من الاذن الثانيه؟!..
ابوي سوا كذا ولا كأنه درا فينا"،، المهم ويطمر حرف الكاف ويروح جهة الباب وانا وراااااه ...
بس يوم ناظرت لابوي الا اشوف عيونه احوللت.. اثاريني شطفت عينه وانا داخل!!!،،،

ويطلع حرف الكاف واطرده بالحديقة شوي(حديقة طلّ والله..)...
ويطلع من باب الحوش ويروح جهة مقهى الانترنت اللي جمبنا ..
وأنا وراه مافيه الصدام بالصدام(الصدام بالصدام والا بوش بالبوش هاهاها<< انقلع يالماصل الله يلعـ... لاتخليني أكسب اثم ترا ابليس مايصدق الله يلعنك انت وياه<<- خربها)...
ويدخل المقهى وأدخل وراه .. والا كل الاجهزة اللي فيه لاب توبات كومباك.. ويوم انهم شافوني تطايرت كل حروف الكيبوردات اللي هناك مثل الفشار...
وصاروا مليونات الحروفات"أبي أحسسكم انهم كثير من قلب"
ولاعرفت خويي منهم،، ويوم شفتهم كثار ويناظروني ويقربون مني وعيونهم تتطاير منها شرار..
قلت :الرحمه الرحمه واعض طرف نعالي "وانتم كرامه" وآخذ ثوبي بيدي(اصلا العكس بس الله من الدلاخه)..
وماتشوف الا غباري وانا طالع من المقهى .. وهم وراي ..
وانا اهرب وهم وراي والقى عسكري على دباب قدام المقهى واصفقه بكوع واركب الدباب << خبركم أنا مدرب بروسلي على الكراتيه الموووهم
وادعس ادعس ادعسس اليين حسيت اني ضيعتهم خلاص واناظر ورى اباشوف الا اشوفهم في السله حقت الصامولي اللي وراي بالدباب... وكل(ن) منهم فاقن خشته ويناظرون لي ويضحكون والله واطمر من الدباب واتشقلب عالزفلت شوي .. واقوم والا هم جايين من اخر الشارع يطردوني!!!

المشكله عيال الكلب يضحكون!!!

واراكض بالشارع بين السيارات .. ويجي باص ويكفخني الا انا بآخر الشارع واقوم وانفض ملابسي(اللي قهرني ان اللي يسوق الباص هو زر"باك سبيس" حق الكيبورد)..
ويوم شفت السالفة كذا واصك بالصياااح .. واركض بأقوى ماعندي من حيل.. واطلع عالمطار قلت مالي الا اغادر السعودية .. واجيي للمطار واحجز على اول رحلة للخارج واطلع عليها مدري وين رايحة اصلا ... ويوم طرنا وصرنا بالسما قلت اباريّــح شوي.. ونمت ..واول مافتحت عيوني الا اشوف كللل المقاعد فللل وكلهم حروف كيبوردات..
ياويلي ويلاااه وش السواة واطلب المضيفة ..
تدرون من طلعت؟!!: رقم تسعة اللي بالكيبورد!!!..
يوم شفت كذا وانا اللي اخذ سترة النجاة واكسر الباب واطمرر ولا قدامي الا البحر ..
واجي افك سترة النجاة ابي تفتح الا اسمع الضحك والقهقهه.. واناظر الا حرف الميم والطاء ماسكين في الحبل ويقولون محناب فاكينه لك .. امممم النذالة!!
وافك سترة النجاة مني واطمر من غيرها واطب في البحر ،،
ويئست من حياتي .. قلت باموت غريق ،،
الا اشوف من بعيد سفينة وعليها علم القراصنة!!...
قلت قراصنة قراصنة اهم شي احد ينقذني وبس!! ويقربون منني ثم نزل قارب وجاني يبي ينقذني ..
يوم قررب مني واشوف اشكالهم الا كلهم حروف كيبورد،،
واشوف القرصان"مهوب جريش؟!<<< لحد يضحك ياعيال على هالسامج.. خلوكم معي"..

المهم يجيني الرئيس القرصان الاعرج الأعور حقهم الا هو زر"البرنت سكرين" ويرمي علي حبل وهو يضحك .. شفته والاا ماشفته وانا اللي اديور واهرب منه وعينك ماتوشف الا النور.....
واسبح اسبح اسبح وهم يطردون وراي بالقارب وبالسفينة والغواصات ... الييين وصلت جزيرة فيها أشجار وغابات وادخل فيها وركض الين حسيت اني ضيعتهم خلاص .. قلت ابي أشوف لي شي اكله.. مت من الجوع ،، واطلع فوق شجرة ويوم طلعت فوق الشجرة واشوف ثمرة بعيد شوي واطممر واخذها وانا مغمض وافتح فمي اباكلها الا اسمع الضحكة... ويوم فتحت عيوني الا هالثمرة هي"كنترول".. وارميها من يدي واهررررررب ...
بس من شدة الروعة والخبصة صكيت براسي في الشجرة وتطيح حروف وااااجد منها كلها "كنترول" ويضحكوننن!!..
وكلها ثواني الا كل هالجزيرة مليانه منهم..
كل حروف الكيبوردات اللي بالعالم هناك.. ومحاصريني من كل الجهات ..
ويقربون مني شوي شوي .. ويضحكون!!..
أسقط في يدي .. وتوقعت نهايتي قربت .. وجعلت أصرخ وأهدد وأتوعد بس ماش ماهم شايفين توهم احد..
ويقربون مني شوي شوي من كل الجهات .. يوم شفت كذا وانا اللي اقعد عالارض واطقها بكوة ... وابكيييييييييي وابكيييييييي!!!،،،،

ويجوني أزرار الـ(ألت) والـ(شفت) ويمسكوني من يديني ويودوني لقاعة محاكمة.. وبدأت محاكمتي وحطوني مجرم حرب وارهابي وعميل ومقرم وشرير وكل حاجه مهيب زينة.. (كل هذا عشان ضغطت الكيبورد بقوة!!)..
المهم ويجي القاضي حقهم اللي هو الـ(إنتر).. وعليه باروكة شعر مثل حقة شكسبير اللي بكتاب العنجليزي.. ويحكم علي بالقتل تشويتا!!..
وأقعد اصيح : انا برئئئئئئ برئ برئ هاهاهاهاااااءءء(بكوة مو ضحك)...
شوي الا كلهم يناظرون فوق ونسمع صوت قوى.. وناظرت انا فوق الا اشوف هيلوبكتر لالالا هلكتبر لا هلكنترأووفففففف (لحد يناظرني.. والله مافيه كلمة معقدتني بحياتي كثر هالكلمة عجزت اعرفها) ...
هيلوكابتر << الحمد الله عرفت أنطقها
الموهم شفته جاي من بعييييييد ..
واسمع واحد منه ينادي : ياحد الثيف ياحد الثيف .. امثك الحبل امثك الحبل(امسك الحبل)..
ويوم قربوا واشوفهم الا وائل راعي المحل والهندي خويّــه.. ويرمون علي حبل .. واتمسك فيه واطلع لهم ..
أحلى مافي الموضوع ان اللي يسوق الهيلوكبتر هو زر الهروب (Esc)...

Life_End
19-11-2005, 15:32
يوم وصلتهم فوق واقعد أبوسهم واحضنهم مبسوط اني طلعت حي .. قاموا تحمدوا ربي وقال لي وائل المصري : دي مشكلة بنعاني منها كتير أوي الناث يكثّــروا كيبورداتهم ومايرحموهاش وهيّ بتنتـئــم منهم ،، قلت : اهاا يعني هذي السالفه بس؟!!..
قال : آآه واحنا بننقز الناس فترة الضمان بث..
قلت بث؟!! ..
قال : بث ..
واناظر للهندي الا هو يضحك مستااااانس!!...
قلت وين الثي دي؟!!..
قال نثيته بالثيارة ...
قلت : إيييييييييييييش!! ..
ويطقها بكوة ويقول :
نثيته بالثيارة ..
واطمر في رقبته واخنقه اخنقه اخنقه..
والى يومكم على هالحال ... والحين قاعد اكتب الموضوع بيد وماسك رقبة الهندي باليد الثانية ..
شوي اكتب وشوي اناظر له واقول : ايييييش؟!!..
وهو يقول : نثيته بالثيارة ...
وكلنا طاقينها بكوة ونصيح!!!......

THE END

(((( علي نصبات بعد!!!!!... مدري وش تبي))))


---------- مايصتفاد من القوصه -------------
أولا : بشويش على كيبورداتكم .. واحفظوا كرت الضمان عشان لو حقدوا الحروف وبيحاكمونكم .. ينقذونكم المحل بوجب الضمان(ودكم أنطم؟؟!!)..
ثانيا : لاتشتري لاب توب "كومباك" الا والعصا معهووو !!!!...
ثالثا : يقول الشاعر :
فعلا في مواقف كثيرة لاتجد أمامك حلا الا انك" تصيــح"،،،(مقولة شكسبيرية<<-كذاب شكسبيري).

كككككككككككككككككككككككككككككككككككككككككك < -- - شف التعبان"حرف الكاف" يبي يخرب الموضوع علي الحين!!!!..
ككككككككككككككككككككك ككك
ككككككككككككككككككك
أقول ..

الثلام عليكم [/COLOR]

حقوق الطبع محفوظة ووائل يدري ^_*[/CENTER]

LALO
20-11-2005, 13:07
هههههههههههههههههههههههه... غربلاتك ما لقيت غير هذي القصه تقولها

ماشاء الله ع خيالك وااااااااااااااسع حده واصل لنهاية الكيبورد ههه:D

تسلم اخوي ع القصة

مجنونة الحب
20-11-2005, 18:41
لووووووووووووووووووووووووووووووووووووووول

مشكوووووووور عــ القصة الحللوة^_^




باي

BMA
21-11-2005, 10:57
مثوااااااااااااااااار قثتك ..
بث .. حلوووووووه

خيالك جامح جداً ,, خصوصاً يوم (الثيدي) ينكسر

هثثثثثثث << كثثثثثبر أثراااار كيبورث (هقي) منكثر

ثلااام عليكم
وثوكلاً